مەملەكەت باسشىسى قاسىم-جومارت توقاەۆ باسەكەلەستىكتى قورعاۋ جانە دامىتۋ اگەنتتىگىنىڭ توراعاسى سەرىك جۇمانعاريندى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
سەرىك جۇمانعارين پرەزيدەنت قاسىم-جومارت توقاەۆتى جاڭادان قۇرىلعان باسەكەلەستىكتى قورعاۋ جانە دامىتۋ اگەنتتىگىنىڭ الداعى جۇمىس جوسپارىمەن تانىستىردى.
پرەزيدەنتكە ەلىمىزدەگى باسەكەلەستىكتى دامىتۋ, وعان قولايلى جاعداي جاساۋ جانە ۇلتتىق يدەيا رەتىندە قابىلداۋ ماقساتىندا اتقارىلاتىن ءىس-شارالار تۋرالى باياندالدى. وسى ماقساتتا بارلىق سالالار مەن ايماقتاردى قامتيتىن باسەكەلەستىكتى دامىتۋ جونىندە ۇلتتىق جوبا ازىرلەنەدى. سالالىق جانە ايماقتىق باسەكەلەستىك تالاپتارى جاسالادى.
اگەنتتىك توراعاسى مەملەكەت باسشىسىنا جاڭا قۇرىلىمنىڭ قىزمەتىن ۇيىمداستىرۋ جوسپارى تۋرالى ايتتى. اسىرەسە تۇتىنۋشىلاردىڭ تالابىن قاناعاتتاندىرۋ, ەكونوميكانىڭ تۇراقتى ءوسىمى مەن دامۋىن قامتاماسىز ەتۋ, نارىق سۋبەكتىلەرىنىڭ ەكونوميكالىق تيىمدىلىگى مەن باسەكەگە قابىلەتتىلىگىن ارتتىرۋعا باسىمدىق بەرىلمەك.
پرەزيدەنت حالىقارالىق نارىقتاعى وزىق تاجىريبەلەردى باسشىلىققا الا وتىرىپ, قازاقستاندا دۇرىس باسەكەلەستىك قالىپتاستىرۋ ماڭىزدى ەكەنىن اتاپ ءوتتى.
كەزدەسۋ سوڭىندا قاسىم-جومارت توقاەۆ اگەنتتىك باسشىسىنا قازاقستان حالقىنا ارناعان جولداۋىنداعى باسەكەلەستىكتى قورعاۋ جانە ەكونوميكانىڭ تيىمدىلىگىن ارتتىرۋعا باعىتتالعان تاپسىرمالاردى ورىنداۋدىڭ ماڭىزدىلىعىنا توقتالدى. جولداۋ جۇكتەگەن مىندەتتەردى ورىنداۋ بويىنشا بىرقاتار ناقتى تاپسىرما بەردى.