دەنساۋلىق ساقتاۋ ۆيتسە-ءمينيسترى - باس مەملەكەتتىك سانيتارلىق دارىگەر ەرلان قياسوۆ 2020 جىلعى 22-23 قازاندا COVID-19 كوروناۆيرۋس ينفەكتسياسىنىڭ الدىن الۋ بويىنشا جۇرگىزىلەتىن ەپيدەمياعا قارسى ءىس-شارالارمەن تانىسۋ ماقساتىندا شىعىس قازاقستان وبلىسىنا ىسساپارمەن باردى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ۆيتسە-مينيستر ءىسساپار بارىسىندا شىعىس قازاقستان وبلىسىنىڭ اكىمى دانيال احمەتوۆپەن كەزدەسىپ, ايماقتاعى ەپيدەميولوگيالىق جاعدايدى, تۇرعىندار اراسىنداعى سىرقات دەڭگەيىن تومەندەتۋگە ارنالعان پروفيلاكتيكالىق جانە ەپيدەمياعا قارسى ءىس-شارالاردى تالقىلادى. ۆيتسە-مينيستر مەن ءوڭىر باسشىسى وبلىستىڭ COVID-19 كوروناۆيرۋس ينفەكتسياسىنىڭ ىقتيمال ەكىنشى تولقىنىنا دايىندىعىن قاراستىردى.
"قازاقستانداعى ەپيدەميولوگيالىق جاعدايدى باعالاۋ ماتريتساسىنا سايكەس, سارى ايماقتا جالعىز - شىعىس قازاقستان وبلىسى تۇر. قالعانى جاسىل ايماقتا. وسىعان بايلانىستى وڭىردە كوروناۆيرۋس ينفەكتسياسىنىڭ تارالۋىنا جول بەرمەۋ بويىنشا بارلىق قاجەتتى شارالاردى قابىلداۋ قاجەت", - دەدى ە. قياسوۆ.
سونداي-اق ۆيتسە-مينيستر وبلىس اكىمىنىڭ احۋالدىق ورتالىعى بازاسىندا قۇرىلعان COVID-19 وشاعىن وقشاۋلاۋ ورتالىعىمەن تانىستى, ول سوو مەن مەديتسينالىق مەكەمە, سەس, اۋىلدىق وكرۋگتەردىڭ اكىمدىكتەرى اراسىندا جەدەل دەرەك الماسۋعا ارنالعان.
باس مەملەكەتتىك سانيتارلىق دارىگەر شىعىس قازاقستان وبلىسىنىڭ دەنساۋلىق ساقتاۋ باسقارماسىنىڭ, ىشكى ىستەر دەپارتامەنتىنىڭ جانە باسقا دا ورگاندار مەن ۇيىمداردىڭ وكىلدەرىمەن كەزدەسىپ, ءوزارا ءىس-قيمىل ماسەلەسىن تالقىلادى. سونىمەن قاتار, شىعىس قازاقستان وبلىسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ۇجىمىمەن كەزدەستى, كوروناۆيرۋس ينفەكتسياسى بويىنشا پروبلەمالىق ماسەلەلەر مەن قازىرگى ەپيدەميولوگيالىق جاعدايدى تالقىلادى.
ە. قياسوۆ جۇمىستى رەفورمالاۋ, قىزمەتكەرلەردى ىنتالاندىرۋ دەڭگەيىن ارتتىرۋ جانە ت. ب. بويىنشا قابىلدانعان شارالار تۋرالى اقپاراتپەن تانىستىردى.
ساپار سوڭىندا ۆيتسە-مينيستر قر دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ "ۇلتتىق ساراپتاما ورتالىعى" شجق رم شىعىس قازاقستان وبلىسى بويىنشا فيليالىنىڭ قىزمەتكەرلەرىمەن كەزدەسۋ وتكىزدى. تاراپتار زەرتحانالىق زەرتتەۋلەردىڭ تيىمدىلىگىن كوتەرۋ, پتر-زەرتتەۋلەردىڭ سانى مەن قۋاتىن ارتتىرۋ, ۆەدومستۆوارالىق ءوزارا ءىس-قيمىل جانە باسقا دا زەرتحانالار مەن وزگە دە قىزمەتتەردىڭ جۇمىسىن ۇيلەستىرۋ ماسەلەلەرىن تالقىلادى. ەرلان قياسوۆ سونداي-اق وبلىس تۇرعىندارى اراسىندا پتر تەستىلەۋ جۇرگىزەتىن اسا قاۋىپتى ينفەكتسيالار زەرتحاناسىنىڭ ماتەريالدىق-تەحنيكاسى, كادرلىق الەۋەتىمەن تانىستى.