وتكەن دەمالىس كۇندەرى تاراز قالاسىنداعى بىرقاتار دۇكەندەردە نان باعاسى 5-10 تەڭگەگە وسكەن بولاتىن. بۇل شەشىمدى ولار جەرگىلىكتى بيلىكپەن كەلىسىلمەگەن كۇيى قابىلداعان. قازىرگى كەزدە جەدەل شتاب جاعدايعا جان-جاقتى زەرتتەۋ جۇرگىزۋدە, - دەپ جازادى Egemen.kz
اتالعان ماسەلەگە جامبىل وبلىسىنىڭ اكىمدىگى تاراپىنان شارا قابىلدانىپ, تارازداعى ءىرى ساۋدا ورىندارىندا نان قايتادان 85 تەڭگەدەن ساتىلا باستادى. الايدا, قالا اۋلالارىنداعى شاعىن دۇكەندەردىڭ كەيبىرىندە نان 5-10 تەڭگەگە قىمبات ساتىلۋدا ەكەن.
تاراز قالاسىندا نەگىزگى 6 ناۋبايحانا جۇمىس ىستەيدى. ونىڭ ىشىندەگى 5 ناۋبايحانا يەلەرى باعانى كوتەرۋ تۋرالى شەشىمگە كەلگەن. ولار اس اتاسىنىڭ قىمباتتاۋىن ەلىمىزدىڭ سولتۇستىك وڭىرلەرىنەن كەلەتىن ۇن باعاسىنىڭ وسىمىمەن تۇسىندىرۋدە. بۇل رەتتە وبلىس اكىمىنىڭ ورىنباسارى بەرىك نىعماشەۆ جەرگىلىكتى تۇرعىنداردى سابىرعا شاقىرىپ, جاعدايدىڭ رەتتەلەتىنىن جەتكىزدى.
ونىڭ ايتۋىنشا, مونيتورينگ كەزىندە بىرقاتار نان وندىرۋشىلەردىڭ نان باعاسىن 85 تەڭگەدەن 95 تەڭگەگەدەيىن وسىرگەنى انىقتالعان. «قازىر جەدەل شتاب مۇنىڭ قانشالىقتى قيسىندى ەكەنىن انىقتاۋ ماقساتىندا تەكسەرىس جۇرگىزۋدە. جەرگىلىكتى بيلىكپەن اقىلداسپاي ارەكەت ەتكەن كاسىپكەرلەر جاۋاپقى تارتىلادى», دەدى ول. ءتيىستى مونيتورينگ جۇمىستارى مونوپولياعا قارسى جانە سالىق ورگاندارىمەن بىرلەسە جۇرگىزىلۋدە ەكەن. بۇل ورايدا, بەرىك نىعماشەۆ نان باعاسى بىرنەشە فاكتورلارعا بايلانىستى ەكەنىن ايتتى. «بىراق ەڭ نەگىزگىسى ۇننىڭ باعاسىنا كەلىپ تىرەلەدى. ال, قازىر ۇننىڭ قۇنى 115 تەڭگەدەن 130-140 تەڭگەگە دەيىن ءوسىپ كەتكەن», دەدى اكىمنىڭ ورىنباسارى. وتكەن جىلى دا وسى ۋاقىتتا نان باعاسى وسكەن بولاتىن. سوندىقتان دا بيىل نان باعاسىن ۇستاپ تۇرۋعا باعىتتالعان الدىن الۋ شارالارى قابىلدانىپ, ناۋبايحانالارعا ۇن ناۋرىز ايىنان قازان ايىنا دەيىن تۇراقتاندىرۋ قورىنان تومەن باعامەن بەرىلگەن. قازىر تۇراقتاندىرۋ قورىندا 500 توننا ۇن بار. قوسىمشا تاعى 2000 توننا ۇن الىنادى. وبلىس اكىمى الەۋمەتتىك ماڭىزى بار تاۋارلار, ونىڭ ىشىندە ناننىڭ باعاسىن نەگىزسىز وسىرۋگە جول بەرمەۋدى تاپسىردى. ءبىز جاعدايدى تۇراقتاندىرۋ ءۇشىن بارلىق شارالاردى قولداناتىن بولامىز. قاجەتتى رەسۋرستارىمىز جەتكىلىكتى. «تاراز» الەۋمەتتىك-كاسىپكەرلىك كورپوراتسياسى ۇن ساتىپ الىپ, نان وندىرۋشىلەرگە تومەندەتىلگەن باعامەن ۇسىنباق», دەيدى بەرىك نىعماشەۆ. الايدا ونىڭ ايتۋىنشا, تاراز قالاسىنداعى نان باعاسى وزگە وڭىرلەرمەن سالىستىرعاندا ارزان. سونىمەن قاتار, «تاراز» الەۋمەتتىك-كاسىپكەرلىك كورپوراتسياسىنىڭ الەۋمەتتىك دۇكەندەرىندە نان 55 تەڭگەدەن ساتىلۋدا.
جامبىل وبلىسى