بەلگىلى جۋرناليست, جازۋشى, "ەگەمەننىڭ" ارداگەرى, قازتاگ قالامگەرى بيسۇلتان امانعاليەۆ ومىردەن وزدى, - دەپ حابارلايدى Egemen.kz.
بيسۇلتان امانعاليەۆ 1925 جىلى 24 جەلتوقساندا قازىرگى باتىس قازاقستان وبلىسى كازتالوۆ اۋدانىندا دۇنيەگە كەلگەن. قالامگەر 1954 جىلدان 1990 جىلعا دەيىن قازتاگ اۋدارما كەڭسەسىندە جۇمىس ىستەدى. قازتاگ-قا دەيىن "قازاقستان پيونەرى" جانە "سوتسياليستىك قازاقستان" گازەتتەرىندە ەڭبەك ەتكەن.
ەڭبەك جولىن اۋدارماشى بولۋدان باستاعان بيسۇلتان امانعاليەۆ اۋدارما ءبولىمىنىڭ رەداكتورى, باس رەداكتوردىڭ ورىنباسارى, رەسپۋبليكالىق, بۇكىلوداقتىق جانە شەتەلدىك اقپارات رەداكتسياسىن باسقاردى. بيسۇلتان امانعاليەۆ قازتاگ-تىڭ مايتالمان مامانى, ەلىمىزدەگى بىلىكتى اۋدارماشى رەتىندە ارنايى الدىرىلىپ, كسرو جوعارعى كەڭەسى سەسسيالارىندا ستەنوگرافيالىق ىلەسپە اۋدارما جاساۋ ءۇشىن بىرنەشە رەت ماسكەۋدە دە بولعان. اسىرەسە, 1969 جىلى ماسكەۋدەگى كرەملدىڭ سەزدەر سارايىندا ءىىى-بۇكىلوداقتىق كولحوزشىلار سەزىندە تىكەلەي ىلەسپە اۋدارما جاساعان.
بيسۇلتان امانعاليەۆ ۋكراينا, پولشا, چەحوسلوۆاكيا, ۆەنگريانى ازات ەتۋگە قاتىسقان. اسكەردىڭ بارلىق ءۇش سالاسىندا قىزمەت ەتتى. ول قازاقستانعا 1945 جىلدىڭ قاراشاسىندا عانا ورالدى.
بيسۇلتان امانعاليەۆ سوعىس جانە بەيبىت ۋاقىتتاعى "قۇرمەت" وردەنىمەن, حالىقتار دوستىعى, قىزىل جۇلدىز, جەڭىس وردەندەرىمەن ماراپاتتالعان.