سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ اۋىل شارۋاشىلىعى سالاسىندا كەڭەس بەرۋ جانە مەملەكەتتىك قىزمەت كورسەتۋگە مامانداندىرىلعان ەلىمىزدىڭ العاشقى "AGROKÓMEK" سەرۆيستىك ورتالىعىنىڭ اشىلۋىنا قاتىستى, دەپ حابارلايدى Egemen.kz.
ەندى شارۋالار ءۇشىن جالپى سانى 50 مەملەكەتتىك قىزمەت ءبىر جەردە كورسەتىلەتىن بولادى. ول ءۇشىن اكىمشىلىك عيماراتتىڭ ءبىرىنشى قاباتىندا بىردەن بەس مەملەكەتتىك ورگاننىڭ ماماندارى ورنالاستى.
«سولتۇستىك قازاقستان وبلىسى اۋىل شارۋاشىلىعىنا باعىتتالعان. مەملەكەتتىك اپپاراتتىڭ ازاماتتارمەن ءوزارا قارىم-قاتىناسى تۇتىنۋشىعا باعدارلانۋى جانە قولجەتىمدىلىك قاعيداتتارىنا نەگىزدەلۋى دۇرىس قۇبىلىس. بارلىق مەملەكەتتىك قۇرىلىمدار بىرىگىپ, قىزمەت الۋشىلار ءۇشىن قولايلى جاعداي جاساۋ ءۇشىن جۇمىس ىستەۋى ءتيىس», - دەپ اتاپ ءوتتى اليك شپەكباەۆ.
انتيكور باسشىسى اگرارلىق ايماقتا سەرۆيستىك ورتالىق قۇرۋ جەمقورلىق تاۋەكەلدەرىن ازايتۋعا وڭ اسەر ەتەتىنىنە, ال سولتۇستىك قازاقستاندىق ديقانداردىڭ ماسەلەلەردى بەيرەسمي شەشۋگە جۇگىنۋگە مۇمكىندىگى بولمايتىنىنا سەنىمدى.
ورتالىقتىڭ الەمدىك نارىقتا سۇرانىسقا يە ەكولوگيالىق تازا, تابيعي ءونىم وندىرەتىن ەلىمىزدىڭ استىق وڭىرىندە اشىلعانى دا وزەكتى. بۇل رەتتە ءوز ءىسىنىڭ شەبەرلەرى بولعان وبلىس ديقاندارى مەملەكەتتىك قىزمەتتەردى بەلسەندى تۇردە الىپ, سۋبسيديالاۋ تۇرىندەگى مەملەكەتتىك قولداۋ مۇمكىندىكتەرىن كەڭىنەن پايدالانادى. سوندىقتان وڭىردە وسىنداي سەرۆيستىك الاڭنىڭ اشىلۋى جاقسى دەمەۋ بولاتىنى ءسوزسىز.
ء«داستۇرلى تۇردە اگروونەركاسىپ كەشەنى ەكونوميكانىڭ باسىم سالاسى رەتىندە ايقىندالعان. بۇگىن ءبىز اۋىل شارۋاشىلىعى تاۋارلارىن وندىرۋشىلەرگە قىزمەت كورسەتەتىن مەملەكەتتىك ورگاندار مەن اۋماقتىق دەپارتامەنتتەردىڭ جۇمىسىن وڭتايلاندىردىق. ەگەر بۇرىن ولار مەكەمەلەر تابالدىرىعىن توزدىرسا, بۇگىندە بار قىزمەت ءبىرىنشى قاباتتا ورتالىقتاندىرىلعان. بۇل ۋاقىتتى ايتارلىقتاي ۇنەمدەيدى, سونداي-اق شەنەۋنىكتەرمەن جاقىن قارىم-قاتىناستى, ولاردىڭ كابينەتتەرىندەگى ادامداردىڭ سانىن بولدىرمايدى», - دەپ مالىمدەدى وبلىس اكىمى قۇمار اقساقالوۆ.
سەرۆيس ورتالىعىندا تۇرعىندار قىزمەتتەردى مەملەكەتتىك ورگان ارقىلى عانا ەمەس, وزىنە-ءوزى قىزمەت كورسەتۋ ايماعىندا ەلەكتروندىق ۇكىمەت پورتالى ارقىلى دا الا الادى. سونداي-اق, سالا ماماندارى مەن مەملەكەتتىك ورگاندار باسشىلىعىنىڭ ازاماتتاردى قابىلداۋى ءۇشىن ارنايى جابدىقتالعان كابينەت قاراستىرىلعان.