الەمنىڭ جەتەكشى كومپانيالارىن تاڭداندىرۋ وڭاي ەمەس. دەسەك تە, اتىراۋداعى نازارباەۆ زياتكەرلىك مەكتەبىنىڭ وقۋشىسى اسقار المۇحامەتوۆ دومبىرا شەرتۋدى ۇيرەتەتىن سيمۋلياتور جاساپ, Apple كومپانياسىنىڭ يننوۆاتسيالار جوباسىنا ۇسىنعان ەدى.
جاقىندا اسقار المۇحامەتوۆ نازارباەۆ زياتكەرلىك مەكتەبىنىڭ 10 سىنىبىنا بارادى. ول بۇعان دەيىن بىرنەشە رەت رەسپۋبليكالىق, حالىقارالىق دەڭگەيدەگى ستارتاپ كونكۋرستارعا قاتىسىپ, جەڭىمپاز اتانعان بولاتىن. ونىڭ اۆتورلىق ۇزدىك جوبالارىنىڭ – «Qulynym» ءموبيلدى قوسىمشاسى. وعان مەكتەپكە دەيىنگى بالالار ءۇشىن قازاق ءتىلدى كونتەنت جيناقتاعان ەدى. كەلەشەكتە IT سالاسىن جەتىك مەڭگەرىپ, ۇلتتىق تەحنولوگيانى جاڭعىرتۋدى كوزدەپ وتىر.
– الەمگە ايگىلى ستيۆ دجوبس نەگىزىن قالاعان Apple كومپانياسى باعدارلاما جاساۋمەن اينالىساتىن جاستاردى ىنتالاندىرۋ ءۇشىن جىل سايىن يننوۆاتسيالىق جوبالار بايقاۋىن وتكىزەدى. الدىمەن كونكۋرستىڭ شارتى بويىنشا ۇزدىك جۇمىستار ىرىكتەلەدى. ودان سوڭ كومپانيا وكىلدەرى جوبانىڭ اۆتورلارىمەن بايلانىسقا شىعادى. مەن بۇل كونكۋرسقا دومبىرا تارتۋدى ۇيرەتەتىن سيمۋلياتوردى ۇسىندىم. سيمۋلياتوردى Swift باعدارلاماسىمەن جاسادىم, – دەيدى اسقار المۇحامەتوۆ.
كونكۋرس قورىتىندىسىندا جوبالارى ۇزدىك دەپ تانىلعان جەڭىمپازدار كومپانيا قارجىلاندىراتىن ءبىلىم گرانتىنا يە بولادى ەكەن. بۇل گرانت دارىندى جاستاردىڭ سان-فرانتسيسكو قالاسىنداعى (اقش) Apple كەڭسەسىندە تاجىريبە جيناۋىنا مۇمكىندىك بەرەدى. الايدا بيىل الەم ەلدەرىن شىرماۋىقتاي شىرماعان پاندەمياعا بايلانىستى بۇل جوسپار كەيىنگە قالدىرىلىپ وتىر. بىراق جاقىندا Apple كومپانياسى اتىراۋلىق ونەرتاپقىش وقۋشى اسقار المۇحامەتوۆتىڭ ونەرتاپقىشتىق ەڭبەگىن باعالاپ, ىنتالاندىرۋ ءۇشىن كۇزگى كۇرتەشە, كادەسىي مەن ارنايى ديپلوم جىبەردى.