دەرەك بويىنشا قازاقستاندا ينتەرنەت تۇتىناتىن ابونەنتتەر سانى 17,5 ملن ادامعا جەتكەن. ونىڭ ىشىندە 15 ملن تۇتىنۋشى عالامتور قىزمەتىن ۇيالى بايلانىس جەلىسى ارقىلى پايدالانىپ وتىر. ال وسى ساتتە ەلىمىزدە جىلدامدىعى جوعارى ءارى كەڭجولاقتى ينتەرنەتتى قولداناتىن 14 ملن 800 ابونەنت بار ەكەن.
ياعني عالامتور بايلانىسى ادام ومىرىندە ماڭىزدى ورىن الاتىن قاجەتتىلىكە اينالدى. دەمەك, وعان دەگەن سۇرانىس ارتا تۇسەتىنى بەلگىلى. بۇل ءۇردىس قازىر ورتالىق قالالاردىڭ اۋماعىنان اسىپ, الىس اۋىلدارعا دا جەتكەنى انىق. ال شالعايداعى ەلدى مەكەندەردىڭ كەڭ جولاقتى ينتەرنەت بايلانىسىنا قوسىلۋى كۇن تارتىبىندەگى وزەكتى ماسەلەنىڭ ءبىرى. باسقاشا ايتقاندا, ەلدى قولجەتىمدى بايلانىسپەن قامتۋ ءۇشىن وراسان جۇمىس ىستەلۋدە. ونىڭ ناتيجەسى دە جوق ەمەس. بۇيىرسا, جاقىندا الماتى وبلىسىنىڭ پانفيلوۆ اۋدانىنداعى اۋىل تۇرعىندارى ساپالى ينتەرنەتتى پايدالاناتىن بولادى.
قازىر پانفيلوۆ اۋدانىندا 16 ەلدى مەكەنگە جوعارى جىلدامدىقتاعى ينتەرنەت جەلىسى تارتىلۋدا. ونىڭ ىشندە بۇعان دەيىن مۇلدەم بايلانىس جەلىسى بولماعان بىرنەشە اۋىلعا ۇيالى بايلانىس ستانساسى ورناتىلىپ, ينتەرنەت جەلىسىن قوسۋ جۇمىستارى ءجۇرىپ جاتىر. وسى تىزىمدە وتكەن كوكتەمدەگى قاشىقتان وقىتۋ كەزىندە بايلانىستىڭ قيىندىعىن سەزىنگەن سارىتوبە اۋىلى دا بار ەكەن. وقىرماننىڭ ەسىندە بولسا, سول تۇستا وقۋشىلار مەن ستۋدەنتتەر ينتەرنەتكە قوسىلۋ ءۇشىن بيىك توبە باسىنا شىعىپ, قولايلى ورىن ىزدەپ كەتكەن بولاتىن. ەندى وسى اۋىلعا «بيلاين» كومپانياسى ءوز بايلانىس جەلىسىن قۇرىپ جاتىر ەكەن. ۇيالى بايلانىسپەن بىرگە كەڭجولاقتى ينتەرنەت تە قولجەتىمدى بولماق.
سونداي-اق اۋدانداعى 9 اۋىلعا بازالىق ستانسا ورناتىلۋدا. بۇعان دەيىن مۇلدەم بايلانىس بولماعان ءبورىباي, ىنتالى اۋىلدارى قازىر «تەلە 2», «بيلاين» ۇيالى بايلانىس وپەراتورلارىنىڭ قىزمەتىن تۇتىنۋعا كوشكەن. ال «قازاقتەلەكوم» كومپانياسىنا قاراستى جەلىلىك توراپتار ءبولىمى نەگىزگى 16 ەلدى مەكەندەرگە تالشىقتى-وپتيكالىق بايلانىس جەلىسىن تارتىپ جاتىر.
– جوعارى جىلدامدىقتاعى ينتەرنەت جەلىسىنە ەڭ الدىمەن مەكتەپ, مەديتسينالىق پۋنكتەر مەن جەرگىلىكتى اكىمدىكتەر قوسىلماق. بۇگىنگى تاڭدا 6 ەلدى مەكەنگە كەڭجولاقتى جەلى تارتىلدى. قالعان اۋىلدارعا جەلى تارتۋ جۇمىستارى جاقىن كۇندەرى اياقتالادى, – دەيدى «قازاقتەلەكوم» كومپانياسى پانفيلوۆ اۋدانى بويىنشا جەلى توراپتارىنىڭ ءبولىم باسشىسى رۋسلان قۇربانوۆ.
ايتپاقشى, جاڭا وقۋ جىلىندا پانفيلوۆ اۋدانىندا 24 مىڭنان استام وقۋشى قاشىقتان جانە ونلاين تۇردە وقىماق. وسىعان وراي, كەيبىر اۋىلداردىڭ ينتەرنەت, بايلانىس ساپاسىن ارتتىرۋ ءۇشىن قوسىمشا جىلدامدىق ارتتىراتىن قوندىرعىلار دا قويىلىپ جاتىر.
الماتى وبلىسى