بۇگىن, 22 قاراشا كۇنى سپورت جانە دەنە شىنىقتىرۋ ىستەرى اگەنتتىگىنە توراعا بولىپ تاستانبەك ەسەنتاەۆ تاعايىندالدى. بۇل لاۋازىمدى بۇرىن اتقارعان ەرلان قوجاعاپانوۆ باسقا جۇمىسقا اۋىسىنا بايلانىستى ورىنان بوساتىلدى. بۇل تۋرالى Egemennews ءتىلشىسى حابارلادى.
ت.ەسەنتاەۆ ەڭبەك جولىن 1977 جىلى باستاعان. 1978–1985 جىلدارى كەڭەس وداعى ارامياسىندا اسكەري بورىشىن وتەپ, جوعارى وقۋ ورىندارىندا وقىدى. 1985–1995 جىلدارى ورىس ءتىلى مەن ادەبيەتىن تەرەڭدەتىپ وقىتۋ جانە اسكەري-دەنە شىنىقتىرۋ دايىندىعىنا ارنالعان وبلىستىق مامانداندىرىلعان مەكتەپ-ينتەرناتتىڭ وقىتۋشىسى مەن كوماندير-تاربيەلەۋشى,1995–2002 جىلدارى قاراعاندى وبلىستىق تۋريزم جانە سپورت كوميتەتىنىڭ جەكپە-جەك تۇرلەرى بويىنشا بالالار جانە جاسوسپىرىمدەرگە ارنالعان مەكتەپ پەن «استام» سپورتتىق كاسىپقوي كلۋبىنىڭ كيكبوكسينگ جانە تاي بوكسىنان جاتتىقتىرۋشىسى, 2002–2009 جىلدارى وبلىستىق جوعارى سپورتتىق شەبەرلىك جانە جاستار ىستەرى, تۋريزم جانە سپورت كوميتەتىنىڭ ديرەكتورى, 2009–2012 جىلدارى «قاراعاندى وبلىستىق تۋريزم, دەنە تاربيەسى جانە سپورت باسقارماسى» مم باستىعىنىڭ ورىنباسارى, باستىعى قىزمەتىن اتقاردى. 2012 جىلعى قاڭتار-ءساۋىر ايلارى ارالىعىندا تۋريزم جانە سپورت مينيسترلىگى سپورت كوميتەتىنىڭ توراعاسى, ءساۋىر ايىنان باستاپ سپورت جانە دەنە شىنىقتىرۋ ىستەرى اگەنتتىگى جوعارى جەتىستىكتەگى سپورت جانە سپورتتىق رەزەرۆ دەپارتامەنتىنىڭ ديرەكتورى بولىپ قىزمەت ەتتى.
ت.ەسەنتاەۆ 2013 جىلدىڭ ناۋرىز ايىنان جاڭا تاعايىنداۋعا دەيىن سپورت جانە دەنە شىنىقتىرۋ ىستەرى اگەنتتىگى توراعاسىنىڭ ورىنباسارى بولىپ جۇمىس ىستەدى.
مانبە: سپورت جانە دەنە شىنىقتىرۋ ىستەرى اگەنتتىگىنىڭ ءباسپاسوز قىزمەتى