تۇركىستاندا كۇزگى ەگىن جيناۋ ناۋقانى قورىتىلاندى

بيىلعى كارانتيندىك شارالارعا قاراماستان, وڭىردە اگروونەركاسىپ كەشەنىندە تۇراقتى ءوسىم ساقتالىپ, كوكتەمگى جانە كۇزگى دالا جۇمىستارى ءوز مەرزىمىندە اتقارىلدى.

ەگىس كولەمى 17 مىڭ گەكتارعا ارتىپ, 846 مىڭ گەكتارعا جەتتى. ماساقتى داقىلداردان 513 مىڭ توننا ءونىم جينالىپ, 64 مىڭ تونناعا, كوكونىس, كارتوپ, باقشا ونىمدەرىنەن 3 ملن توننا ءونىم جينالىپ, 400 مىڭ تونناعا ارتتى. مال ازىقتىق داقىلداردان 3,9 ملن توننا ءونىم جينالىپ, 1,5 جىلدىق مال ازىعى قورى جيناقتالدى. ماقتا داقىلى 126 مىڭ گەكتار القاپقا ەگىلىپ, 331 مىڭ توننا ءشيتتى ماقتا جيناۋ بولجانىپ وتىر. بۇگىنگى كۇندە «اق التىننىڭ» 30 پايىزى جينالدى. بۇل دەرەكتەر قازىعۇرت اۋدانى, «شاربۇلاق» اۋىلدىق وكرۋگىندە وتكەن دالالىق سەمينار بارىسىندا كەلتىرىلدى.

وبلىس اكىمى ومىرزاق شوكەەۆ, اگروبيزنەس وكىلدەرى, اۋدان, قالا اكىمدەرى مەن شارۋالار قاتىسقان سەميناردا جاڭادان قولعا الىنعان نولدىك وڭدەۋ جۇيەسى تالقىلانعان بولاتىن. ءتالىمى جەردى پارعا قالدىرماي, تىكەلەي سەبۋ تەحنولوگياسىن ەندىرۋ تۇركىستان وبلىسىندا اگروونەركاسىپ كەشەنىن دامىتۋدىڭ ءتورتىنشى باعىتى بولىپ ايقىندالدى. تىكەلەي ەگۋ تەحنولوگياسى توپىراقتى ەروزياعا ۇشىراۋدان ساقتايدى, قۇنارلىعىن ارتتىرادى. سەمينار بارىسىندا ماماندار ءسۇر تاناپقا قالدىرىلعان جەرلەردىڭ ءار گەكتارىنان ورتاشا 90 مىڭ تەڭگە تابىس الىناتىنىن ايتتى. ياعني, وبلىستا ءسۇر تاناپقا قالدىرىلاتىن 57 مىڭ گەكتار القاپتان قوسىمشا جىل سايىن 5,1 ملرد تەڭگەنىڭ ءونىمى وندىرىلەدى دەگەن ءسوز. سونداي-اق, تىكەلەي ەگۋدىڭ ناتيجەسىندە شارۋالار ءار گەكتاردان 24 مىڭ تەڭگە قارجىسىن ۇنەمدەيدى.تۇركىستان وبلىسى