ۆەنەسۋەلا ۇلتتىق پارلامەنتى (اسسامبلەيا) ەل پرەزيدەنتى نيكولاس مادۋروعا ەرەكشە وكىلەتتىك بەردى. بۇل تۋرالى يا REGNUM پورتالى حابارلادى.
ۆەنەسۋەلا پرەزيدەنتىنە ەل باسقارۋ ىسىندە ەرەكشە ارتىقشىلىق بەرەتىن زاڭ جوباسىن ۇلتتىق پارلامەنت مۇشەلەرى ەكىنشى وقىلىمدا ماقۇلداعان.
بۇل زاڭ بويىنشا مەملەكەت باسشىسى ماڭىزدى دەكرەتتەردى, جوعارعى وكىمەتتىڭ قاۋلىلارىن پارلامەنتتىڭ قاتىسۋىنسىز قابىلداي بەرەدى.
ۆەنەسۋەلا ۇلتتىق پارلامەنتىنەن ەرەكشە وكىلەتتىك العان نيكولاس مادۋرو ەندى ەل ەكونوميكاسىنا قاۋىپ توندىرەتىن كۇشتەرمەن, سىبايلاس-جەمقورلىقپەن ىمىراسىز كۇرەسپەك. سونداي-اق, الىپساتارلار مەن جەكە كاسىپكەرلەردى دە قاتاڭ باقىلاماق. مادۋرونىڭ ويىنشا, وزىنە بەرىلگەن ەرەكشە وكىلەتتىكسىز ۆەنەسۋەلادا سوتسياليزم ورناتۋ مۇمكىن ەمەس.
جولدىباي بازار.