بيىل قورعالجىن قورىعىندا كيىك ءۇش ەسە كوبەيدى

جالپى قۇرىلعانىنا جارتى عاسىردان استام ۋاقىت وتكەن قورىقتىڭ اۋماعى 700 مىڭ گەكتار جەردى قۇرايدى. مۇندا بالىقتىڭ 15 ءتۇرى, قۇستىڭ 357, وسىمدىكتىڭ 443, جان-جانۋاردىڭ 45 ءتۇرى مەكەندەيدى. سونىڭ ىشىندە قادىرلىسى – كيىك. بيىلعى جىلى كيىك باسى ايتارلىقتاي كوبەيدى.

تولدەۋ ۋاقىتى ءساتتى ءوتتى. شىعىن بولعان جوق. سول سەبەپتى كيىك قارامى بۇرناعى جىلدارمەن سالىستىرعاندا ايتارلىقتاي ءوسىپ وتىر. ماسەلەن, 2018-2019 جىلدارى بۇل وڭىردە 18 مىڭعا جۋىق كيىك بولسا, بيىلعى سانى 45 مىڭعا جەتكەن.

كيىكتىڭ كوبەيۋىنە براكونەرلەردىڭ بۇرىنعىداي باسىنۋىنا جول بەرىلمەۋى دە وڭ ىقپالىن تيگىزۋدە. قورىق اۋماعىندا سوڭعى ەكى جىلدا بىردە-ءبىر مارتە كيىك اتۋعا قاتىستى وقيعا تىركەلمەپتى. اراكىدىك قۇقىق بۇزۋشىلىق وقيعالارى قىلاڭ بەرىپ تۇراتىنى دا بار. 2019 جىلى 33 قۇقىق بۇزۋشىلىق وقيعا ورىن العان ەكەن.

قورىق قىزمەتكەرلەرى كيىك سانىنىڭ كوبەيۋى ادام ساناسىنىڭ جاقسارۋىنا دا بايلانىستى دەيدى.