«شەۆرون» كورپوراتسياسىنىڭ باستاماسىمەن COVID-19 ىندەتىمەن اۋىرعان ناۋقاستاردى ەمدەۋگە قاجەتتى ءدارى-دارمەكتىڭ ءبىرىنشى توپتاماسى الماتى قالاسىنا جەتكىزىلدى.
اتالعان كومپانيا بۇل مەديتسينالىق دارىلەردى دەنساۋلىق ساقتاۋ مينيسترلىگىنە كورسەتىلگەن گۋمانيتارلىق كومەك اياسىندا ساتىپ الىپ, جەتكىزدى.
– «شەۆرون» كومپانياسى ۇنەمى الەۋمەتتىك جاۋاپكەرشىلىك تانىتىپ, قازاقستانداعى وزەكتى ماسەلەلەرگە ەشقاشان بەيجاي قارامايدى. ەلىمىزگە كورسەتكەن گۋمانيتارلىق كومەك ءۇشىن, دارىلەر ءۇشىن كومپانياعا العىس ايتقىم كەلەدى. قازاقستانداعى كوروناۆيرۋس ينفەكتسياسى مەن پنەۆمونيانىڭ تارالۋىن وسىلايشا بىرىگىپ توقتاتا الامىز, – دەدى دەنساۋلىق ساقتاۋ ءمينيسترى الەكسەي تسوي.
«شەۆرون» كومپانياسىنىڭ ەۋرازيا بولىمشەسىنىڭ باسقارۋشى ديرەكتورى دجون بالتتس الماتى قالاسىنا ءدارى-دارمەكتەردىڭ ءبىرىنشى توپتاماسى كەلگەنىن قۋانىشپەن حابارلاپ, كومپانيا وسىنداي قايىرىمدىلىق جوباسىمەن قازاقستان حالقىنا كۇردەلى كەزەڭدە قولداۋ كورسەتكىسى كەلگەنىن مالىمدەدى. بۇل ءدارى-دارمەكتىڭ ءبارى ەمحانالار مەن اۋرۋحانالارداعى پاتسيەنتتەرگە جەتكىزىلەدى.
مەملەكەتتىڭ پاندەمياعا قارسى كۇرەسىنە كومەكتەسۋ ءۇشىن «شەۆرون» دەنساۋلىق ساقتاۋ مينيسترلىگىمەن بىرلەسە وتىرىپ, اسا قاجەتتى ءدارى-دارمەك ءتىزىمىن قۇردى. ءدارى-دارمەكتى جەتكىزۋمەن قاتار, بۇل باعدارلاما مەديتسينالىق جابدىقتى ساتىپ الۋعا جانە COVID-19 ىندەتىنە شالدىققان ادامداردى ەمدەيتىن دەنساۋلىق ساقتاۋ سالاسىنىڭ قىزمەتكەرلەرىن وقىتۋعا سەپتەسەدى.
ايتا كەتسەك, «شەۆرون» كورپوراتسياسى – الەمدەگى جەتەكشى بىرىكتىرىلگەن ەنەرگەتيكالىق كومپانيالاردىڭ ءبىرى. بۇكىل الەمدە بيزنەسىن جۇرگىزەتىن ەنشىلەس كومپانيالارى ارقىلى كومپانيا ەنەرگەتيكا سالاسىنىڭ بارلىق تۇرىنە قاتىسادى. «شەۆرون» شيكى مۇناي مەن تابيعي گازدى زەرتتەيدى, وندىرەدى جانە تاسىمالدايدى, كولىك وتىنى مەن جانارمايدى تازارتادى, نارىققا شىعارادى جانە تاراتادى; مۇناي-حيميالىق زاتتار مەن قوسپالاردى وندىرەدى; قۋات وندىرەدى جانە كومپانيا وپەراتسيالارىنىڭ بارلىق سالاسىنداعى بيزنەس قۇندىلىقتارىن ارتتىراتىن تەحنولوگيالاردى دايىندايدى جانە قولدانادى.