بۇگىن قر پرەمەر-ءمينيسترىنىڭ ورىنباسارى ە. توعجانوۆتىڭ توراعالىعىمەن وتكەن ۆەدومستۆوارالىق كوميسسيانىڭ وتىرىسىندا مەملەكەت باسشىسى ق. توقاەۆتىڭ كوروناۆيرۋس پاندەمياسىنىڭ ەكىنشى تولقىنىنا دايىندىق ماسەلەلەرى جونىندەگى ءۇ. ج. 7 قازانداعى كەڭەستە بەرگەن تاپسىرمالارىن ورىنداۋ بويىنشا ناقتى شارالار ازىرلەندى, دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
«كەشە قاسىم-جومارت كەمەل ۇلى كوز جۇمعان 182 مەديتسينا قىزمەتكەرىنىڭ وتباسىلارىنا, سونداي-اق قىزمەت اتقارۋ كەزىندە COVID-19-بەن اۋىرعان دارىگەرلەرگە وتەماقى تولەۋ بويىنشا جەدەل شارالار قابىلداۋدى تاپسىردى. وسىعان بايلانىستى وڭىرلەردىڭ اكىمدىكتەرىنە, دەنساۋلىق ساقتاۋ, ەڭبەك جانە حالىقتى الەۋمەتتىك قورعاۋ مينيسترلىكتەرىنە مەديتسينا قىزمەتكەرلەرىنىڭ قايتىس بولۋ فاكتىسى بويىنشا وتەماقى تولەۋدى ۇستىمىزدەگى جىلدىڭ 13 قازانىندا اياقتاۋدى تاپسىرامىن. سونداي-اق اعىمداعى جىلعى 17 قازاندا وڭىرلىك كوميسسيالاردا وتىنىمدەرى قارالعان كاسىبي قىزمەتتى جۇزەگە اسىرۋ كەزىندە اۋىرعان دارىگەرلەرگە وتەماقى تاعايىنداۋدى اياقتاۋدى قامتاماسىز ەتۋ قاجەت», – دەدى ە. توعجانوۆ.
مەملەكەت باسشىسىنىڭ تاپسىرماسىن ورىنداۋ ماقساتىندا ۆەدومستۆوارالىق كوميسسيا مەملەكەتتىك ورگاندارمەن, «اتامەكەن» ۇكپ-مەن جانە وتاندىق تاۋار وندىرۋشىلەرمەن تالقىلاۋ قورىتىندىسى بويىنشا قورعانىش ماسكالارىنا 40 تەڭگە, ءبىر رەتتىك مەديتسينالىق ماسكالارعا 60 تەڭگە مولشەرىندە شەكتى بولشەك ساۋدا باعاسىن بەلگىلەدى.
سونداي-اق, ە. توعجانوۆ جاۋاپتى مەملەكەتتىك ورگاندارعا بيزنەس-قوعامداستىقپەن, سالالىق قاۋىمداستىقتارمەن بىرلەسىپ, حالىققا قىزمەتتىڭ قولجەتىمدىلىگىن ارتتىرۋ ءۇشىن ءۇش كۇندىك مەرزىمدە پتر تەستىلەۋ باعاسىن تومەندەتۋ ماسەلەسىن پىسىقتاپ, ۆەدومستۆوارالىق كوميسسيانىڭ كەلەسى وتىرىسىنا كەلىسىلگەن ۇسىنىستاردى شىعارۋدى تاپسىردى.
سونىمەن قاتار, پرەمەر-ءمينيستردىڭ ورىنباسارى ءبىر اپتا مەرزىمدە وڭىرلەردە پتر تەستىلەۋدى بىركەلكى وتكىزۋدى قامتاماسىز ەتۋدى, كارانتيندىك رەجيمدى بۇزۋشىلىقتاردى, ونىڭ ىشىندە قر مەملەكەتتىك شەكاراسى ارقىلى وتكىزۋ پۋنكتتەرىندە, اۋەجايلاردا, تەمىرجول ۆوكزالدارىندا انىقتاۋ بويىنشا مونيتورينگ توپتارىنىڭ جۇمىسىنىڭ تيىمدىلىگىن ارتتىرۋدى تاپسىردى.
شىمكەنت قالاسى, اقمولا, اقتوبە جانە باتىس قازاقستان وبلىستارىنىڭ اكىمدىكتەرىنە تۇراقتاندىرۋ قورلارىنداعى دارىلىك زاتتار رەزەرۆىنىڭ كولەمىن ۇلعايتۋ تاپسىرىلدى. سونىمەن قاتار, كوروناۆيرۋس ينفەكتسياسىنىڭ تارالۋىنا جول بەرمەۋ جانە ينفەكتسيا وشاقتارىن ۋاقتىلى وقشاۋلاۋ ماقساتىندا ۆەدومستۆوارالىق كوميسسيا «Saqbol» ءموبيلدى قوسىمشاسىن ەنگىزۋدى ماقۇلدادى. قوسىمشا تەگىن, جەكە دەرەكتەردى تاراتپايدى, جۇقتىرعان ادامدارمەن بايلانىس تۋرالى ازاماتتاردى ۋاقتىلى حاباردار ەتۋگە مۇمكىندىك بەرەدى.
كەڭەس قورىتىندىسى بويىنشا پرەمەر-ءمينيستردىڭ ورىنباسارى بىرقاتار باسقا دا تاپسىرمالار بەردى.