اقش فەدەرالدى بارلاۋ بيۋروسىنىڭ قىزمەتكەرلەرى بۇدان 30 جىل بۇرىن بورتىندا 56 جولاۋشىسى بار ۇشاقتى زاڭسىز ايداپ, كۋباعا ءوتىپ كەتكەن ۋيليام پوتتس دەگەن ادامدى تۇتقىندادى. بۇل تۋرالى www.1TV.ru سايتى حابارلادى.
ۋيليام پوتتس بوستاندىق ارالىندا 30 جىل تۇرعان. ونىڭ ءبىر وكىنەتىنى, «اڭساپ جەتكەن» ەلى ماڭدايىنان سيپاي قويماپتى. سوندىقتان الگى قىلمىسى ءۇشىن كۋبا تۇرمەلەرىنىڭ بىرىندە 13 جىل وتىرادى. جازاسىن وتەپ شىققان سوڭ ۋيليام ۇيلەنىپ, ەكى قىزدىڭ اكەسى اتانادى. الايدا, ايەلى ەكى قىزىن ەرتىپ, بۇدان ءبىر جىل بۇرىن اقش-قا قونىس اۋدارىپتى.
كۋبادا قالىپ قويعان ۋيليام پوتتس وتباسىنا دەگەن ساعىنىشتىڭ ايداۋىمەن قاۋىپ-قاتەردەن قورىقپاي, اقش-قا ۇشىپ كەلەدى. بىراق, ساناسىن ساعىنىش شىرماعان اكەنى وتباسى مۇشەلەرى ەمەس, كوپتەن بەرى تىستەرىن قايراپ جۇرگەن اقش فەدەرالدى بارلاۋ بيۋروسىنىڭ قىزمەتكەرلەرى ونى ۇشاقتان كۇتىپ الادى.
كەزىندە «قارا قابىلان پارتياسى» دەگەن افروامەريكالىق ۇيىمنىڭ مۇشەسى بولعان ۋيليام پوتتس ەندى باس بوستاندىعىنان ءومىر بويى ايىرىلۋى مۇمكىن.
ەستەرىڭىزگە سالا كەتەيىك, «قىرعي-قاباق سوعىس» كەزەڭىندە, ياعني 1960-1970 جىلدار ارالىعىندا اقش-تان كۋباعا ونشاقتى ۇشاق زاڭسىز «قۋىلىپ» كەتكەن. بۇل وقيعالار سول تۇستاردا اقش-تىڭ بەدەلىنە ۇلكەن نۇقسان كەلتىرگەن. اسىرەسە, اقش ءوزىنىڭ كسرو سەكىلدى ساياسي باسەكەلەستەرىنىڭ الدىندا قاتتى «ۇيالعان».
ال اقش ءوزىنىڭ ابىرويىنا كەرى اسەرىن تيگىزگەندەردى ارادا 30 جىل ەمەس, 30 عاسىر وتسە دە, كەشىرمەيتىنى بەلگىلى.
جولدىباي بازار.