سوڭعى ءتورت جىلدا قازاقمىس كومپانياسى شىعىس قازاقستان وبلىسىنداعى ءىرى سپورت نىساندارىنىڭ قۇرىلىسى مەن جوندەۋ جۇمىستارىنا 1,65 ملرد. تەڭگەگە جۋىق قارجى ءبولدى
سوڭعى ءتورت جىلدا قازاقمىس كومپانياسى شىعىس قازاقستان وبلىسىنداعى ءىرى سپورت نىساندارىنىڭ قۇرىلىسى مەن جوندەۋ جۇمىستارىنا 1,65 ملرد. تەڭگەگە جۋىق قارجى ءبولدى
ايتالىق, 2012 جىلى كومپانيا تاراپىنان وسكەمەن قالاسىنداعى جەكپە-جەك سارايىنىڭ (بوكس جانە كۇرەس سارايى) قۇرىلىسىنا 366 ملن. تەڭگە ءبولىندى. عيماراتتىڭ جالپى اۋماعى 5700 شارشى مەتردى قۇرايدى. مۇندا كورەرمەندەر ءۇشىن ورىندار, ءبىرنەشە جاتتىعۋ زالى جانە كيىنۋ جايلارى, تورەشىلەر مەن جاتتىقتىرۋشىلارعا دا بولمەلەر قاراستىرىلعان. سونىمەن قاتار, مەديتسينالىق پۋنكت, ءباسپاسوز ءماسليحاتتارى مەن بريفينگتەر وتكىزەتىن زال جۇمىس ىستەيدى. جەكپە-جەك سارايىنىڭ قۇرىلىسى 2012 جىلدىڭ قىركۇيەك ايىندا باستالىپ, اعىمداعى جىلدىڭ سوڭىنا دەيىن پايدالانۋعا بەرىلەدى دەپ جوسپارلانىپ وتىر.
جاقىن ۋاقىتتا وسكەمەن قالاسىندا سپورتتاعى دارىندى بالالارعا ارنالعان 200 ورىندىق مەكتەپ-ينتەرناتى بوي كوتەرەدى. قۇرىلىس جۇمىستارىنا باعىتتالعان 300 ملن. تەڭگە كولەمىندەگى قاراجاتتى قازاقمىس توبى بىرلەسىپ قارجىلاندىرۋ نەگىزىندە ءبولدى. قازاقمىس كومپانياسى بولگەن جالپى سوماسى 500 ملن. تەڭگەدەن استام قاراجاتتىڭ ارقاسىندا وبلىس ورتالىعىندا ەكى حوككەي ءمودۋلى جۇمىس ىستەپ تۇر. 2010 جىلى كومپانيا جۇمساعان 600 ملن. تەڭگەگە «ۆوستوك» ستاديونىندا كۇردەلى جوندەۋ جۇمىستارى اتقارىلدى. ونى جۇزەگە اسىرۋ اياسىندا مىنبەرلەرگە گيدرووقشالاۋ جاسالدى, ينجەنەرلىك جۇيەلەر, وڭتۇستىك, شىعىس جانە سولتۇستىك مىنبەرلەردىڭ ەدەن جابىنى اۋىستىرىلدى. سونداي-اق, ستاديوننىڭ عيماراتى FIFA تالاپتارىنا ساي جاڭعىرتىلدى. باتىس مىنبەرلەردىڭ ۇستىنە شاتىر ورناتىلىپ, ستاديوننىڭ 8500 ورىندىعى تولىقتاي پلاستيك ورىندىقتارعا اۋىستىرىلدى. «ۆوستوك» ستاديونى 1963 جىلى سالىنعان, سىيىمدىلىعى 8 500 ورىن.
اتالعان قاراجات 2010-2013 جىلدار ارالىعىندا «قازاقمىس كورپوراتسياسى» جشس مەن شىعىس قازاقستان وبلىسى باسشىلىعىنىڭ اراسىنداعى جاسالعان مەموراندۋمدار جانە الەۋمەتتىك جوبالاردى ىسكە اسىرۋ جونىندەگى كەشەندى جوسپارلار اياسىندا بولىنگەن. جومارتتىق جورالعىسىن جاساعان كاسىپورىن بۇدان بىلاي دا ىزگىلىكتى ءىسىن جالعاستىرا بەرمەك.
مارات اققۇل,
«ەگەمەن قازاقستان».