الەمدەگى ەڭ ءىرى ساۋدا باعىتتارىنىڭ ءبىرى سينگاپۋر بۇعازىندا قاڭتار ايىنان ماۋسىم ايىنا دەيىن 16 قاراقشىلىق وقيعاسى تىركەلگەن. بىلتىرعىمەن سالىستىرعاندا اشىق تەڭىزدە جاسالعان شابۋىلدار سانى ەكى ەسەگە ارتقان. بيىلعى جارتىجىلدىق بويىنشا جاسالعان باياندامادا بۇل جاعدايدى پاندەميامەن بايلانىستىرعان ەكەن.
شابۋىلدار كوبەيگەن ايماقتار قاتارىندا بانگلادەش, ءۇندىستان, يندونەزيا, فيليپپين, ۆەتنام جانە وڭتۇستىك-قىتاي تەڭىزى بار. نوكسۆيللدەگى تەننەسسي ۋنيۆەرسيتەتىنىڭ تەڭىز قاراقشىلىعىن زەرتتەۋشىسى برەندون ءپرينستىڭ پىكىرىنشە, ازياداعى قاراقشىلىق پەن قارۋلى شابۋىلداردىڭ باسىم بولىگى مۇمكىندىكتى پايدالانۋشىلىق سيپاتقا يە. كەيدە جەرگىلىكتى بالىق اۋلاۋشىلار قوسىمشا تابىس كوزى دەپ وسىنداي زاڭسىز ارەكەتكە بارادى. ودان بولەك جۇمىسسىز قالعان جاستار دا قاراقشىلىققا بەت بۇرىپ جاتادى. شاعىن توپتان قۇرالعان قاراقشىلار ۇلكەنىرەك كەمەلەرگە باسا كوكتەپ كىرىپ, مەتالل سىنىعى, قوزعالتقىش بولشەكتەرى, كەمەدەگى بايلانىس قۇرالدارى مەن ەكيپاج مۇشەلەرىنىڭ جەكە زاتتارىن قارا نارىقتا قايتا ساتۋ ءۇشىن تونايدى. ساراپشىلار عالامدىق پاندەميا كەسىرىنەن جۇمىسسىز قالعاندار ەسەبىنەن قاراقشىلىق ارەكەتكە باراتىندار سانى ارتۋى مۇمكىن ەكەنىن ايتىپ, الاڭداۋشىلىق ءبىلدىرىپ وتىر.