ءمامس اياسىنداعى قولجەتىمدى مەديتسينالىق قىزمەتتەر

ءمامس اياسىندا ەلوردانىڭ مەديتسينالىق مەكەمەلەرى پروفي­لاك­تيكالىق تەكسەرۋ, كونسۋل­تاتيۆتىك-دياگنوستيكالىق جانە ستاتسيونارلىق كومەك, سونداي-اق قالىپقا كەلتىرۋ ەمى بويىنشا قىزمەت كورسەتتى. بۇل تۋرالى ارنايى بريفينگتە قالالىق قوعامدىق دەنساۋلىق ساقتاۋ باس­قار­ماسىنىڭ باسشىسى تيمۋر مۇراتوۆ مالىمدەدى.

ونىڭ ايتۋىنشا, جىل باسىنان بەرى كت جانە مرت, مەديتسينالىق-گەنەتيكالىق زەرتتەۋلەر سياقتى مەديتسينالىق قىزمەتتىڭ قىمبات تۇرلەرى بمسك دارىگەرىنىڭ جولدامالارى بويىنشا بارلىق پاتسيەنتكە تەگىن كورسەتىلدى.

سونداي-اق قاڭتار ايىنان باس­تاپ, امبۋلاتوريالىق دەڭگەيدە ۇسىنىلاتىن دارىلىك زاتتاردىڭ ءتىزىمى كوبەيدى. اتاپ ايتقاندا بۇل تىزىمگە 29 ەرەسەك جانە 53 بالالار اۋرۋلارى بويىنشا جاڭا نوزولوگيا ەنگىزىلگەن.

"الەۋمەتتىك مەديتسينالىق ساقتاندىرۋ قورى" كەاق ەلوردالىق فيليا­لىنىڭ ديرەكتورى نۇرلىبەك قابدىقاپاروۆ اتاپ وتكەندەي, ناۋقاستارمەن تۇراقتى كەرى بايلانىس جۇرگىزىلەدى.

– بايلانىس-ورتالىعىنا 1406 ءنومىرى ارقىلى ازاماتتاردىڭ وتىنىشتەرى مەن شاعىمدارى قا­بىل­دانادى. مەديتسينالىق قىز­مەت كورسەتۋ ماسەلەلەرى بويىنشا قوردىڭ نۇر-سۇلتان قالاسى بويىنشا بايلانىس ورتالىعىندا 2020 جىلعى 1 قاڭتار مەن 1 قاراشا ارالىعىندا 92 241 ءوتىنىش تىركەلگەن, ولاردىڭ بارلىعىن ءبولىم ماماندارى قاراعان, – دەدى ن.قابدىقاپاروۆ.

ءمامس جۇيەسىندەگى ءوز مار­تە­بەڭىزدى رەسمي سەرۆيستەر ارقىلى – امسق سايتىندا (fms.kz), "Qoldau 24/7" ءموبيلدى قوسىمشاسىندا, Telegram-داعى Saqtandyru-bot-تا تەكسەرۋگە بولادى. "Qoldau 24/7" قوسىمشاسىن جۇكتەپ الىپ, ءوتىنىش, العىس, ۇسىنىس قالدىرۋعا بولادى. مىندەتتى الەۋمەتتىك مەديتسينالىق ساقتاندىرۋ جانە مەديتسينالىق قىزمەت كورسەتۋ ماسەلەلەرى بويىنشا كەڭەس الۋ دا مۇمكىن.