الەۋمەتتىك وسال توپتاعى بالالارعا مەتسەناتتىق جانە قايىرىمدىلىق قاراجات ەسەبىنەن قولداۋ كورسەتىلدى. بۇل تۋرالى ەلوردا اكىمدىگىنىڭ ءباسپاسوز قىزمەتىنە Egemen.kz سىلتەمە جاساپ حابارلايدى.
كوپبالالى جانە از قامتىلعان وتباسىلاردان شىققاە باستاۋىش سىنىپتا وقيتىن الپىس وقۋشى دۇكەندەردەن كەڭسە تاۋارلارىن ساتىپ الۋعا سەرتيفيكات الدى. ءاربىر سەرتيفيكات نومينالى 10 مىڭ تەڭگە. بالالارعا "رۋحاني جاڭعىرۋ" جوبالىق كەڭسەسى Nur Otan پارتياسىنىڭ "بىرلىك" فيليالىمەن بىرلەسىپ كومەك كورسەتتى.
"مەن كوپبالالى انا رەتىندە بالانى مەكتەپكە جيناۋ قانشالىقتى قيىن ەكەنىن بىلەمىن. ال قازىرگى قيىن ۋاقىتتا كوپ وتباسى قيىن جاعدايعا تاپ بولدى. اسىرەسە سونداي جاندارعا ءبىزدىڭ قولداۋىمىز قاجەت. پرەزيدەنت قاسىم-جومارت توقاەۆ ءوز جولداۋىندا جاقىن ادامدارعا كومەكتەسۋ قاجەتتىگىن اتاپ ءوتتى. مەملەكەت باسشىسىنىڭ ۇندەۋىن تولىق قولدايمىن", دەدى "رۋحاني جاڭعىرۋ" جوبالىق كەڭسەسىنىڭ لەكتورى, بلوگەر, كاسىبي كوۋچ قۇرالاي وشاقباەۆا.
كوپبالالى جانە كومەككە مۇقتاج وتباسىلارعا قولداۋ مەتسەناتتىق جانە قايىرىمدىلىق قاراجاتى ەسەبىنەن كورسەتىلدى.
"مۇمكىندىگى شەكتەۋلى بالالاردى يگى ىستەرىمەن قولداپ, كوتەرمەلەپ جۇرگەندەرى ءۇشىن ۇلكەن العىس بىلدىرگىم كەلەدى. تەك جاقسىلىق بولسىن. قازاقستانىمىز كوركەيە بەرسىن. بالالارىمىز امان بولسىن!", دەيدى كوپبالالى انا ەلناز تۋگەتوۆا.
سونىمەن قاتار, مەكتەپ وقۋشىلارىمەن كەزدەسۋگە مەتسەنات جاكەن مانسۋرا, قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى سالتانات تۇرسىنبەكوۆا دا كەلدى.