مەملەكەت باسشىسى قاسىم-جومارت توقاەۆ ۇلتتىق قوعامدىق سەنىم كەڭەسىنىڭ ءتورتىنشى وتىرىسىندا روتاتسيانىڭ نەگىزگى ماقساتىن ءتۇسىندىردى, دەپ حابارلايدى Egemen.kz.
"ۇلتتىق قوعامدىق سەنىم كەڭەسى قوعام وكىلدەرى مەن ساراپشىلاردىڭ جابىق كلۋبى ەمەس. بۇل ۇدايى جاڭارىپ وتىراتىن اشىق ديالوگ الاڭى. مۇندا ءتۇرلى ۇستانىم مەن كوزقاراس تۇرعىسىنان سان الۋان پىكىرلەر ايتىلادى. روتاتسيانىڭ نەگىزگى ماقساتى دا وسى. ۇلتتىق كەڭەستە باتۋاعا كەلۋ قاعيداتى مەن وتكىر ماسەلەلەرگە دەگەن سىندارلى كوزقاراس ورنىققان. بۇل ءبىزدىڭ قوعامداعى ءوزارا پىكىر الماسۋ مادەنيەتىنىڭ ايقىن كورسەتكىشى ءارى ەلىمىزدىڭ تۇراقتى دامۋىنىڭ ماڭىزدى فاكتورى دەپ سانايمىن", دەدى پرەزيدەنت.
ونىڭ ايتۋىنشا, ىندەتتەن تۋىنداعان داعدارىس پەن الەمدەگى كۇردەلى احۋال كەزىندە ەلىمىزدىڭ ودان ءارى قارقىندى دامۋى ءۇشىن جاڭا ءتاسىل, تىڭ سەرپىن قاجەت.
"بيىلعى جولداۋىمدا مەن بارلىق ماسەلەنى اشىق ايتىپ, ونى شەشۋدىڭ ناقتى جولدارىن ۇسىندىم. مەملەكەتتىك باسقارۋدىڭ تيىمدىلىگىن كۇشەيتۋ يدەياسى جولداۋدىڭ نەگىزگى وزەگىندە تۇرعان ماسەلە. جالپى مەملەكەتتىك باسقارۋ جۇيەسىن رەفورمالاۋ ءوز الدىنا كەڭ اۋقىمدى مىندەت. ءتىپتى, بۇل بارلىق رەفورمالاردىڭ قاينار كوزى. مەملەكەتتى جاڭعىرتۋدىڭ باستى ارقاۋى دەسەك ارتىق ەمەس. ءبىز بۇل رەفورمانى مەملەكەتتىك جوسپارلاۋ جۇيەسىن قايتا قۇرۋ ىسىنەن باستاۋدى ۇيعاردىق", دەدى مەملەكەت باسشىسى.