سەنات قابىرعاسىندا كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسى ءوتتى. وندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى.
زاڭ جوباسى سىبايلاس جەمقورلىق كورىنىستەرىن جۇيەلى تۇردە الدىن الۋ جونىندەگى قوسىمشا شارالار ەنگىزۋدى كوزدەيدى. اتاپ ايتقاندا, مەملەكەتتىك قىزمەتشىگە قۇنى قانداي دا بولسىن سىيلىقتار سىيلاۋعا تىيىم بەلگىلەنەدى, وزىنە سىبايلاس جەمقورلىق شەكتەۋلەرىن قابىلدايتىن ادامداردىڭ وتباسى مۇشەلەرىنە ماتەريالدىق سىيلىقاقى, سىيلىقتار نەمەسە كورسەتىلەتىن قىزمەتتەر قابىلداۋعا تىيىم ەنگىزىلەدى; دەربەس قۇرىلىمدىق بولىمشە باسشىcى لاۋازىمىنان تومەن ەمەس لاۋازىمدى اتقاراتىن لاۋازىمدى ادامداردى, سونداي-اق كۆازيمەملەكەتتىك سەكتوردا ساتىپ الۋمەن اينالىساتىن ادامداردى سىبايلاس جەمقورلىق سۋبەكتىلەرىنە جاتقىزۋ ۇسىنىلادى; كۆازيمەملەكەتتىك سەكتور ۇيىمدارىندا ادەپتىلىكتىڭ كورپوراتيۆتىك ستاندارتتارىن ساقتاۋ ءۇشىن جاۋاپتى بولاتىن سىبايلاس جەمقورلىققا قارسى كومپلاەنس-قىزمەتتەر ينستيتۋتىن ەنگىزۋ كوزدەلەدى.
زاڭ جوباسىمەن 4 كودەكسكە جانە 10 زاڭعا وزگەرىستەر مەن تولىقتىرۋلار ەنگىزۋ كوزدەلگەن. «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن پالاتانىڭ تالقىلاۋىنا شىعارۋ تۋرالى شەشىم قابىلداندى, دەپ حابارلادى پارلامەنت سەناتىنىڭ ءباسپاسوز قىزمەتى.