كوروناۆيرۋس پاندەمياسىنىڭ سوققىسى ءبىزدىڭ ەلدى عانا ەمەس, كۇللى الەمدى ەسەڭگىرەتىپ كەتتى. تۇتقيىلدان كەلدى دە, تىنىش ءومىردىڭ شىرقىن بۇزدى, سونىمەن قاتار ايتىپ كەلمەگەن اپاتتىڭ مۇنداي ءتۇرىنىڭ الدىندا ادام بالاسىنىڭ قانشالىقتى قاۋقارسىز جانە قورعانسىز ەكەنىن بايقاتتى. ەڭ وكىنىشتىسى, بۇل سۇراپىل ىندەت ميلليونداعان ادامنىڭ ومىرىنە قاۋىپ ءتوندىرىپ, تالاي شاڭىراققا قايعى اكەلدى.
مەملەكەت باسشىسى بيىلعى جولداۋىندا كوروناۆيرۋس ينفەكتسياسى سالعان لاڭنان كەيىنگى جاعدايدى بىلايشا سيپاتتادى: «قازىر الەم سوڭعى 100 جىل ىشىندە بولماعان اسا كۇردەلى داعدارىستى باستان وتكەرۋدە. ساراپشىلاردىڭ ايتۋىنشا, جاھاندىق ەكونوميكانى قايتا قالپىنا كەلتىرۋ ءۇشىن كەمىندە 5 جىلعا دەيىن ۋاقىت قاجەت». ۇعا بىلگەن ادام ءۇشىن بۇل سوزدەردىڭ استارىندا الاپات سالماق جاتىر. ياعني ءبىز ءۇشىن قاتاڭ سىناق ەندى باستالعانداي.
ەل ىشىنە ەندەي كىرگەن ىندەت وسال تۇستارىمىزدىڭ ءبىز ويلاعاننان الدەقايدا وراسان ەكەنىن كورسەتتى. قاراپ تۇرساق, بىزدەگى مەديتسينا سالاسىنداعى ماسەلە اتاۋلى كادر تاپشىلىعىنان باستاپ قاراپايىم دارىلەردىڭ جەتىسپەۋشىلىگىنە دەيىن تىزبەكتەلىپ جاتىر ەكەن. سودان دا بولار, مەملەكەت باسشىسى ءوزىنىڭ جولداۋىندا ەلىمىزدەگى مەديتسينالىق ينفراقۇرىلىمدى دامىتۋدى اسا ماڭىزدى شارۋانىڭ ءبىرى دەپ اتادى.
ەڭ وكىنىشتىسى سول, پاندەميانىڭ كۇشەيىپ تۇرعان كەزىندە اۋىلدىق جەرلەردە تۇراتىن قاراپايىم ادامدار ءتىپتى دە قورعانسىز قالدى. باقساق, الىستاعى اۋىلدا ءدارى-دارمەكتى بىلاي قويعاندا, اۋىرعان ادامعا جاردەم بەرەتىن مەديتسينالىق مامانداردىڭ جەتىسپەۋشىلىگى جانە جوقتىعى جاعا ۇستاتتى. وسىنىڭ كەسىرىنەن وبلىس, اۋدان ورتالىقتارىنان جىراقتا ورنالاسقان اۋىلدارداردىڭ قانشاما تۇرعىنى ومىرمەن مەزگىلىنەن بۇرىن قوش ايتىسىپ كەتتى دەسەڭىزشى؟!
بۇل وتە ۇلكەن جانە كۇردەلى ماسەلە ەدى. مىنە, وسى جايتتىڭ جوعارى جاققا جەتكەنىن ءوز باسىم جاقسىلىققا بالادىم. پرەزيدەنت جولداۋدا: «شالعايداعى وڭىرلەرگە كولىك ارقىلى دارىگەرلىك قىزمەت كورسەتۋ ءىسىن قايتا قالپىنا كەلتىرۋ شارالارىن جۇزەگە اسىرعان ءجون. دەنساۋلىق ساقتاۋ ءىسىنىڭ ءتيىمدى مودەلىن قۇرۋ ارقىلى ءۇش جىل ىشىندە بارلىق اۋىلدىق ەلدى مەكەندى فەلدشەرلىك-اكۋشەرلىك پۋنكتتەرمەن جانە دارىگەرلىك امبۋلاتوريالارمەن قامتاماسىز ەتۋ قاجەت», دەدى.
بۇگىندە الەم حالقى كوروناۆيرۋس ينفەكتسياسىنىڭ ەكىنشى تولقىنىن ۇلكەن ۇرەيمەن كۇتىپ وتىر. ەگەر دە, ماماندار ايتقان بولجام راسقا شىقسا, وندا ءبىز اتى جامان تۇماۋعا توسقاۋىل قويۋعا دايىنبىز با؟ مىنە, جۇرەگى شايلىعىپ قالعان حالىقتى قازىر وسى ماسەلە قاتتى الاڭداتادى.
وسى ورايدا تاعى دا اۋىلدىق جەرلەردە تۇراتىن ازاماتتاردىڭ جايىن ويلاپ, الاڭدايمىز. ءىرى قالالار مەن اۋدان ورتالىقتارى كارانتينگە جابىلار بولسا, اۋىل حالقىنىڭ اۋىر جاعدايىمەن بەتپە-بەت قالارى ءسوزسىز. بۇل تىعىرىقتان شىعار جولدىڭ ءبىرى – وسى باستان ءدارى-دارمەكتىڭ مول قورىن جاساپ, ونىڭ قولجەتىمدىلىگىن قامتاماسىز ەتۋ كەرەك. مىسالى, كوروناۆيرۋس كۇشىنە ءمىنىپ تۇرعان كەزدە قاراعاندى وبلىسىنىڭ اقتوعاي جانە ۇلىتاۋ اۋداندارىندا جىلجىمالى ءدارىحانالار جۇمىس ىستەدى. ءدارى-دارمەك تيەگەن بۇل اۆتوكولىكتەر الىستاعى اۋىلداردى ارالاپ, قولى قىسقا قاراپايىم حالىقتىڭ مۇقتاجىن اشتى. ءىس جۇزىندە ناتيجە بەرگەن وسى تاجىريبە وڭىرلەرگە كەڭىنەن تاراتىلسا دەگەن تىلەك بار. سونىمەن قاتار ەل ىشىنە ىندەت قايتا كىرەر بولسا, تەمىر جولدى پايدالانىپ, دەنساۋلىق ۆاگوندارىنىڭ دا كومەگىنە جۇگىنۋگە بولۋشى ەدى.
قالاي بولعان كۇندە دە, COVID-19 العاش كەلگەنىندە بەتىن اشقان كەمشىلىكتەرمەن كۇرەس استە توقتاماۋى ءتيىس. ارينە, ىندەتپەن كۇرەستە العى شەپتە ءجۇرىپ, قاۋىپكە قارسى تۇراتىن مەديتسينا قىزمەتكەرلەرى. مەملەكەت باسشىسى جولداۋدا دارىگەر ماماندىعىن ماتەريالدىق تۇرعىدان نىعايتا ءتۇسۋدىڭ ماڭىزدىلىعىن اتاپ ءوتتى. «بيۋدجەتتى تاياۋداعى ناقتىلاۋ كەزىندە ەكىنشى جارتىجىلدىقتا مەديتسينا قىزمەتكەرلەرىن ىنتالاندىراتىن قوسىمشا تولەم ءۇشىن 150 ميلليارد تەڭگە ءبولۋدى تاپسىرامىن», دەدى پرەزيدەنت. سونىمەن بىرگە ول 2023 جىلعا قاراي دارىگەرلەر ەڭبەكاقىسىنىڭ ەكونوميكاداعى جالاقىدان ەكى ەسە ارتىق بولاتىنىن دا مالىمدەدى. البەتتە, مۇنىڭ ءبارى مەديتسينا قىزمەتكەرلەرىنىڭ مەرەيىن ءوسىرىپ قانا قويماي, ولارعا زور جاۋاپكەرشىلىك جۇكتەيدى دەگەن سەنىمدەمىز.
ءسوزىمدى تۇيىندەر بولسام, كوروناۆيرۋستىڭ كەلەسى تولقىنىنا تەك جاعدايى كەشەندى تۇردە جاسالعان مەديتسينا عانا تويتارىس بەرە الادى. بۇل دەگەنىڭىز – ەڭ الدىمەن بىلىكتى مامان, زاماناۋي مەديتسينالىق ينفراقۇرىلىم جانە قولجەتىمدى ءدارى-دارمەكتىڭ جەتكىلىكتى قورى.
بەكزات التىنبەكوۆ,
وبلىستىق ءماسليحاتتىڭ دەپۋتاتى, وبلىستىق قوعامدىق كەلىسىم كەڭەسىنىڭ توراعاسى, Nur Otan پارتياسى ساياسي كەڭەسىنىڭ مۇشەسى
قاراعاندى وبلىسى