بۇگىن قىزىلوردا وبلىسىنىڭ اكىمى نۇرلىبەك نالىباەۆتىڭ توراعالىعىمەن وتكەن اكتيۆ وتىرىسىندا قورقىت اتا اتىنداعى ۋنيۆەرسيتەتتىڭ باسقارما توراعاسى-رەكتورى لاۋازىمىنا تاعايىندالعان ناۋرىزباي بايقاداموۆ تانىستىرىلدى, دەپ حابارلايدى Egemen.kz.
«جاقىندا وتكەن ۇكىمەت وتىرىسىندا ەلىمىزدەگى عىلىم مەن جوعارى ءبىلىم ماسەلەسى قارالىپ, ۇكىمەت باسشىسى وبلىس اكىمدەرىنە وڭىرلىك عىلىمي-تەحنولوگيالىق كەڭەستەرگە جەكە باسشىلىق جاساپ, جۇمىسىن ۇيىمداستىرۋدى تاپسىردى. مۇنى جۇزەگە اسىرۋدا قورقىت اتا اتىنداعى قىزىلوردا ۋنيۆەرسيتەتى الەۋەتى جەتكىلىكتى. وقۋ ورنىنىڭ عالىمدارى مەن تۇلەكتەرى ايماعىمىزداعى عىلىمي-يننوۆاتسيالىق دامۋدى باسقارۋدا ايرىقشا ءرول اتقارۋى قاجەت. بۇل باعىتتا اكىمدىك تاراپىنان جان-جاقتى قولداۋ كورسەتىلەدى», دەدى ايماق باسشىسى.
اكتيۆ وتىرىسىنا قاتىسقان پارلامەنت ءماجىلىسىنىڭ دەپۋتاتى مۇرات ەرگەشباەۆ پەن عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا, زيالى قاۋىم وكىلدەرى ءسوز سويلەدى.
جاڭا رەكتور ناۋرىزباي بايقاداموۆ 1991 جىلى قورقىت اتا اتىنداعى قىزىلوردا ۋنيۆەرسيتەتىنىڭ «تاريح جانە فرانتسۋز ءتىلى» ماماندىعىن تامامداعان. ەڭبەك جولىن اۋىل مەكتەبىندە مۇعالىم بولىپ باستاپ, 1994 جىلى ءوزى ءبىلىم العان وقۋ ورنىنا وقىتۋشى رەتىندە قايتا ورالدى. ۋنيۆەرسيتەتتە ءتۇرلى باسشىلىق قىزمەتتەردى, اتاپ ايتقاندا, 2008-2013 جىلدارى تاربيە جۇمىستارى جونىندەگى پرورەكتور قىزمەتىن اتقاردى. جوعارى وقۋ ورنىندا 20 جىلعا جۋىق ەڭبەك ەتىپ, ۋنيۆەرسيتەتتىڭ كوپسالالى ايماقتىق ءبىلىم ورداسى رەتىندە قالىپتاسۋى مەن دامۋىنا ەلەۋلى ۇلەس قوستى.
ناۋرىزباي سەيتقالي ۇلى – تاريح عىلىمدارىنىڭ كانديداتى, بەلگىلى قوعامتانۋشى, 150-گە جۋىق عىلىمي جانە وقۋ-ادىستەمەلىك ەڭبەكتىڭ, بىرنەشە كىتاپتىڭ اۆتورى.
2013 جىلى مەملەكەتتىك قىزمەتكە شاقىرىلىپ, وبلىستىق ءبىلىم باسقارماسىنىڭ باسشىسى, وبلىس اكىمىنىڭ ورىنباسارى, وبلىستىق ءماسليحات حاتشىسى جانە توراعاسى قىزمەتتەرىن ابىرويمەن اتقاردى. ءوڭىردىڭ الەۋمەتتىك-ەكونوميكالىق جانە رۋحاني-مادەني دامۋىنا سۇبەلى ۇلەس قوستى.
سونداي-اق, «نۇر وتان» پارتياسى وبلىستىق فيليالى توراعاسىنىڭ ورىنباسارى, ءبىرىنشى ورىنباسارى, Amanat پارتياسى وبلىستىق فيليالىنىڭ توراعاسى رەتىندە قوعامدىق-ساياسي سالادا دا ناتيجەلى ەڭبەك ەتتى.
2024 جىلعى ساۋىردەن 2026 جىلعى 11 اقپانعا دەيىن قازاقستان رەسپۋبليكاسى پارلامەنتى سەناتىنىڭ دەپۋتاتى, كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ مۇشەسى بولدى.