كەشە قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆتىڭ توراعالىعىمەن ونلاين فورماتتا 2020 جىلعى قازاقستان رەسپۋبليكاسىنىڭ اباي اتىنداعى ادەبيەت پەن ونەر سالاسىنداعى مەملەكەتتىك سىيلىعىن بەرۋ جونىندەگى كوميسسيانىڭ قورىتىندى وتىرىسى ءوتتى.
كوميسسيا مۇشەلەرىمەن ادەبيەت, كينو, تەاتر, مۋزىكا, ساۋلەت جانە بەينەلەۋ ونەرى سالالارى بويىنشا اتالعان مەملەكەتتىك سىيلىقتىڭ ەكىنشى كەزەڭىنە وتكەن 11 جۇمىس قارالدى.
وتاندىق شىعارماشىلىق زيالى قاۋىمنان قۇرىلعان كوميسسيا مۇشەلەرى كونكۋرستىڭ ەكىنشى كەزەڭىنە وتكەن شىعارمالاردىڭ قوعامدا تالقىلانۋ بارىسى جونىندەگى مادەنيەت جانە سپورت ءمينيسترى ا.رايىمقۇلوۆانىڭ اقپاراتىن تىڭدادى.
كوميسسيا جاسىرىن داۋىس بەرۋ ارقىلى مەملەكەت باسشىسىنىڭ قاراۋىنا ۇسىنىلاتىن 2020 جىلعى قازاقستان رەسپۋبليكاسىنىڭ اباي اتىنداعى ادەبيەت پەن ونەر سالاسىنداعى مەملەكەتتىك سىيلىعى لاۋرەاتتىعىنا ۇمىتكەرلەردى انىقتادى.
ءداستۇر بويىنشا مەملەكەتتىك سىيلىق لاۋرەاتتارىن ماراپاتتاۋ تاۋەلسىزدىك كۇنى قارساڭىندا وتەدى, دەپ حابارلادى پرەزيدەنتتىڭ ءباسپاسوز قىزمەتى.