جەرەبە جەڭىل ءتۇستى مە؟

الداعى ىرىكتەۋ ءتۋرنيرى مىناداي فورماتتا وتەدى: 32 ەلدىڭ ورەندەرى ءتورت-تورتتەن سەگىز توپقا ءبولىنىپ, «ۇيدە» جانە «تۇزدە» جۇيەسى بويىنشا ءوزارا شەبەرلىك بايقاسادى. ءار توپتا كوش باس­تا­عان ۇلتتىق قۇرامالار قارت قۇر­لىقتىڭ باستى جارىسىنىڭ جولداماسىنا بىردەن يەلىك ەتەدى. ەكىنشى ورىن العاندار اراسىندا ەڭ كوپ ۇپاي جيعان التى كوماندا دا ءدال سونداي قۇرمەتكە بولەنەدى. قىزعالداقتار ەلىنە ساپار شەگەتىن تاعى ءبىر كوماندا قوسىمشا كەزدەسۋ ارقىلى انىقتالادى. وعان جارىس قوجايىندارى – نيدەرلاندتى قوسىڭىزدار. بارلىعى – 16 كوماندا!

ىرىكتەۋ باسەكەلەرى ۇستىمىزدەگى جىلدىڭ قاراشا ايىندا باستالىپ, كەلەسى جىلدىڭ كوكتەمىنە دەيىن سوزىلادى. ال ەۋروپا چەم­پيوناتىنىڭ ءوزى 2022 جىل­دىڭ 19 قىركۇيەگى مەن 6 اقپا­نى ارالىعىندا وتەدى. امستەر­دامداعى ويىنداردى 17 000 ادامدى سىيدىراتىن «Ziggo Dome» جانە گرونينگەندەگى ماتچ­تاردى 4 500 كورەرمەنگە ەسەپتەلگەن «MartiniPlaza» ارەنالارى قابىلدايدى.

قازاقستاننىڭ فۋتزالشىلارى 5 توپقا ءتۇستى. ازىرگە ەكى قارسىلاسىمىز بەلگىلى. ولار – ماجار­ستان مەن بەلارۋس. بۇل توپتا ونەر كورسەتەتىن تا­عى ءبىر كوماندا يزرايل مەن كيپر اراسىنداعى كەزدەسۋدەن كەيىن انىقتالادى. قاي جەڭگەنى ىرىكتەۋ سىنىنا قاتىسادى. وسى تورتتىكتىڭ اراسىندا قازاقستان قۇراماسى باستى فاۆوريت ەكەنى ەش داۋ تۋعىزباسا كەرەك. ويتكەنى جەرلەستەرىمىز وسى كۇنگە دەيىن ەۋروپا چەمپيوناتىنا ەكى مارتە عانا قاتىسقانىنا قاراماستان, ەكى رەتىندە دە ۇزدىكتەر قاتا­رىنان كورىندى. ناقتىلاپ ايتساق, 2016 جىلى سەربيادا وتكەن دوپ دوداسىندا قولا مەدالدى يەلەندىك. توپتىق تۋرنيردەن ىركىلمەي وتكەن سوڭ شيرەك فينالدا يتاليادان (5:2) باسىم تۇستىك. جارتىلاي فينالدا يسپانياعا (3:5) ەسە جى­بەرسەك, ءۇشىنشى ورىن ءۇشىن تارتىستا الاڭ يەلەرىنەن (5:2) ايلامىزدى اسىردىق. ال 2018 جىلى سلوۆەنيادا ۇيىمداستىرىلعان جارىستا ءتورتىنشى ورىنعا تابان تىرەدىك. سول تۋرنيردە ءوز توبىمىزدا كوش باستاپ, پلەي-وفف سايىسىنىڭ العاشقى ويىنىندا سەربيانى (3:1) سان سوقتىرعانىمىزبەن, جارتىلاي فينالدا يسپانياعا (5:5, پەنالتيدەن – 1:3) جول بەردىك. قولا مەدال ءۇشىن كەزدەسۋدە رەسەيدەن (0:1) ۇتىلدىق. ونىڭ سىرتىندا قازاقستان فۋتزالشىلارىنىڭ ازيا بىرىنشىلىگىندە ەكى مارتە (1999 جىلى – قولا, 2000 جى­لى – كۇمىس) جەڭىس تۇعىرىنا كوتەرىلىپ, 2016 جىلى الەمدىك دودانىڭ پلەي-وفف سايىسىندا ونەر كورسەتكەنى تاعى بار.

ال قارسىلاستارىمىزدىڭ قاۋقارى قانداي؟ ەندى وسى ساۋالعا تۇششىمدى جاۋاپ ىزدەپ كورەيىك. ءوز تاريحىندا بەلارۋس قۇراماسى ەۋروپا چەمپيوناتىندا ءبىر رەت قانا باق سىنادى. 2010 جىلى ماجارستاندا جالاۋى جەلبىرەگەن جارىستا يسپانيادان ۇتىلىپ, پورتۋگاليامەن تەڭ وينادى. دوپ ايىرماشىلىعى – 6:14. ءوز توبىندا سوڭعى ورىندا قالىپ قويعان ولار پلەي-وففقا شىعا المادى. ال الەم چەمپيوناتىنا بەلورۋسسيالىقتار مۇلدە قاتىسقان ەمەس.

2017 جىلى بەلارۋس وكىلدە­رىنىڭ قازاق ەلى ورەندەرىمەن ەكى مارتە جولى قيىسقانىن جانكۇيەرلەردىڭ ەسىندە بولار. الماتىدا وتكەن سول جولداستىق كەزدەسۋلەردىڭ العاشقىسىندا الاڭ يەلەرى 0:1 ەسەبىمەن ەسە جىبەرگەن ەدى. ەسەسىنە قارىمتا باسەكەدە جەرلەستەرىمىزدىڭ ۇستەمدىگى ەش كۇمان تۋعىزعان جوق. ەسەپ – 3:0.

ماجارستان قۇراماسى قارت قۇرلىقتىڭ باستى دوداسىنا ءۇش مارتە قاتىستى. ۇشەۋىندە دە ءساتسىز ونەر كورسەتىپ, پلەي-وفف دوداسىنىڭ جولداماسىنان قاعىلدى. ماسەلەن, 2005 جىلى يتاليا (0:5), يسپانيا (2:4) جانە پورتۋگاليامەن (3:5) ءبىر توپقا ءتۇسىپ, اتالعان كوماندالاردىڭ بارلىعىنان دا جەڭىلدى. 2010 جىلى ازەربايجان (1:3) مەن چەحيادان (5:6) ۇتىلدى. 2016 جىلى يسپانيا (2:5) مەن ۋكرايناعا (3:6) قارسىلىق كورسەتىپ جارىتقان جوق.

ءسوز ورايى كەلگەندە, 1989 جىلى نيدەرلاندتا ۇيىم­داس­تىرىلعان تۇڭعىش الەم چەمپيو­ناتىندا كۇش سىناسۋ قۇرمەتىنە يە بولعان ماجارستاندىقتار سول جارىستا كوپشىلىكتىڭ قوشەمە­­تىنە بولەنگەنىن ايتا كەتۋگە ءتيىسپىز. توپتىق ءتۋرنيردىڭ تۇ­ساۋكەسەر كەزدەسۋىندە ولار اي­گىلى برازي­ليادان (3:2) باسىم ءتۇستى. بۇل ەشكىم كۇتپەگەن نا­تيجە ەدى. كەلەسى ماتچتا اتاقتى يس­پانياعا (3:5) جول بەرگەنىمەن, ودان كەيىن ساۋد ارابياسىنىڭ (11:2) تاس-تالقانىن شىعاردى. بۇل وسى تۋرنير بارىسىندا تىر­­كەلگەن ەڭ ءىرى ەسەپ ەدى. الەم­دىك دوپ دوداسىنىڭ ەكىنشى كەزەڭىندە ماجارستان فۋتزالشىلارى نيدەرلاند (3:3) جانە بەلگيامەن (2:2) تەڭ تۇسكەنىمەن, يتاليادان (1:3) ۇتىلدى. وسى­لايشا ولار جارىس جولىنان شىعىپ قالدى.

ال يزرايل مەن كيپر قۇرا­مالارى وسىعان دەيىن فۋتزال­دان وتكەن جارىستاردىڭ بىردە-بىرەۋىندە اۋىز تولتىرىپ اي­تار­لىقتاي كورسەتكىشكە قول جەت­كىزە العان جوق. ولار نە الەم­دىك, نە قۇرلىقتىق بىرىن­شىلىك­تەرگە قاتىسپاعان. سول سەبەپتى دە ءبىزدىڭ توپقا قايسىسى تۇسسە دە, ولاردىڭ جەرلەستەرىمىزگە جارىتىپ قارسىلىق كورسەتە المايتىنى انىق.

ىرىكتەۋ كەزەڭىنىڭ توپتىق تۋرنيرىندە ونەر كورسەتەتىن كوماندالار

1 توپ: سان-مارينو/دانيا, حورۆاتيا, البانيا, ۋكراينا

2 توپ: بولگاريا/ارمەنيا, فرانتسيا, گرۋزيا, رەسەي

3 توپ: تۇركيا/گرەكيا, ازەر­بايجان, سلوۆاكيا, مولدوۆا

4 توپ: انگليا/سولتۇستىك ماكەدونيا, رۋمىنيا, سەربيا, بوسنيا مەن گەرتسەگوۆينا

5 توپ: يزرايل/كيپر, قازاق­ستان, ماجارستان, بەلارۋس

6 توپ: شۆەيتساريا/گەرمانيا, يسپانيا, لاتۆيا, سلوۆەنيا

7 توپ: چەرنوگوريا/ليتۆا, يتا­ليا, بەلگيا, فينليانديا

8 توپ: پولشا, پورتۋگاليا (چەم­پيون), نورۆەگيا, چەحيا