قۇرلىقتىق حوككەي ليگاسىندا (قحل) باق سىنايتىن ەلوردانىڭ «بارىسى» رەسەيدىڭ نوۆوسيبيرسك قالاسىنا ساپار شەگىپ, تارتىستى وتكەن ويىندا «سيبير» كومانداسىنان جەڭىلىپ قالدى. بۇل – «بارىستىڭ» قاتارىنان ءۇشىنشى جەڭىلىسى.
ەلورداداعى ويىندا قازاننىڭ «اك بارس» كومانداسىنان 3:1 ەسەبىمەن جەڭىلگەن «بارىس» بۇل جولى دا سىرت ايدىندا ءدال وسىنداي ناتيجەمەن «سيبير» حوككەيشىلەرىنە ەسە جىبەردى. كەزدەسۋدىڭ ءبىرىنشى كەزەڭىندە ادەتتەگىدەي ەسەپ اشىلعان جوق. ادەتتەگىدەي دەپ ەكپىن بەرۋىمىزدىڭ سەبەبى, «بارىستىڭ» كەيىنگى ءتورت ويىنىنىڭ بارلىعىندا كوماندالار ءبىر-ءبىرىنىڭ ءبىرىنشى كەزەڭدە قاقپاسىنان ساڭىلاۋ تابا الماي كەلەدى.
ەكىنشى 20 مينۋتتا جەرلەستەرىمىزگە قاراعاندا, مۇزايدىن يەلەرى شيراق قيمىلداپ, بەلسەندى ويىنىمەن كوزگە ءتۇستى. ناتيجەسىندە, كەزدەسۋدىڭ 24-مينۋتىندا ەسەپ اشتى. شايبا اۆتورى – نيكيتا شاشكوۆ. دەسە دە, «بارىستىڭ» قارىمتا شايباسى كوپ كۇتتىرگەن جوق. ماۋسىمارالىق ۇزىلىستە ەلوردالىق كلۋبتىڭ جەيدەسىن كيگەن شۆەتسيالىق ياكوب ليليا 32-مينۋتتا مەرگەندىگىمەن كوزگە ءتۇسىپ, تارازى باسىن تەڭەستىردى. تۇراقتى بىرىنشىلىكتە 14-ءشى ويىنىن وتكىزگەن شابۋىلشى نەبارى 4-ءشى شايباسىن سوقتى. ازىرگە ول كوماندانىڭ دا, جانكۇيەرلەردىڭ سەنىمىن اقتاي الار ەمەس.
ەكىنشى كەزەڭ اياقتالعانعا دەيىن «سيبير» ويىنشىسى ەگور ميلوۆزوروۆ كومانداسىنىڭ ەكىنشى گولىن سوعىپ, جاقسى كوڭىل-كۇيمەن ۇزىلىسكە شىقتى. ءۇشىنشى كەزەڭدە ەسەپتى تەڭەستىرەمىز دەپ العا ۇمتىلعان قازاقستاندىق كوماندا قورعانىستى ۇمىت قالدىردى. ناتيجەسىندە, باسەكەنىڭ سوڭعى مينۋتىندا مۇزايدىن قوجايىندارى ءۇشىنشى شايباسىن سوعىپ كەتتى. بۇل جولى ولەگ لي ءوز اتىن تابلوعا جازدىرتتى.
ەندى جەرلەستەرىمىز سىرت ايدىنداعى ەكىنشى ويىنىن بۇگىن ءسوچيدىڭ «سوچي» كومانداسىمەن وتكىزەدى. كەيىن ەلورداعا ورالىپ, ءوز جەرىمىزدە «كۋنلۋن» جانە «دينامو ريگا» كلۋبتارىن قابىلدايدى.