كايردە مىسىر ىشكى ىستەر مينيسترلىگى تەرروريستەرگە قارسى قۇرىلعان جاساقتىڭ وفيتسەرى وققا ۇشتى. بۇل تۋرالى يتار-تاسس حابارلادى.
جەرگىلىكتى باق وكىلدەرىنىڭ اقپارى بويىنشا, پودپولكوۆنيك مۋحاممەد مابرۋك مادينات-ناسر اۋدانىنداعى ءۇيىنىڭ جانىندا بەلگىسىز بىرەۋلەردىڭ قولىنان قازا تاپقان. شابۋىلداۋشىلار ونىڭ باسى مەن كوكىرەگىنە جەتى رەت وق اتىپ, ىزدەرىن جاسىرىپ ۇلگەرگەن. قازىرگى ۋاقىتتا ولاردى ىزدەستىرۋ شارالارى ءجۇرىپ جاتىر.
مۋحاممەد مابرۋكتىڭ ءىىم جانىنداعى ۇلتتىق قاۋىپسىزدىك باسقارماسىندا «مۇسىلمان باۋىرلار» قۇرىلىمىنىڭ ءىسىن جۇرگىزگەنى بەلگىلى بولدى. ول نەگىزىندە 2011 جىلدىڭ 25 قاڭتارىندا بولعان كوتەرىلىس كەزىندە ۆادي-ەن-ناترۋن تۇرمەسىنەن يسلاميستەردىڭ جاپپاي قاشۋ وقيعاسى بويىنشا تەرگەۋ جۇمىستارىن جۇرگىزگەن. سونداي-اق ول مۋحاممەد ءمۋرسيدىڭ قىزمەتىنەن شەتتەتىلۋىنەن كەيىن بىردەن كوبەيىپ كەتكەن راديكالدى توپتاردىڭ مونيتورينگىمەن اينالىسقان.
ايدار ورىسباەۆ.