ءتىسى اۋىرىپ داۋا ىزدەپ كەلگەن ءاربىر كىسىنىڭ ءتىسى مەن اۋىز قۋىسىنىڭ ۇلگىسىن الىپ, ودان ارنايى پروتەز جاسايتىندار – ءتىس تەحنيكتەرى. بۇگىندە بۇل ماماندىق جوعارى سۇرانىسقا يە. وسىدان ەكى جىل بۇرىن ەلىمىزدە العاش رەت تالدىقورعان جوعارعى مەديتسينا كوللەدجىندە ەستۋ قابىلەتىنەن ايرىلعان جانداردى ءتىس تەحنيگى ماماندىعى بويىنشا وقىتاتىن ارنايى توپ اشىلعان ەدى.
«جاستار كورپۋسىن دامىتۋ» جوباسىنىڭ قاتىسۋشىسى اسلانبەك تولەپبەكوۆ – ءتىس تەحنيگى ماماندىعى بويىنشا اتالعان وقۋ ورنىندا ءتالىم الۋشىلاردىڭ ءبىرى. 2020 جىلى Zhasproject جوباسى جايىندا ەستىگەن كەيىپكەرىمىز «الەۋمەتتىك ءتىس كابينەتىن» اشۋدى كوزدەيدى. وسىلاي الەۋمەتتىك جوبا بايقاۋىنا قاتىسىپ, 1 ملن تەڭگە كولەمىندە قارجى ۇتىپ الادى.
الەۋمەتتىك جوباعا اسلانبەكپەن قاتار ءىلياس الىمباەۆ, مانشۇك نايمانوۆا جانە الىشەر تولەپبەكوۆ سياقتى جاستار دا قاتىستى. قازىرگى ۋاقىتتا ولار العان ءبىلىمىن ءتىس كابينەتىندە تاجىريبەمەن ۇشتاستىرىپ ءجۇر.
الەۋمەتتىك جوبانىڭ نوۆاتورى اسلانبەك بالا كەزىنەن وتە زەرەك, العىر بولىپ, مەكتەپ تابالدىرىعىندا ءتۇرلى وليمپيادالاردىڭ جۇلدەگەرى اتانعان. ول 18 جاسىندا جايسىز وقيعاعا تاپ بولىپ, بۇل كەلەڭسىز جاعداي كەيىن ونى ءتىس تەحنيگى بولۋعا يتەرمەلەگەن. جاعىنا وتا جاساتۋ كەزىندە كۇرەتامىرىنا سكالپەل ءتيىپ كەتىپ, اسلانبەك ەستۋ قابىلەتىنەن ايرىلىپ قالادى. بىراق دارىگەردىڭ بۇل قاتەلىگى ونىڭ ارماندارىنا كەدەرگى بولمادى. قايتا اسلانبەك بار جىگەرىن جيناپ, ماماندىعى ارقىلى قاراپايىم حالىققا كومەكتەسكىسى كەلەدى.
قالاداعى جەكەمەنشىك كلينيكالاردا ءتىس تەحنيكتەرىن جۇمىسقا قابىلداي بەرمەيدى ەكەن. الايدا اسلانبەك پەن ونىڭ دوستارى بۇعان قامىعا قويمايدى. «جاستار كورپۋسىن دامىتۋ» جوباسىنان العان سوماعا ولار جەكە كلينيكاسىن اشتى. تالدىقورعان جوعارى مەديتسينا كوللەدجى مەن «قازاق ساڭىراۋلار» قوعامىنىڭ اۋدارماشىسى مارات جۇمابەكوۆتىڭ قولداۋىمەن جاستارعا تەگىن كابينەت بەرىلدى. Zhasproject جوباسى ارقىلى اسلانبەك باستاعان جاستار ءتىس كابينەتىنە قاجەتتى مەديتسينالىق قۇرال-جابدىقتاردى ساتىپ الدى. قازىر مۇندا ايىنا 10-نان اسا ادامعا پروتەز جاسالىپ جاتىر. الداعى ۋاقىتتا كەلۋشىلەردىڭ سانى ءالى دە وسەدى دەگەن ءۇمىت بار.
جالپى تالدىقورعان قالاسىندا ءبىر پروتەزدىڭ باعاسى – 30 مىڭ تەڭگە كولەمىندە. مىسالى, ستوماتولوگيالىق كلينيكاعا كەلگەن كليەنتتەن ارنايى اۋىز قۋىسىنىڭ ۇلگىسى الىنادى, ول ارنايى الگيناتتى ءتىس تەحنيگىنە جولدانادى. ال ءتىس تەحنيگى تۇسكەن تاپسىرىستى ۇلگى ارقىلى ورىنداپ, كايتا جونەلتەدى. وسىنداي ءتىس پروتەزىن اسلانبەك پەن ونىڭ جولداستارى اقىسىز جاساپ بەرىپ وتىر. وسىلايشا, حالىقتىڭ الەۋمەتتىك جاعدايىنا قاراسىپ, قولدان كەلگەن كومەگىن كورسەتىپ جاتقان جاستاردىڭ بۇل ءىسى كوپكە ۇلگى.
جاس ءتىس تەحنيكتەرىنىڭ العا قويعان جوسپارى كوپ. ولار مۇنىمەن توقتاپ قالماي, 12 ستوماتولوگيالىق قىزمەت ءتۇرىن كورسەتۋدى ماقسات تۇتىپ وتىر. جوبادان بۇيىرعان قارجى جاستارعا ۇلكەن مۇمكىندىك بەرىپ قانا قويماي, اينالاسىنداعى اعايىنعا كومەكتەسۋىنە جاعداي جاسادى. اسلانبەك Zhasproject جوباسى بولاشاققا باتىل قادام جاساۋىنا جول اشقانىن ايتىپ, جاستارعا وسىنداي قولداۋ بولعانىنا ريزاشىلىعىن ءبىلدىردى.