مەملەكەت باسشىسى قاسىم-جومارت توقاەۆتىڭ بيىل ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي ارنايى ۇندەۋ جاريالاعانى ءمالىم. ۇندەۋىندە پرەزيدەنت ق.توقاەۆ تاۋەلسىزدىكتىڭ العاشقى جىلدارىنان باستالعان تاريحي ادىلدىكتى قالپىنا كەلتىرۋ جۇمىستارىن اياقتاپ, ساياسي قۋعىن-سۇرگىن قۇرباندارىن اقتاۋ ءۇشىن ارنايى مەملەكەتتىك كوميسسيا قۇرۋدى تاپسىرعانىن ايتتى.
ء«بىز جازىقسىز جازالانعانداردىڭ ارقايسىسىن ەستە ساقتاۋ ارقىلى عانا كەمەل كەلەشەككە جول اشامىز», دەدى مەملەكەت باسشىسى. قاسىم-جومارت كەمەل ۇلىنىڭ بۇل شەشىمى كەڭەستىك داۋىردەگى زاڭسىزدىقتار كەزەڭىندە قۇربان بولىپ, ەسىمدەرى مەن حالىق يگىلىگى ءۇشىن اتقارعان ىستەرى ۇمىتتىرىلعان جانداردى ەسكە الۋ ىسىنە جاڭا سەرپىن بەرۋدە. جازۋشى جانە تاريحشى بەيبىت قويشىباەۆتىڭ جاقىندا «رۋح» باسپاسىنان شىققان «ەلى سۇيگەن اق بايسەيىت» اتتى كىتابى وسى ورايداعى سونى سەرپىلىستىڭ ءبىر كورىنىسى ەكەنىنە كۇمان جوق.
قازاق ۇلت-ازاتتىق قوزعالىسىنا قاتىسۋشىلاردىڭ العاشقى لەگىندە بولعان بايسەيىت ءادىل ۇلى كەڭەس وكىمەتى الاش قايراتكەرلەرىنە قارسى جۇرگىزگەن رەپرەسسيانىڭ العاشقى تولقىنىندا وققا ۇشتى. كامپەسكە ناۋقانىنان كەيىن ىلە-شالا سوڭىنا تۇسكەن قارۋلى جاساق ونىڭ بوي تاسالاعان ءۇيىن قورشاۋعا الىپ, اتقىلاعان شاقتا وپات بولدى. اسكەريلەردىڭ باقىلاۋىمەن جەر قوينىنا بەرىلدى. ەسىمى «الاش ءىسى» تەرگەۋلەرىندە عانا اتالىپ, قالىڭ جۇرتشىلىق ءۇشىن سودان بەرى جابىق جاعدايدا جاتتى. بىراق ونى قادىر تۇتاتىندار مەن بىلەتىندەر ۇمىتپاي, توقسان جىلدان كەيىن سۇيەگىن اۋىلداستارىنىڭ مەكەنىنە اكەلىپ, قارالى-سالتاناتتى تۇردە قايتا جەرلەدى. وسى وقيعاعا بايلانىستى ازىرلەنگەن جيناققا كەڭەستەردىڭ 1920 جىلعى قۇرىلتايشى سەزىندە سايلانعان سوۆەتتىك سوتسياليستىك قازاق رەسپۋبليكاسىنىڭ العاشقى ورتالىق اتقارۋ كوميتەتى (كازتسيك) مۇشەلەرى اعايىندى بايسەيىت جانە دىنمۇحامەد (دىنشە) ادىلوۆتەر مەن ولاردىڭ ۇزەڭگىلەستەرى تۋرالى زەرتتەۋلەر جانە قىزىقتى دا تانىمدى ەستەلىكتەر توپتاستىرىلعان.
كىتاپ وتان تاريحىمەن اۋەستەنەتىن كوپشىلىككە, زەرتتەۋشىلەرگە, جاستارعا, ستۋدەنتتەر مەن وقۋشىلارعا ارنالعان.
بالجان حابدينا,
باسپا جانە پوليگرافيا ءىسىنىڭ قايراتكەرى