ماڭعىستاۋ وبلىسىندا سوڭعى كۇندەرى اتى دا, الەگى دە جامان ىندەتپەن اۋىرعاندار كەزدەسۋدە. بۇل وڭىردە كارانتين شارالارىن ەنگىزۋگە ءمۇجبۇر ەتتى. ماڭعىستاۋ وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى عازيز نادۋەۆتىڭ ايتۋىنشا, ىندەت ىندەگەن جاعدايدا كارانتين تالاپتارى كۇشەيتىلمەك.
وڭىردە ناۋرىز ايىندا باستالىپ, جاز باستالا بەرە شارىقتاپ الا جونەلگەن COVID-19 ۆيرۋسىن جۇقتىرۋشىلاردىڭ بيىل 27 ناۋرىز بەن 12 قازان ارالىعىندا شاعىممەن, شاعىمسىزى ارالاس 3 362 جاعدايى تىركەلگەن بولاتىن. 72 ناۋقاس كوروناۆيرۋس ينفەكتسياسىنان قايتىس بولسا, 3267 ادام ەمدەلىپ شىقتى.
– كوروناۆيرۋس ينفەكتسياسىمەن اۋىرعانداردىڭ ىشىنەن سىرتتان اكەلگەندەر – 6 جاعداي, جەرگىلىكتى 870 جاعداي تىركەلدى. 647 ادام وزدەرى قارالسا, 223 ناۋقاس سكرينينگ ارقىلى انىقتالدى, ال جۇقتىرعاندارمەن قارىم-قاتىناستا بولعاندار – 271 جاعداي. ينفەكتسيا جۇقتىرعانداردى قىزمەتىنە, جاسىنا قاراي سارالايتىن بولساق, ولاردىڭ ىشىندە مەديتسينا قىزمەتكەرلەرى – 74, مۇگەدەكتەر – 9, جۇمىسسىزدار – 285, وقۋشىلار – 43, زەينەتكەرلەر – 261, اسكەري بولىمدەردەن – 18, كەن ورنىنداعى «كاسپيان فۋد» تاماقتاندىرۋ مەكەمەسىنەن – 9, اسكەرگە شاقىرىلعانداردان – 4, «تەڭىزشەۆرويل» قىزمەتكەرلەرى – 35, وندىرىستىك مەكەمەدە – 130, مەملەكەتتىك قىزمەتكەرلەر – 24, ستۋدەنتتەر – 21, تاعى باسقالار – 167, بالاباقشا قىزمەتكەرلەرى مەن مۇعالىمدەر – 23, ىشكى ىستەر قىزمەتكەرلەرى – 10, – دەدى ع.نادۋەۆ.
ماڭعىستاۋ وبلىسىندا 2020 جىلدىڭ 13 قازانىنا دەيىن پتر تاسىلىمەن مەملەكەتتىك جانە جەكە مەنشىك زەرتحانالاردا بارلىعى 120 756 ادام تەكسەرىلىپ, ونىڭ ىشىندە 3 362 پاتسيەنت وڭ ناتيجە بەردى. ۇلتتىق ساراپتاما ورتالىعىندا بۇگىنگى تاڭدا 15 مىڭنان استام تەست سىناماسى بار.
ىندەتتىڭ وتكىر جۇقپالىلىعى مەن تارالۋ جىلدامدىعى سەبەپتى تۇرعىندارعا جيىن-تويدى ازايتۋ, ساقتانۋ شارالارىن ۇستانۋ تۋرالى ەسكەرتىلگەنىمەن, بۇل تەك ماڭعىستاۋ ەمەس, بارشا قازاقستاندىقتار ءۇشىن ورىندالۋى قيىن جاعداي بولىپ وتىر. سانالى تۇردە ساقتاۋ-ساقتانۋ شارالارى مەن ءتارتىپ-تالابى ورىندالماعاندىقتان, ءتارتىپتى قاداعالاۋدىڭ ءوزى ۇلكەن كۇشتى تالاپ ەتۋدە.
وسى ورايدا وڭىردە تامىز ايىنان باستاپ 24 مونيتورينگ توبى قۇرىلىپ, بۇگىنگى تاڭدا بۇل توپ 560 رەيدتىك جۇمىس جۇرگىزگەن. رەيد بارىسىندا 110 كاسىپكەرلىك نىسانىندا بۇزۋشىلىقتار انىقتالىپ, ونىڭ 110-ىنا تۇسىنىك جۇمىستارى جۇرگىزىلىپ, 8 جەكە كاسىپكەر مەن 33 جەكە تۇلعاعا اكىمشىلىك حاتتامالار تولتىرىلعان.
«تارتىپكە باس يگەن قۇل بولمايدى» دەپ باۋىرجان مومىش ۇلى ايتقانداي, ءالى دە ىندەتتەن ساقتانۋ شارالارىن اركىم وزىنەن, وتباسىنان باستاپ قولعا السا, اۋىرتپالىقتان جەڭىل شىعۋىمىزعا سەپ بولار ەدى.
ماڭعىستاۋ وبلىسى