ەلباسى قاۋىپسىزدىك كەڭەسىنىڭ توراعاسى باس پروكۋرور عيزات نۇرداۋلەتوۆتى قابىلدادى, دەپ حابارلايدى Egemen.kz ەلباسىنىڭ ءباسپاسوز قىزمەتىنە سىلتەمە جاساپ.
كەزدەسۋ بارىسىندا نۇرسۇلتان نازارباەۆقا ەلدەگى زاڭدىلىق پەن قۇقىقتىق ءتارتىپتىڭ احۋالى, سونداي-اق ۆەدومستۆونىڭ كارانتين كەزىندەگى جۇمىسى تۋرالى باياندالدى.
بۇگىنگى تاڭدا بارلىق اكىمشىلىك حاتتامالاردىڭ 73 پايىزعا جۋىعى ەلەكتروندى فورماتتا تولتىرىلاتىنى اتاپ ءوتىلدى. سونىمەن قاتار, ع.نۇرداۋلەتوۆ شاعىن جانە ورتا بيزنەستىڭ جۇمىسىن زاڭسىز تەكسەرۋدى الدىن الۋ ءۇشىن قابىلدانىپ جاتقان شارالار تۋرالى ايتتى.
باس پروكۋرور ەلباسىعا ازاماتتاردىڭ الەۋمەتتىك-ەكونوميكالىق سالاداعى قۇقىقتارىن قورعاۋ باعىتىندا جۇرگىزىلىپ جاتقان جۇمىستار مەن ەلدىڭ قىلمىستىق زاڭناماسىن ىزگىلەندىرۋ ناتيجەلەرى تۋرالى ەسەپ بەردى.