ERG (ەۋرازيالىق توپ) قۇرامىنداعى «شۇباركول كومىر» اق تاجىريبەلىك-ونەركاسىپتىك قوندىرعىسىندا ىسكە قوسۋ مەن جوندەۋ جۇمىستارىن جۇرگىزۋ بارىسىندا بەلسەندىرىلگەن كومىردىڭ العاشقى بايقاۋ پارتياسى ءوندىرىلدى. كاسىپورىننىڭ ونەركاسىپتىك الاڭىنداعى حيميالىق زەرتحانادا ونىمگە تالداۋ جاسالىپ, ونىڭ ساپاسى وتە جاقسى ەكەنى راستالدى.
«شۇباركول كومىر» – قازاقستانداعى ەڭ ءىرى ەنەرگەتيكالىق كومىر وندىرۋشىلەردىڭ ءبىرى. كومىردى اشىق ادىسپەن وندىرەتىن, سونداي-اق سپەتسكوكس جانە كوكس گازىنان ەلەكتر قۋاتىن وندىرۋمەن اينالىساتىن اتالعان كاسىپورىن جوعارى قۇنارلىعى جانە كۇلدى-لىگىنىڭ تومەندىگى ارقىلى ەكولوگيالىق جاعىنان تازا ەنەرگيا تاسىمالداۋشىعا جاتادى. «شۇباركول كومىر» اق كوكس-حيميالىق تسەحى نەگىزىندە ۇساق كوكستان تاجىريبەلىك-ونەركاسىپتىك بەلسەندىرىلگەن كومىردى ءوندىرۋ جوباسى وتاندىق عالىم-تەحنولوگتار ازىرلەگەن تەحنولوگيانى ەنگىزۋدى قاراستىرادى. ونىڭ كاسىپورىن عانا ەمەس, تمد ەلدەرى اۋماعىندا تەڭدەسى جوق. جوبانى كاسىپورىن «ERG عىلىمي-زەرتتەۋ ينجيرينگ ورتالىعى» جشس-مەن بىرلەسىپ جۇزەگە اسىرىپ جاتىر. نىساننىڭ وندىرىستىك قۋاتى – جىلىنا 1 مىڭ توننا بەلسەندىرىلگەن كومىر.
جوبانىڭ باستى ماقساتى – يمپورتتى الماستىرۋ ماسەلەسىن شەشۋ. بەلسەندىرىلگەن كومىردى قولدانۋ سالاسى وتە كەڭ: گيدرومەتاللۋرگيالىق, التىن قازۋ, فوسفات ونەركاسىبى, سۋ تازارتۋ. بۇگىنگى تاڭدا اتالعان ونىمگە سۇرانىس جوعارى بولعانىنا قاراماستان, (جىلىنا 7 مىڭ توننادان ارتىق) بارلىق بەلسەندىرىلگەن كومىر قازاقستانعا شەتەلدەن جەتكىزىلىپ كەلەدى.
– شۇباركولدىك بەلسەندىرىلگەن كومىردىڭ باستى ارتىقشىلىعى – شيكىزات رەتىندە ارزان كوكس ۇساعىن جانە ەنەرگيا تاسىمالداۋشى رەتىندە جاعىلاتىن كوكس گازىن پايدالاناتىندىقتان وزىندىك قۇنى تومەن بولىپ كەلەدى. بۇل جاعداي ءوندىرىس قالدىقتارىن كادەگە جاراتۋ ىسپەتتى وتە ماڭىزدى ماسەلەنى شەشۋگە سەپتەسەدى, – دەدى «شۇباركول كومىر» اق وپەراتسيالىق تيىمدىلىك ءبولىمىنىڭ باسشىسى الەكساندر لاپشين. – سونىمەن قاتار وسى تەحنولوگيا بويىنشا الىنعان بەلسەندىرىلگەن كومىر نارىقتاعى بارلىق ونىمنەن ەش كەم تۇسپەيدى. بىراق وزىندىك قۇنى نەگىزگى باسەكەلەستەرىنەن 1,5-3 ەسەگە دەيىن تومەن.
ىسكە قوسۋ مەن جوندەۋ جۇمىستارىنا «شۇباركول كومىر» اق ماماندارىنان بولەك, جوبانى عىلىمي-تەحنيكالىق تۇرعىدان «ERG عزيو» جشس جانە «ايملاب» جشس ماماندارى سۇيەمەلدەدى. قاشىقتىقتان قوسىلۋ ارقىلى جابدىقتى جاساپ شىققان ءوندىرۋشى-زاۋىتتىڭ «سپلاين-م» جشق (رەسەي فەدەراتسياسى) ماماندارى دا جۇمىسقا جۇمىلدىرىلعان.
كاسىپورىن ستاندارتىن الۋ ءۇشىن بەلسەندىرىلگەن كومىردىڭ تاجىريبەلىك ۇلگىلەرى تاۋەلسىز زەرتحاناعا تاپسىرىلدى. كەلەسى كەزەڭ – «شۇباركول كومىر» اق-تا بەلسەندىرىلگەن كومىردى ءوندىرۋ مەن وتكىزۋدى باستاۋعا مۇمكىندىك بەرەتىن ساپا سەرتيفيكاتىن الۋ.
شۇباركول ماماندارى ازىرلەگەن جوبانى وڭتايلى پايداعا جاراتۋ كاسىپورىندا جاڭا جۇمىس ورىندارىن اشۋعا مۇمكىندىك بەرەدى. سونىمەن قاتار قازاقستاندىق وندىرۋشىلەر شىعاراتىن ءونىم ۇلەسىن كوبەيتەدى.
ەلەۋلى قوسىمشا قۇنى بار ءونىم ءوندىرىسى پرەزيدەنت قاسىم-جومارت توقاەۆتىڭ جولداۋىندا ايتىلعان ارتاراپتاندىرىلعان تەحنولوگيالىق ەكونوميكا قۇرۋ تاپسىرماسىن ورىنداۋ اياسىندا جۇزەگە اسىرىلادى.