دەنساۋلىق ساقتاۋ مينيسترلىگى جانىنداعى قوعامدىق كەڭەستىڭ العاشقى وتىرىسى ءوتتى. ونلاين رەجىمدە دەنساۋلىق ساقتاۋ ۆيتسە-ءمينيسترى مارات شورانوۆ قوعامدىق كەڭەسكە سايلانعان ازاماتتاردى قۇتتىقتادى. سونىمەن بىرگە بيىل ەلدەگى جاعدايعا بايلانىستى ىرىكتەۋ شارالارىنىڭ كەشىككەنىن ايتتى.
«بىرىنشىدەن, قوعامدىق كەڭەستىڭ قۇرامى 16 مۇشەدەن تۇرادى, ونىڭ 2/3 بولىگى مەملەكەتتىك قىزمەتكەرلەر, ياعني دەنساۋلىق ساقتاۋ مينيسترلىگىنىڭ قىزمەتكەرلەرى ەمەس دەپ ايتقىم كەلەدى. بۇل قوعام قايراتكەرلەرى, ۇەۇ, «اتامەكەن» ۇكپ وكىلدەرى. سوندىقتان قۇرمەتتى ارىپتەستەر, كەڭەس مۇشەلەرىن وسىنداي جاۋاپتى مەملەكەتتىك قىزمەتكە سايلانۋىمەن قۇتتىقتاۋعا رۇقسات ەتىڭىزدەر, قوعامنىڭ مۇددەسىن كوكسەڭىزدەر», دەدى مارات شورانوۆ.
جينالىستىڭ كۇن تارتىبىندەگى ءبىرىنشى ماسەلە – اشىق داۋىس بەرۋ ارقىلى كەڭەس توراعاسى مەن حاتشىسىن سايلاۋ. داۋىستاردى جالپى ساناۋ ناتيجەلەرى بويىنشا كەڭەستىڭ توراعاسى بولىپ بەلگىلى قوعام قايراتكەرى, قازاقستان رەسپۋبليكاسى پارلامەنتى ءماجىلىسىنىڭ ەكس-دەپۋتاتى نادەجدا پەتۋحوۆا (11 داۋىس) سايلاندى. نادەجدا ميحايلوۆنا تسەلينوگراد مەملەكەتتىك مەديتسينا ينستيتۋتىن, پەدياتر-دارىگەر ماماندىعى بويىنشا بىتىرگەن. ءار جىلدارى ول دارىگەر-ينسپەكتور, تسەلينوگراد وبلىستىق دەنساۋلىق ساقتاۋ باسقارماسىنىڭ ەمدەۋ-پروفيلاكتيكالىق سەكتورىنىڭ مەڭگەرۋشىسى, «استانا قالاسىنىڭ №1 قالالىق بالالار اۋرۋحاناسىنىڭ» باس دارىگەرى قىزمەتتەرىن اتقاردى.
«ماعان سەنىم بىلدىرگەنى ءۇشىن قوعامدىق كەڭەس مۇشەلەرىنە العىس ايتقىم كەلەدى. مەن ۋچاسكەلىك دارىگەردەن باستاپ, رەانيماتسيا دارىگەرى, وبلىستىق دەنساۋلىق ساقتاۋ باسقارماسىنىڭ باسشىسى, ءماسليحات جانە پارلامەنتتەن العان تاجىريبەمدى قىزمەت بارىسىندا بارىنشا پايدالانۋعا تىرىسامىن. قوعامدا, ونىڭ ىشىندە ازاماتتىق قوعام مەن مەملەكەتتىك ورگان اراسىنداعى بارلىق پروبلەما ديالوگ الاڭىندا شەشىلۋى كەرەك. ءبىز مينيسترلىكپەن بىرلەسە وتىرىپ, حالىقتىڭ مەديتسينالىق كومەك كورسەتۋ ساپاسىنا كوڭىلى تولىپ, ونىڭ ءتيىمدى ءارى قاۋىپسىز بولۋىن قامتاماسىز ەتۋگە تىرىساتىن بولامىز», دەدى ن.پەتۋحوۆا.
قوعامدىق كەڭەستىڭ حاتشىسى بولىپ دەنساۋلىق ساقتاۋ مينيسترلىگىنىڭ ستراتەگيالىق دامۋ دەپارتامەنتىنىڭ ديرەكتورى يلياس باكيروۆ سايلاندى. ول قوعامدىق كەڭەستىڭ جاڭا قۇرامى مۇشەلەرىن ىرىكتەۋ پروتسەدۋراسى مەن ناتيجەلەرى تۋرالى باياندادى.
«قوعامدىق كەڭەسكە قاتىسۋعا بارلىعى 74 ادام ءوتىنىش ءبىلدىردى, ولاردىڭ بارلىعى جۇمىس توبىندا قارالدى. بارلىق ۇمىتكەرلەر لايىقتى بولدى دەپ ايتۋعا بولادى, بىراق قاتىسۋشىلاردىڭ كەيبىرىنىڭ ىرىكتەۋدەن وتپەۋىنە ناقتى سەبەپتەر بار. جۇمىس توبىنىڭ پىكىرى حاتتاما نەگىزىندە تولتىرىلدى, ونى دەنساۋلىق ساقتاۋ مينيسترلىگىنىڭ سايتىنان وقۋعا بولادى», دەدى ءىلياس باكيروۆ.
ءبىرىنشى جۇمىس وتىرىسىندا قوعامدىق كەڭەس مۇشەلەرى بەلگىلەنگەن قۇرىلىمنىڭ رەگلامەنتتەرى مەن جۇمىس جوسپارىن تالقىلادى.