ەلباسىنىڭ ۇكىمەتتىڭ كەڭەيتىلگەن وتىرىسىندا ايتقان سىن-ەسكەرتپەلەرىنە قاتىستى ءوز وي-پىكىرى مەن «اق جول» پارتياسىنىڭ ۇستانىمىن پارلامەنت ءماجىلىسىنىڭ دەپۋتاتى, ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى ازات پەرۋاشەۆ تا جەتكىزدى.
ەلباسىنىڭ ۇكىمەتتىڭ كەڭەيتىلگەن وتىرىسىندا ايتقان سىن-ەسكەرتپەلەرىنە قاتىستى ءوز وي-پىكىرى مەن «اق جول» پارتياسىنىڭ ۇستانىمىن پارلامەنت ءماجىلىسىنىڭ دەپۋتاتى, ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى ازات پەرۋاشەۆ تا جەتكىزدى.
مەملەكەت باسشىسىنىڭ بيىلعى جىلدىڭ 11 قازانىندا وتكەن ۇكىمەتتىڭ كەڭەيتىلگەن وتىرىسىندا ەشكىمنىڭ بەت-جۇزىنە قاراماي, بۇدان ءارى جول بەرۋگە بولمايتىن كەمشىلىكتەردى اتاپ كورسەتىپ, ۇكىمەتتىڭ جۇمىسىن وتكىر سىنعا الۋى ءبىز ءۇشىن توسىن جاعداي بولعان جوق. ءبىزدىڭ پارتيا مەملەكەتتىك ورگاندارداعى كوپتەگەن جاعىمسىز دەرەكتەردىڭ بەتىن اشۋ ارقىلى پرەزيدەنت مەملەكەتتىڭ حالىق الدىنداعى جاۋاپكەرشىلىگىن قامتاماسىز ەتەتىنىن جانە ءوزىنىڭ قاراپايىم ازاماتتاردىڭ جاعىندا ەكەنىن تاعى ءبىر كورسەتتى دەپ ەسەپتەيدى», دەپ باستادى ءوز ءسوزىن ازات تۇرلىبەك ۇلى.
ول سونداي-اق پرەزيدەنت كەڭەيتىلگەن وتىرىستا قاراپايىم ادامداردىڭ جانە كاسىپكەرلەردىڭ باسىندا كەزدەسىپ جۇرگەن كۇندەلىكتى پروبلەمالارى تۋراسىندا ۇكىمەتكە قاتاڭ تۇردە ەسكەرتكەنىن اتاپ ءوتتى. «مەن بۇل سىن-ەسكەرتپەلەردىڭ ءبىز ءۇشىن توسىن بولماعانىنا بىرنەشە مىسال كەلتىرە الامىن. ماسەلەن, «اق جول» پارتياسىنىڭ فراكتسياسى ەلىمىزدەگى «تۇرعىن ءۇي قۇرىلىس جيناق بانكىندە» ورىن العان سوراقى جاعدايلار تۋرالى ۇكىمەتكە جانە باس پروكۋراتۋراعا بيىلعى جىلدىڭ 11 اقپانىندا جانە 19 ماۋسىمىندا دەپۋتاتتىق ساۋالدارمەن ەكى مارتە شىققان بولاتىن. سول كەزدە بۇل ماسەلە كوپتەگەن باق-تاردا جاريالانىپ, ال مەن بانك باسشىلىعىنىڭ جۇمىسىنا كوڭىلىمىزدىڭ تولمايتىنى جونىندە بىرنەشە رەت تۇسىنىكتەمە بەرگەن ەدىم. الايدا, ءبىز وڭىرلىك دامۋ مينيسترلىگىنىڭ, ءمينيستردىڭ مىندەتىن اتقارۋشى نوكيننىڭ اتىنان: «اق جولدىڭ» دەپۋتاتتارى كەلتىرگەن دەرەكتەر دالەلدەنگەن جوق. ال بانك باسشىلىعى مەن ولاردىڭ تۋعان-تۋىستارى پاتەرلەردى «قولجەتىمدى تۇرعىن ءۇي» باعدارلاماسى بويىنشا زاڭدى تۇردە العان. ءبارى دۇرىس», دەگەن سىڭايداعى سىڭارجاق جاۋاپ قانا الدىق. ال ەگەر دە بۇل مالىمەتتەر ەلباسىنا جەتپەگەندە ەشكىم مۇنداي زاڭسىزدىقتاردى دالەلدەي الماس ەدى. سەبەبى, بۇگىنگى كۇنگە دەيىن ءبىر شەنەۋنىك باسقا شەنەۋنىكتەردىڭ زاڭعا قايشى ارەكەتتەرىن جاماپ-جاسقاپ, بۇركەمەلەپ كەلگەن», دەدى دەپۋتات بۇل ورايدا.
ا.پەرۋاشەۆتى وبلىستىق اكىمدەردىڭ جانىنداعى وڭىرلىك كەڭەستەردە ماقۇلدانىپ قويعان جوبالاردىڭ ءتيىستى مولشەردە مەملەكەتتىك قولداۋ الا المايتىن جاعدايعا جەتكەنى دە قىنجىلتادى ەكەن. «اق جول» پارتياسىنىڭ دەپۋتاتتىق فراكتسياسى «بيزنەستىڭ جول كارتاسى - 2020» باعدارلاماسى بويىنشا قولعا الىنعان جوبالاردى قارجىلاندىرۋداعى كەمشىلىكتەر تۋراسىندا 1 قازاندا دەپۋتاتتىق ساۋال جاريالاعان ەدى. سول دەپۋتاتتىق ساۋالىمىزدا: «باعدارلاماعا قاراجات بولىنبەگەن كۇننىڭ وزىندە كاسىپكەرلىكتى قولداۋ باعىتىنداعى بارلىق مەملەكەتتىك باعدارلامالارعا تەكسەرىس جۇرگىزىپ, ولاردىڭ ىشىندەگى ەڭ تابىستى جانە كوپ سۇرانىسقا يە باعدارلامالارعا قايتا قاراجات ءبولۋ قاجەتتىگىن» ەسكەرتكەن ەدىك. بىراق, ول ءىس جۇزىنە اسپادى», دەدى دەپۋتات. بۇل ورايدا, «اق جول» فراكتسياسى قاجەتتى قاراجاتتى تابۋ ءۇشىن باسقاشا جول قاراستىرۋدى ۇسىنعان. «ماسەلەن, ءبىز جۇمىس تەتىگىنىڭ ىسكە قوسىلعانىنا 3 جىلدان استام ۋاقىت وتسە دە, ءالى كۇنگە دەيىن ءبىر دە ءبىر جەڭىل ۇشاق شىعارماعان قاراعاندىداعى «قازاۆياسپەكتر» زاۋىتىن سىنعا الدىق. ال ەلىمىزدە قازىردىڭ وزىندە ءونىم شىعارىپ, بىراق ۋادە ەتىلگەن قارجىنى الا الماي وتىرعان باسقا دا كاسىپورىندار بار ەمەس پە؟ ولار بۇل جاعداي تۋرالى نە ويلايدى؟ سوندىقتان, جۇزەگە اسىرىلماعان جوبالاردى قىسقارتىپ, ولارعا بولىنگەن قارجىنى جۇمىس ىستەپ تۇرعان كاسىپورىندارعا اۋدارۋىمىز كەرەك», دەدى ا. پەرۋاشەۆ.
دەپۋتات مەملەكەت باسشىسىنىڭ كەدەن وداعى اياسىنداعى كەلىسسوزدەردىڭ ناتيجەلى جۇرگىزىلمەي وتىرعانىنا قاتىستى سىنى دا دەر كەزىندە ايتىلعانىن جەتكىزدى. ونىڭ سوزىنە قاراعاندا, «اق جول» پارتياسى ۇكىمەتتىڭ كەڭەيتىلگەن وتىرىسىنان 2 كۇن بۇرىن, ياعني 9 قازاندا قازاقستاندىق شەنەۋنىكتەردىڭ كەدەن وداعى اياسىنداعى كەلىسسوزدەر ۇدەرىسىنە ەنجارلىقپەن قارايتىنى تۋراسىندا, ال مۇنداي جاعداي وتاندىق بيزنەسكە جانە ەكونوميكاعا ايتارلىقتاي دەڭگەيدە نۇقسان كەلتىرىپ وتىرعانى جونىندە دەپۋتاتتىق ساۋال كوتەرگەن ەكەن.
«مەن كەمشىلىك اتاۋلىنى ءتىزىپ قانا قويعىم كەلمەيدى. «قازىر كەمشىلىكتەر قالاي تۇزەتىلۋدە؟ ولار جالپى تۇزەتىلىپ جاتىر ما؟» دەگەن ساۋالدارعا نازار اۋدارساق دەيمىن. بۇگىندە ءبىز زاڭ شىعارۋشى جانە اتقارۋشى بيلىك ورگاندارى اراسىنداعى وكىلەتتىلىكتەردىڭ ۇيلەسىمسىزدىگى مەن تەڭگەرىمسىزدىگىنە كۋا بولىپ وتىرمىز. سوندىقتان, ۇكىمەتتىڭ دەپۋتاتتاردىڭ كەيبىر سوققان دابىلدارىنا سىرعىتپا سوزدەرمەن عانا جاۋاپ بەرەتىنى ءبىز ءۇشىن ۇيرەنشىكتى جاعدايعا اينالدى. ماسەلەن, پرەزيدەنتتىڭ كەلتىرگەن سىندارىنا قاتىستى: «كىنالىلەر بار شىعار. بىراق, مەن ەمەس, باسقا بىرەۋ» دەگەن سياقتى كوزقاراسپەن قارايتىن جاعدايلار ورىن الۋدا. قاراپايىم عانا مىسال. وسى جاعدايدان كەيىن پرەمەر-مينيستر ەكى ۆيتسە-ءمينيستردى قىزمەتىنەن كەتىردى, ۆيتسە-پرەمەر وبلىستىق اكىمدىك قىزمەتكەرلەرىن جۇمىستان شىعارۋدى تالاپ ەتتى, ال يندۋستريا جانە جاڭا تەحنولوگيالار مينيسترلىگى باعدارلامالاردىڭ جۇيەلى ورىندالماعانى ءۇشىن كاسىپكەرلەردىڭ وزىنە كىنا تاقتى. ال سىرت كوزگە بۇل: «ايران ىشكەن قۇتىلاتىن, شەلەك جالاعان تۇتىلاتىن» جاعداي بولىپ كورىنەتىنىن نەگە قاپەرلەرىنە المايدى؟ ءبىز ءۇشىن شەنەۋنىكتىڭ ءوز لاۋازىمدىق مىندەتتەرىن جانە مەملەكەت باسشىسىنىڭ ناقتى تاپسىرمالارىن تاپ-تۇيناقتاي ورىنداۋى ماڭىزدى», دەدى دەپۋتات.
سونىمەن قاتار, ا.پەرۋاشەۆ, ەلباسىنىڭ ەلدى يندۋستريالاندىرۋدى ءتيىستى مولشەردە قارجىلاندىرۋ, وتاندىق وندىرۋشىلەرگە قولداۋ كورسەتۋ, ءوندىرىس جانە جاڭا تەحنولوگيالار سالاسىنداعى كاسىپورىندار ءۇشىن قولايلى سالىقتىق رەجىم ەنگىزۋ سەكىلدى باسقا دا كوپتەگەن ماسەلەلەرگە قاتىستى ايتقان پىكىرلەرىن دە تولىقتاي قولدايتىنىن جەتكىزدى. «سوندىقتان, پرەزيدەنتتىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسى الداعى ۋاقىتتا ۇكىمەت پەن پارلامەنتتىك فراكتسيالار ءوزارا تىعىز بايلانىستا جۇمىس ىستەپ قانا قويماي, زاڭ شىعارۋشى جانە اتقارۋشى بيلىك تارماقتارى اراسىنداعى تەڭگەرىمدىلىك تەتىگىن نىعايتۋ قاجەتتىگىن تاعى ءبىر دايەكتەپ بەرگەندەي بولدى», دەدى ا.پەرۋاشەۆ.
ءلايلا ەدىلقىزى,
«ەگەمەن قازاقستان».