قازاقستاننىڭ دەپوزيتتەرگە كەپىلدىك بەرۋ قورى (قدكبق) تەڭگەلىك دەپوزيتتەر بويىنشا 2020 جىلدىڭ قاراشا ايىنا ۇسىنىلاتىن ەڭ جوعارى سىياقى مولشەرلەمەلەرىن بەكىتكەنىن حابارلادى.
قازان ايىنا ارنالعان مولشەرلەمەلەرمەن سالىستىرعاندا شەكتى مولشەرلەمەلەرگە قاتىستى وزگەرىستەر ۇزاق مەرزىمدى دەپوزيتتەر بويىنشا ورىن الدى. بۇل مولشەرلەمەلەر نارىقتاعى وزەرىستەرگە بايلانىستى ەسەپتەلەدى, ياعني ولاردىڭ جوعارىلۋىن نەمەسە تومەندەۋىن بانك سەكتورى قالىپتاستىرادى.
سونىمەن 12 جانە 24 ايعا شاقتالعان مەرزىمدى دەپوزيتتەر بويىنشا نارىقتىق مولشەرلەمەلەردىڭ تومەندەۋى ناتيجەسىندە ولار بويىنشا شەكتى مولشەرلەمەلەر سايكەسىنشە 0,4 جانە 0,1 پايىزدىق تارماققا ازايدى. تومەندەۋگە قاتىستى بۇل ءۇردىس بانكتەردىڭ ءدال وسى دەپوزيتتەرگە دەگەن قىزىعۋشىلىعىنىڭ تومەندىگىن كورسەتەدى. ويتكەنى جيناق دەپوزيتتەرمەن سالىستىرعاندا ولاردىڭ ۇتقىرلىعى جوعارى.
بۇل رەتتە پايىزدىق مارجانىڭ كارانتيندىك شارالاردىڭ اسەرىنەن ورىن العان ەكونوميكالىق قۇلدىراۋدىڭ سەبەبىنەن ىقتيمالدى تومەندەگەنىن ەسكەرەر بولساق, 24 ايعا ارنالعان جيناق دەپوزيتتەر بويىنشا نارىقتىق مولشەرلەمەلەردىڭ 0,3 پايىزدىق تارماققا تومەندەۋى بانكتەردىڭ قور جيناۋدا ساقتانۋ ساياساتىنا كوشكەنىن بىلدىرەدى.
ۇلتتىق ۆاليۋتاداعى باسقا دەپوزيتتەر بويىنشا ۇسىنىلاتىن ەڭ جوعارى سىياقى مولشەرلەمەلەرى بۇرىنعى دەڭگەيىندە قالدى.