كوكتەمدە ىندەت باسا-كوكتەپ ەنگەن ساتتە قاپىدا قالعانىمىز جاسىرىن ەمەس. اۋا تولتىرىلعان ىدىستاردى تاسىپ ۇلگەرە الماي, اكەلگەنى جانۇشىرا قينالىپ جاتقان ناۋقاستارعا جەتپەي سابىلعانىمىز ەستە. ماڭعىستاۋ وبلىستىق دەنساۋلىق ساقتاۋ باسقارماسى باسشىلىعىنىڭ ۇيىمداستىرۋىمەن قيىن جاعداي قايتالانا قالعان جاعدايدا وسى ولقىلىقتاردى بولدىرماۋ باعىتىنداعى جۇمىستار جۇرگىزىلۋدە.
جاڭاوزەن قالاسىندا, بەينەۋ, قاراقيا, تۇپقاراعان اۋداندارىندا, شەتپە, بورانقۇل, جەتىباي اۋىلدارىندا, سونداي-اق وبلىستىق جۇقپالى بالالار اۋرۋحاناسىندا وتتەكتى گازداندىرۋ جۇمىستارى اتقارىلدى. ماڭعىستاۋدا سالىنىپ جاتقان ءمودۋلدى ستاتسيونار مەن وبلىستىق اۋرۋحانا عيماراتىندا دا اتالعان جوبا جۇزەگە اسىرىلادى.
جۋىردا قاراقيا اۋدانىنىڭ قۇرىق اۋىلىندا وتتەكتى گازداندىرۋ ستانساسى بوي كوتەرگەن بولاتىن. قاراقيا اۋداندىق ورتالىق اۋرۋحانا ديرەكتورى گۇلشارا بەگنيازوۆانىڭ ايتۋىنشا, مەردىگەر مەكەمە اۋرۋحانا جانىنان بوي كوتەرگەن وتتەكتى گازداندىرۋ ستانساسىنىڭ قۇرىلىسىن ون كۇندە اياقتادى. مۇندا 5 بولىمشە بار جانە ءار توسەك-ورىنعا وتتەگى جەتكىزۋ قامتاماسىز ەتىلدى. ونىڭ ىشىندە تەراپيا بولىمشەسىنە – 14, حيرۋرگيا بولىمشەسىنە – 8, بالالارعا ارنالعان بولىمشەگە – 8, ايەلدەردى بوساندىرۋ بولىمشەسىنە – 8, جۇقپالى اۋرۋلار بولىمشەسىنە 12 دانا وتتەگى جەتكىزۋ نىساندارى جاسالدى. سونىمەن قاتار جەتىباي اۋىلدىق اۋرۋحاناسىنىڭ جانىنان دا وسىنداي وتتەكتى-گازداندىرۋ ستانساسىنىڭ قۇرىلىسى باستالدى. وبلىستىق دەنساۋلىق ساقتاۋ باسقارماسىنان بولىنگەن قاراجات ەسەبىنەن سالىنعان بۇل ستانسا ىندەتكە شالدىققان, تىنىس الۋى قيىنداعان ناۋقاستاردى ەمدەۋدە الاتىن ورنى ەرەكشە بولماق, – دەيدى گ.بەگنيازوۆا.
ءاربىر تىنىس الۋى قيىنداعان ناۋقاستى توسەك-ورىننىڭ جانىنان قابىرعاعا ورناتىلعان اپپاراتقا تىكەلەي قوسۋ ارقىلى ونىڭ ومىرىنە اراشا بولۋعا مۇمكىندىك بار. وتتەكتى گازداندىرۋ باعىتىنداعى جۇمىستار قيىن جاعدايدا اۋادان تارىقپاۋعا مۇمكىندىك بەرەدى دەپ ويلايمىز.
ماڭعىستاۋ وبلىسى