ەلوردادا سەرۋەندەۋگە جانە جايلى دەمالىسقا ارنالعان جاڭا قوعامدىق ورىن پايدا بولدى. الماتى اۋدانى پرومىشلەننىي ەلدى-مەكەنىندە سپورت الاڭىمەن, مۇمكىندىگى شەكتەۋلى بالالاردىڭ دا قاجەتتىلىكتەرى ءۇشىن جابدىقتالعان ويىن الاڭى اشىلدى, دەپ حابارلايدى Egemen.kz.
«مۇندا جارىقتاندىرۋ, سۋارۋ جۇيەسى تولىعىمەن اۆتوماتتاندىرىلعان. سونىمەن قاتار, تۇرعىندار زامان تالابىنا ساي, زاماناۋي, جاتتىعۋ قۇرىلعىلارى ورناتىلعان سپورت الاڭى سالىندى. بۇعان قوسا بالالارعا ارنالعان ويىن الاڭى دا ورناتىلدى», — دەيدى نۇر-سۇلتان قالاسى قورشاعان ورتانى قورعاۋ جانە تابيعاتتى پايدالانۋ باسقارماسى باسشىسىنىڭ ورىنباسارى ايدىن بەگىمبەكوۆ.
ونىڭ ايتۋىنشا, ساياباقتا مۇمكىندىگى شەكتەۋلى بالالاردىڭ دا جاعدايى نازاردان تىس قالماعانىن ايرىقشا اتاپ ءوتتى.
پارك ىشىندە شاعىن اۋداننىڭ تۇرعىندارىمەن قوسىلىپ, سەنبىلىك تع ۇيىمداستىرىلعان. سونىڭ ناتيجەسىندە 40 قاراعاي اعاشى ەگىلدى.
باسقارما باسشىسى اتاپ وتكەندەي, «نۇر-سۇلتان — جايلى قالا» جوسپارى بويىنشا ەلوردانىڭ شەت اۋماعىنداعى بوس جاتقان جەرلەردى يگەرۋ ارقىلى, سول سياقتى جارامسىز ەسكى عيماراتتاردى بۇزۋ ارقىلى ەل يگىلىگىنە, تۇرعىنداردىڭ جايلىلىعىنا ارنالعان الاڭقايلار, ساياباقتار بىرتىندەپ اشىلاتىن بولادى.
ايتا كەتۋ كەرەك, ەلوردا تۇرعىندارى مەن قوناقتارىنا ىڭعايلى بولۋ ءۇشىن اۋلا اۋماقتارىن اباتتاندىرۋعا كوپ كوڭىل بولىنەدى. بيىلعى جىلدىڭ وزىندە قالادا 150 اۋلا مەن 50-دەن استام قوعامدىق كەڭىستىك اباتتاندىرىلدى.