بۇگىن ددۇ ەۋروپالىق وڭىرلىك بيۋروسىنىڭ 70-سەسسياسى باستالدى. حالىقارالىق جيىننىڭ توراعاسى بولىپ العاش رەت دەنساۋلىق ساقتاۋ ءمينيسترى الەكسەي تسوي سايلاندى. ۆەدومستۆو باسشىسى ءوز سوزىندە, الەمدىك دەنساۋلىق ساقتاۋ ءۇشىن وتە ماڭىزدى شاراعا توراعالىق ەتۋ ول ءۇشىن ۇلكەن قۇرمەت پەن جاۋاپكەرشىلىك ەكەنىن جەتكىزدى, دەپ حابارلايدى Egemen.kz
"حالىقارالىق قوعامداستىق پەن دۇنيەجۇزىلىك دەنساۋلىق ساقتاۋ ۇيىمىنىڭ قولداۋىمەن, ءبىز وزگە ەلدەرمەن ىنتىماقتاسا وتىرىپ COVID-19 قارسى كۇرەستى جالعاستىرامىز. قازىر قازاقستانداعى جاعداي تۇراقتالدى, ال كوروناۆيرۋس ينفەكتسياسى قايتا ءورشيتىن بولسا, ارنايى جوسپار ازىرلەدىك. ماسەلەن, ناۋقاستاردى توسەك-ورىن, قاجەتتى دارىلىك پرەپارات جانە باسقا دا رەسۋرستارمەن قامتاماسىز ەتۋ. وتاندىق دارىگەرلەر حالىققا كومەك كورسەتۋگە دايىن", دەدى ا.تسوي.
ەۋروپا ايماعىنداعى ددۇ-عا مۇشە 53 مەملەكەتتىڭ دەنساۋلىق ساقتاۋ مينيسترلەرى مەن وزگە دە جوعارى لاۋازىمدى ازاماتتار, سونداي-اق سەرىكتەس ۇيىمدار مەن ازاماتتىق قوعام وكىلدەرى ەكى كۇن بويى دەنساۋلىق ساقتاۋ سالاسىنداعى ءتۇرلى ماسەلەنى تالقىلايدى. قىسقارتىلعان سەسسيانىڭ كۇن تارتىبىندەگى نەگىزگى تاقىرىپتاردىڭ ءبىرى: ايماقتاعى جانە الەمدەگى COVID-19 پاندەمياسىنا قارسى ءىس-قيمىل مەن تاجىريبە جانە 2020-2025 جىلدارعا ارنالعان دەنساۋلىق ساقتاۋدى جاقسارتۋعا باعىتتالعان جاڭا ەۋروپالىق باعدارلاما.