بۇگىن ءماجىلىس سپيكەرى نۇرلان نىعماتۋليننىڭ توراعالىمەن جالپى وتىرىس ءوتتى. وندا دەپۋتاتتاردىڭ باستاماسىمەن ازىرلەنگەن قارىزدىق ەڭبەكتى رەتتەۋگە قاتىستى زاڭ جوباسى ءبىرىنشى وقىلىمدا ماقۇلداندى, دەپ حابارلايدى Egemen.kz پارلامەنت ءماجىلىسىنىڭ ءباسپاسوز قىزمەتىنە سىلتەمە جاساپ.
قۇجات قارىزدىق ەڭبەك سالاسىندا ەڭبەك ەتۋشى ازاماتتاردى الەۋمەتتىك قورعاۋعا, سونداي-اق جۇمىس بەرۋشىلەر تاراپىنان ولاردىڭ ەڭبەك ءۇشىن سىياقى الۋ قۇقىعى ساقتالۋىن, ەڭبەك جاعدايلارىن قاۋىپسىزدىك جانە گيگيەنا تالاپتارىنا سايكەس قامتاماسىز ەتۋگە باعىتتالعان.
زاڭ جوباسىن تالقىلاۋ بارىسىندا ءماجىلىس توراعاسى نۇرلان نىعماتۋلين: قاي كەزەڭدە دە ەڭبەك ماسەلەسى وتە ماڭىزدى. سوندىقتان بۇل سالانى ارقاشاندا زاڭ دەڭگەيىندە قورعاۋ ءۇشىن دەر كەزىندە ناقتى قادامدار جاسالىپ كەلەدى. سونىڭ ءبىرى بۇگىنگى ءبىز ماقۇلداعان زاڭ جوباسى. وسى قۇجاتتا قارىزدىق ەڭبەكتى رەتتەۋ دەگەن نورمالار ەنگىزىلدى. بۇل ازاماتتاردى جۇمىسپەن قامتۋ جانە ولاردىڭ الەۋمەتتىك جاعدايىن ساقتاۋ جولىندا تاعى ءبىر جاڭا مۇمكىندىك دەۋگە بولادى, - دەدى.
سونىمەن قاتار وسى ەڭبەك كودەكسىندە قابىلداۋشى جانە جىبەرۋشى تاراپتار جۇمىسكەرىنىڭ قۇقىقتارى مەن مىندەتتەرى ەسكەرىلگەن. ماسەلەن, قابىلداۋشى تاراپ جۇمىسكەرلەرىنىڭ نەگىزگى جالاقىسىنان تومەن ەمەس جالاقى مولشەرىن رەتتەيتىن نورمالارمەن تولىقتىرۋ ۇسىنىلعان.
سونداي-اق, قارىزدىق جۇمىسكەردىڭ ەڭبەك قىزمەتى ۋاقىتىنداعى جازاتايىم وقيعالار كەزىندەگى تەرگەپ-تەكسەرۋ ءتارتىبىن جانە پەرسونالدى بەرۋ جونىندەگى قىزمەتتەردى كورسەتۋ بويىنشا قىزمەتتى جۇزەگە اسىرۋ ءتارتىبىن رەتتەيتىن نورمالار قاراستىرىلعان.