ساۋدا جانە ينتەگراتسيا ءمينيسترى ب.سۇلتانوۆ شۆەيتسارياعا جۇمىس ساپارىمەن بارىپ, شۆەيتساريانىڭ ەكونوميكا جونىندەگى مەملەكەتتىك حاتشىلىعىمەن جانە شۆەيتساريا بيزنەسى وكىلدەرىمەن كەلىسسوزدەر جۇرگىزدى.
15 قازاندا ساۋدا كەلىسىمدەرى جونىندەگى فەدەرالدى كەڭەستىڭ ۋاكىلەتتى وكىلدەرى ەرۆين بوللينگەر جانە ماركۋس شلاگەنحوفپەن ەكى ەلدىڭ ساۋدا-ەكونوميكالىق قاتىناستارىن دامىتۋ جانە ولاردىڭ كوپجاقتى پلاتفورمالارداعى ءوزارا ءىس-قيمىلدارىنا قاتىستى كەزدەسۋ ءوتتى.
ب.سۇلتانوۆ پەن ە.بوللينگەر ساۋدا-ەكونوميكالىق ىنتىماقتاستىق جونىندەگى قازاقستان-شۆەيتساريا ۇكىمەتارالىق كوميسسياسىنىڭ تەڭ توراعالارى بولا وتىرىپ, قول جەتكىزىلگەن ۋاعدالاستىقتاردى ىسكە اسىرۋ بويىنشا جۇمىستاردىڭ بارىسىن تالقىلاپ, ولاردى ءىس جۇزىندە جۇزەگە اسىرۋدىڭ الداعى جوسپارلارىن بەلگىلەدى. پاندەميانىڭ سالدارى قازاقستان مەن شۆەيتساريا اراسىنداعى ساۋدا-ەكونوميكالىق قاتىناستاردا دا كورىنىس تاۋىپ, ىسكەرلىك بەلسەندىلىكتىڭ تومەندەۋىنە سەبەپ بولعانى اتاپ ءوتىلدى. قازىرگى ۋاقىتتا ەكى تاراپتىڭ كۇش-جىگەرى شيكىزاتتىق ەمەس تاۋارلاردىڭ ەكىجاقتى ساۋدانى ساپالى كەڭەيتۋگە جانە بىرلەسكەن جوبالاردى جاساۋعا باعىتتالعان.
كوپجاقتى تاقىرىپتار بويىنشا بەلسەندى پىكىر الماسۋ كەزىندە شۆەيتساريالىق تاراپ حالىقارالىق ۇيىمدار شەڭبەرىندە قازاقستانمەن ءوزارا ارەكەتتەسۋ دەڭگەيىن جوعارى باعالادى. اتاپ ايتقاندا, كوپجاقتى ساۋداعا جاۋاپ بەرەتىن م.شلاگەرحوفپەن قازاقستاندىق مينيستر دسۇ-نىڭ دامۋ تەندەنتسيالارىن جانە پاندەميانىڭ سالدارى مەن پروتەكتسيونيستىك سەزىمدەردىڭ وسۋىمەن قيىنداتىلعان قازىرگى جاعدايداعى ۇيىمنىڭ جاھاندىق پلاتفورما رەتىندەگى ءرولىن تالقىلادى. 2021 جىلى دسۇ ەلدەرىنىڭ 12-ءشى مينيسترلىك كونفەرەنتسياسىن وتكىزۋگە قازاقستاننىڭ دايىندىعىن راستاي وتىرىپ, ب.سۇلتانوۆ نۇر-سۇلتاندا فەدەرالدىق پرەزيدەنت باستاعان شۆەيتساريالىق دەلەگاتسيانى قابىلداۋعا قۋاناتىنىن اتاپ ءوتتى.
ب.سۇلتانوۆ Bucher Industries حولدينگىنىڭ كەڭەسىن قوسا باسقاراتىن, economiesuisse شۆەيتساريا كاسىپكەرلەر قاۋىمداستىعى سىرتقى ەكونوميكالىق كوميسسياسىنىڭ پرەزيدەنتى فيليپپ موزيماننعا قازاقستان ەكونوميكاسىنىڭ باسىم سەكتورلارىنىڭ دامۋىنا ساراپتامالىق تالداۋ جاساۋ نەگىزىندە ىسكەرلىك بايلانىستاردى دامىتۋدى ۇسىندى. شۆەيتساريالىق ونەركاسىپشى بۇل يدەيانى قولداپ, ىنتىماقتاستىققا دايىن ەكەنىن راستادى.
16 قازاندا شۆەيتساريالىق Militzer & Münch International لوگيستيكالىق حولدينگىنىڭ باسشىلىعىمەن كەلىسسوزدەر ءوتتى. اتالعان كومپانيانىڭ نەگىزگى نارىقتارى – ەۋرازيا مەن تاياۋ شىعىس ەلدەرى. ءىس جۇزىندە كومپانيا ء«بىر بەلدەۋ – ءبىر جول» ترانسكونتينەنتالدىق كولىك جوباسىنىڭ اۋقىمدى الەۋەتىن ىسكە اسىرادى. شۆەيتساريا بيزنەسى وسى جوبانىڭ كەلەشەگىن كورىپ, ونى جۇزەگە اسىرۋعا قاتىسۋعا ۇلكەن قىزىعۋشىلىق تانىتىپ وتىر. نوۋ-حاۋ مەن يننوۆاتسيانىڭ ناتيجەسىندە شۆەيتساريا كاسىپورىندارى ماڭىزدى ءرول اتقارسا, قازاقستان بۇل تۇرعىدا جان-جاقتى قولداۋ مەن وڭتايلى جاعداي ۇسىنۋعا دايىن.
ساپار سوڭىندا ب.سۇلتانوۆ پورشەندى كومپرەسسورلار ءوندىرىسى بويىنشا الەمدەگى كوشباسشى Burckhardt Compression كاسىپورنىندا بولدى. كومپانيانىڭ باس ديرەكتورى مارسەل پاۆليچەك «شۆەيتساريا-تمد» بىرلەسكەن ساۋدا پالاتاسىنىڭ دا پرەزيدەنتى ەكەنىن ايتا كەتكەن ءجون. ول كومپانيا ءۇشىن قازاقستاندىق نارىقتىڭ, اسىرەسە قازاقستاننىڭ ەاەو-عا قاتىسۋى جاعدايىنداعى ماڭىزدىلىعىن اتاپ ءوتتى. سونداي-اق تاراپتار ساراپشىلاردىڭ تۇجىرىمدارىن باسشىلىققا الىپ, قازاقستاندىق ەكونوميكانىڭ باسىم سەكتورلارىنىڭ الەۋەتىن ءىس جۇزىندە جۇزەگە اسىرۋعا نازار اۋدارۋعا كەلىستى.