الماتىنىڭ توتەنشە جاعدايلار قىزمەتى جەكسەنبىنىڭ تاڭىن تاعى دا «باراحولكادان» تۇسكەن دابىلمەن قارسى الدى. جۋىردا عانا 3 بازار ورتەنىپ, شىققان شىعىننىڭ ۇشتىعىنا جەتە الماي وتىرعاندا, قالا ۇستىنە قارا ءتۇتىن تاعى دا قاپتادى.
الماتىنىڭ توتەنشە جاعدايلار قىزمەتى جەكسەنبىنىڭ تاڭىن تاعى دا «باراحولكادان» تۇسكەن دابىلمەن قارسى الدى. جۋىردا عانا 3 بازار ورتەنىپ, شىققان شىعىننىڭ ۇشتىعىنا جەتە الماي وتىرعاندا, قالا ۇستىنە قارا ءتۇتىن تاعى دا قاپتادى.
«باراحولكاداعى» كەزەكتى ءورت تۋرالى حابار قالالىق ىشكى ىستەر باسقارماسى قىزمەتىنە تاڭعى ساعات 6-دان 15 مينۋت وتكەندە تۇسكەن ەكەن. بۇل جولى «قۇلاگەر» بازارىنداعى ساۋدا كونتەينەرلەرى مەن قويمالار قىزىل جالىنعا ورانعان.
رەسمي اقپارات بويىنشا بۇل جەردىڭ 3000 شارشى مەتر اۋماعى كۇلگە اينالىپ, الاپات ءورتتى سوندىرۋگە 41 ارنايى تەحنيكالىق قۇرال مەن جەكە قۇرامنىڭ 245 ءمۇشەسى قاتىسقان. سونىمەن قاتار, «قازاۆياكومەك» جشس كا-32 ماركالى تىكۇشاعى ارقىلى 33 توننا سۋ ءورت وشاعىنا اۋەدەن جاۋدىرىلعان. قالا باسشىسى احمەتجان ەسىموۆ تەز ارادا ورتتەن جاپا شەككەن ساۋداگەرلەردىڭ ناقتى ءتىزىمىن جاساۋدى اۋدان باسشىلارىنا جانە ءورتتىڭ شىعۋىن انىقتاۋدى ورتكە قارسى قىزمەتكە ارنايى تاپسىردى.
سونىمەن, تالاي تەحنيكا مەن ارنايى ماماندار جۇمىلدىرىلعان الاپات ءورت جەكسەنبى كۇنى تۇسكە سالىم اۋىزدىقتالعان سىڭايلى. كەي دەرەكتەردە 15 ساعات بويى باس بەرمەدى دەلىنگەن. جارايدى, ءبىزدىڭ ايتپاعىمىز ول ەمەس ەدى.
نەگە سوڭعى كەزدەرى «باراحولكاعا» ءورت ءۇيىر بولىپ كەتتى؟ جۋىردا عانا بولعان الاپات جالىندى دانەكەرلەۋ جۇمىستارىنان كورىپ ەدىك, ەندى مىنا ورتكە بازار كۇزەتشىلەرى كىنالانىپ وتىرعان سەكىلدى. الىپ-قاشتى اڭگىمە جەتەرلىك. دەسەك تە, بۇقارانىڭ ناپاقا تاۋىپ وتىرعان «كوزىنە» اينالعان جەردە جەرگىلىكتى باسقارۋ قىزمەتى مەن بازار قوجايىندارى ءالى كۇنگە «قىزىل سىزىققا» تالاسىپ جۇرگەن جايى بار.
قالاي بولعاندا دا بازار ورتەندى. ءبىراز جۇرت قىپ-قىزىل شىعىنعا باتتى. مۇنىڭ داۋى بىرازعا سوزىلىپ, مالى امان, قوراسى ءبۇتىن اعايىننىڭ ۇيقىسىن بۇزارى حاق.
سوندا دا, ءار كوكەيدە ءبىر سۇراق جۇرە بەرمەك...
«باراحولكانىڭ» ورتەنۋى نەگە باسىلماي تۇر؟!
قانات ەسكەندىر,
«ەگەمەن قازاقستان».
الماتى.