قوستاناي وبلىسى پوليتسيا دەپارتامەنتىنىڭ قىزمەتكەرى, اعا لەيتەنانت كيرا گارتمان ەكى تىلدە ەركىن سويلەيدى. ۇلى ابايدىڭ ءبىرسىپىرا ولەڭدەرى مەن قارا سوزدەرىن دە مۇدىرمەي, ناقىشىنا كەلتىرىپ جاتقا وقيدى. ءوزىنىڭ ايتۋىنشا, ءتىلىن ورىسشا اشقان كىشكەنتاي كيرا كەيىن مەملەكەتتىك تىلگە دەن قويىپ, تەلەارنالاردان قازاق تىلىندەگى فيلمدەر مەن كونتسەرتتىك باعدارلامالاردى تاماشالاۋدى ادەتكە اينالدىرعان.
– العاش ابايدىڭ «جەلسىز تۇندە جارىق اي» ءانىن جاتتاپ الىپ, وتباسى قۋانىشتارىندا اتا-اناما, ۇيگە كەلگەن قوناقتارعا ايتىپ بەرىپ ءجۇردىم. وندايدا ۇلكەندەر قىزىق كورىپ, كوتەرمەلەپ, قولپاشتاپ, ماقتاۋ-ماراپاتتارىن ايامايتىن. اكەم, ءتىپتى «مەنىڭ قىزىم قازاقتىڭ اتاقتى ءانشىسى بولادى» دەپ قيالىما قانات بىتىرەتىن, – دەيدى پوليتسيا اعا لەيتەنانتى.
كيرا كەيىن قوستاناي قالاسىنداعى «وزات» مەكتەبىندە وقيدى. مەكتەپ قابىرعاسىندا ءجۇرىپ ۇستازدارىنىڭ ىقپالىمەن اباي ليريكاسىن جاتتاپ, كوركەمسوز سايىستارىنا قاتىسىپ, جۇلدەلى ورىنداردان كورىنىپ ءجۇردى. مەكتەپتى تامامداعان سوڭ ارمان قۋىپ الماتىعا بارىپ, جولى بولىپ ءوزى قالاعان ماماندىق بويىنشا م.ەسبولاتوۆ اتىنداعى الماتى اكادەمياسىنا وقۋعا تۇسەدى. 2019 جىلدان بەرى وبلىستىق پوليتسيا دەپارتامەنتىنىڭ اقپاراتتاندىرۋ جانە بايلانىس باسقارماسىندا ينجەنەر بولىپ جۇمىس ىستەيدى.
قازىر پوليتسەي قىز وبلىستىق ء«تىلدارىن» ورتالىعىنداعى مەملەكەتتىك ءتىلدى تەرەڭدەتىپ وقىتۋ كۋرسىندا لاتىن ءالىپبيىن ۇيرەنىپ ءجۇر. اباي ولەڭدەرىمەن سۋسىنداپ وسكەن ك.گارتمان تاياۋدا «مەملەكەتتىك ءتىل – تاۋەلسىزدىك سيمۆولى» اتتى رەسپۋبليكالىق بايقاۋعا قاتىسىپ, جۇلدەلى ەكىنشى ورىندى يەلەندى. مادەنيەت جانە سپورت مينيسترلىگىنىڭ ۇيىمداستىرۋىمەن ونلاين رەجىمدە وتكەن ءتىل بايقاۋىندا رەسپۋبليكانىڭ ءار وڭىرىندە مەملەكەتتىك قىزمەت سالاسىندا ەڭبەك ەتىپ جۇرگەن 20 شاقتى وزگە ۇلت دياسپورى سىنعا ءتۇسىپتى.
– بۇل بايقاۋعا قاتىسۋعا ء«تىل-دارىن» ورتالىعىنداعى ۇستازدارىمنىڭ كەڭەسى بويىنشا ءوتىنىش بەردىم. ونلاين-كونكۋرس ەكى كەزەڭنەن تۇردى. ءبىرىنشى تۋردا ءوزىم تۋرالى قىسقاشا بەينەبايان جاسادىم. ونىڭ ىشىندە ءوزىم, اتا-انام, وتباسىم, تۋعان جەرىم, ءبىلىم العان مەكتەبىم, جۇمىس ورنىم تۋرالى مالىمەتتەر قامتىلدى. ودان كەيىن اۋىرتپالىعى مول پوليتسيا قىزمەتىنىڭ ەرەكشەلىگى مەن قىزمەت بارىسىندا ءوزىمنىڭ كۇندەلىكتى اتقاراتىن مىندەتىم جايلى اۋىزشا اڭگىمەلەپ بەردىم. ءوزىم جاتقا بىلەتىن اباي ولەڭدەرىن مانەرلەپ وقىدىم. ەكىنشى تۋر تىكەلەي ەفيردە ءوتتى. بۇل كەزەڭدە قازىلار القاسى قويعان ساۋالدارعا جاۋاپ بەرىپ, ەلىمىزدىڭ تاۋەلسىزدىك جىلدارىنداعى جەتىستىكتەرى تۋرالى بايان ەتتىم. كونكۋرسقا قاتىسقان ارىپتەستەرىمنىڭ وسالى جوق. دەگەنمەن جولىم بولىپ, قازىلار القاسىنىڭ شەشىمىمەن ەكىنشى ورىنعا ىلىكتىم. جالپى, مەنىڭ ومىرلىك جولىمدى اشقان – اباي قۇنانباي ۇلىنىڭ شىعارماشىلىعى. اباي ولەڭدەرى قارشاداي كەزىمنەن رۋحاني سەرىگىمە اينالدى. سودان بەرى مەن ابايدى ىزدەپ كەلەمىن. ۇلى اقىننىڭ قاي شىعارماسىن وقىسام دا, اۆتوردى كوز الدىما ەلەستەتىپ, دۇنيەگە اباي كوزىمەن قاراپ كورۋگە تىرىسامىن. ادام ابايدى قايتالاپ وقۋ ارقىلى عانا ءوزىن ءوزى جىعا تاني تۇسەدى. سونىڭ ناتيجەسىندە تالاي بەلەستى باعىندىرىپ, بيىك مۇراتتارعا ۇمتىلىپ كەلەمىن, – دەدى بايقاۋ جۇلدەگەرى.
كيرا گارتمان بيىل ابايدىڭ 175 جىلدىعىنا ارنالعان چەللەندجگە قاتىسىپ, ۇلى اقىننىڭ مۇراسىن وزگە ۇلت وكىلدەرىنە ناسيحاتتاۋ شارالارىنا دا بەلسەندى اتسالىستى.
قوستاناي وبلىسى