125 ارنايى تەحنيكا مەن 100-دەن استام قوسىمشا جابدىق ەلورداداعى كوممۋنالدىق قىزمەتتەر پاركىنە اكەلىنەدى. بۇل تۋرالى نۇر-سۇلتان قالاسىنىڭ اكىمى التاي كولگىنوۆ وز ينستاگرام پاراقشاسىندا جازدى, دەپ حابارلايدى اكىمدىكتىڭ رەسمي سايتى.
“تەحنيكانىڭ قىسقى كەزەڭگە دايىندىعىن تەكسەردىم. كوممۋنالدىق قىزمەتتەر پاركى توزعاندىقتان, تەحنيكانى جوسپارلى تۇردە جاڭارتۋ قاجەت. وتكەن جىلى پاركتى 165-تەن استام قىسقى ارنايى تەحنيكامەن جاڭارتتىق. بيىل ماۋسىمدا تاعى 125 ارنايى تەحنيكا مەن 100-دەن استام قوسىمشا جابدىق اكەلىنەدى. ولاردىڭ قاتارىنا ساموسۆالدار, تيەگىشتەر, تراكتورلار, جول ماشينالارى, شاعىن تيەگىشتەر, سىپىرۋ ماشينالارى جانە ت. ب. جاتادى.
كوممۋنالدىق قىزمەتكەرلەرىمىز اۋا-رايىنىڭ قولايسىزدىعىنا قاراماستان كۇندىز-ءتۇنى جۇمىس ىستەيدى. ولاردىڭ اۋىر ءارى ماڭىزدى جۇمىسىنىڭ ناتيجەسىندە قالادا تازالىق ساقتالىپ, تۇرعىندار ءۇشىن قولايلى جاعداي جاسالادى.
وتكەن جىلدان باستاپ كوممۋنالدىق قىزمەتكەرلەردىڭ جالاقىسى ءوستى, سىياقى ەنگىزىلدى. توتەنشە جاعداي رەجيمى مەن كارانتين ۋاقىتىندا ءبىزدىڭ قىزمەتكەرلەر جۇمىسىن جالعاستىردى. كوممۋنالدىق قىزمەتكەرلەرگە جۇمىس ىستەۋگە قولايلى جاعداي جاساۋدى جالعاستىرامىز”, - دەپ جازدى التاي كولگىنوۆ.