قازاقستان ەلشىسى ساتىبالدى بۇرشاقوۆ ءيزرايلدىڭ دەنساۋلىق ساقتاۋ ءمينيسترى يۋلي ەدەلشتەينمەن كەزدەستى, دەپ حابارلايدى Egemen.ءkz سىم ءباسپاسوز قىزمەتىنە سىلتەمە جاساپ.
كەزدەسۋ بارىسىندا دەنساۋلىق ساقتاۋ جانە مەديتسينا سالالارىنداعى قازاقستاندىق-يزرايلدىك ىنتىماقتاستىقتى ودان ءارى دامىتۋدىڭ جاي-كۇيى مەن باسىم باعىتتارى تالقىلاندى.
سۇحباتتاسۋشىلار كوروناۆيرۋستىڭ تارالۋىنا قارسى ءىس-قيمىل بويىنشا قازاقستان مەن يزرايلدە قابىلدانىپ جاتقان شارالار تۋرالى ءبىر-ءبىرىن حاباردار ەتىپ, سونداي-اق يزرايلدەگى كۇردەلى سانيتارلىق-ەپيدەميولوگيالىق جاعدايدى اتاپ ءوتتى.
تاراپتار ەكى ەلدىڭ دەنساۋلىق ساقتاۋ مينيسترلىكتەرى اراسىنداعى ىنتىماقتاستىق سالاسىندا پراكتيكالىق قادامدار جاساۋعا دايىن ەكەندىكتەرىن ءبىلدىردى. قازىرگى ۋاقىتتا كەلىسىلىپ جاتقان 2019-2024 جىلدارعا ارنالعان دەنساۋلىق ساقتاۋ جانە مەديتسينا سالاسىنداعى ىنتىماقتاستىق جوسپارىنىڭ جوباسى بويىنشا ەكى ۆەدومستۆو اراسىنداعى بايلانىستى جانداندىرۋ قاجەتتىلىگى تۋرالى اڭگىمە قوزعالدى.
ەلشى ءمينيستردى پرەزيدەنت ق.توقاەۆتىڭ مەملەكەتتىڭ ودان ءارى داعدارىسقا قارسى دامۋى مەن قوعامنىڭ ءال-اۋقاتىن قامتاماسىز ەتۋدىڭ, ونىڭ ىشىندە وتاندىق دەنساۋلىق ساقتاۋ جۇيەسىن دامىتۋدىڭ نەگىزگى باعىتتارىن ايقىنداۋعا ارنالعان «جاڭا جاعدايداعى قازاقستان: ءىس-قيمىل كەزەڭى» جولداۋىنىڭ نەگىزگى ەرەجەلەرىمەن تانىستىردى.
ديپلومات يزرايل تاراپىنا قازاقستانعا «ماشاۆ» اگەنتتىگى جانە جەكەلەگەن كوماپنيالار ارقىلى جىبەرىلگەن گۋمانيتارلىق كومەك ءۇشىن, سونداي-اق اعىمداعى جىلدىڭ ناۋرىز-مامىر ايلارىندا وتكەن بىرقاتار بەينەكونفەرەنتسيالار اياسىندا ءيزرايلدىڭ جەتەكشى مەديتسينالىق ورتالىقتارىنىڭ قازاقستاندىق دارىگەرلەرگە كونسۋلتاتسيا بەرگەنى ءۇشىن العىس ءبىلدىردى.
كەلىسسوزدەر ناتيجەسىندە دەنساۋلىق ساقتاۋ جانە مەديتسينا ماماندارى اراسىندا كوروناۆيرۋسپەن كۇرەسۋدىڭ وزىق تاجىريبەسىمەن الماسۋ, سونداي-اق سانيتارلىق-ەپيدەميولوگيالىق قاداعالاۋ جۇيەسىن باقىلاۋ ماقساتىندا ونلاين كونفەرەنتسيالار تاجىريبەسىن جالعاستىرۋ تۋرالى كەلىسىلدى.
سونىمەن قاتار, تاراپتار پاندەمياعا قاتىستى جاعداي تۇراقتانعان سوڭ, يزرايلدە قازاقستاندىق ماماندارعا ارنالعان وقۋ باعدارلامالارى مەن بىلىكتىلىكتى ارتتىرۋ كۋرستارىن ۇيىمداستىرۋ ماسەلەسىن قاراستىرۋعا كەلىستى.
كەزدەسۋ ناتيجەسى بويىنشا يۋ.ەدەلشتەين ءوزىنىڭ قازاقستاندىق ارىپتەسىنە ىزگى تىلەكتەرىن جەتكىزۋدى سۇراي وتىرىپ, دەنساۋلىق ساقتاۋ ءمينيسترى الەكسەي تسويدى يزرايلگە كەلۋگە شاقىردى.