وڭىردەگى "نۇر-انا الەمى" قوعامدىق بىرلەستىگى مۇشەلەرىنىڭ باستاماسىمەن "ولەڭ-ءسوزدىڭ پاتشاسى" تاقىرىبىنداعى رۋحاني-ادەبي-تانىمدىق شارا جالعاسۋدا, - دەپ حابارلايدى Egemen.kz.
رۋحاني شاراعا وبلىستىق قازاقستان حالقى اسسامبلەياسىنىڭ قۇرامىنداعى 24 ەتنومادەني ورتالىق وكىلدەرى قاتىسۋدا.
ابايدىڭ 175 جىلدىعىنا ارنالعان شارا ونلاين تۇرىندە دە وتۋدە. ۇلى اقىننىڭ شىعارمالارىن, وزگە ۇلت وكىلدەرى اراسىندا دا ناسيحاتتايتىن جوبا قازان ايىنا دەيىن جالعاسادى.
ال, قاتىسۋشىلار اقىننىڭ ولەڭدەرىن جاتقا وقىپ, اندەرىن شىرقايدى. قوعامدىق بىرلەستىك جەتەكشىسى باقىتجامال ماكسيلوۆانىڭ ايتۋىنشا, ءار ەتنو-مادەني ورتالىق اقىن شىعارماشىلىعىن نەگىزگە الا وتىرىپ, ءتۇرلى مادەني شارالار ۇيىمداستىرۋى شارت.
"مىسالى, ءبىزدىڭ اجەلەر "التىن ساندىق" جاساپ شىقتى. وسى ساندىققا قاتىسۋشىلار ابايدىڭ ءومىرى مەن شىعارماشىلىعىنا قاتىستى ءبىر قۇندى مالىمەتتى سالۋى ءتيىس", - دەيدى.
ءسويتىپ, "التىن ساندىققا" جينالعان ۇزدىك قۇندى مالىمەتتەردى "ولەڭ - ءسوزدىڭ پاتشاسى" رۋحاني شاراسىنىڭ قورىتىندىسىندا اشىپ, جاريا ەتىلەدى.
"قازىر رۋحاني جوبانىڭ كەزەگىن جوبانىڭ شارتى بويىنشا, قاراشاي-چەركەس جانە قاباردا-بالقار ەتنومادەني ورتالىعى قابىل الدى. ابايدىڭ 175 جىلدىعى-قازاق حالقى ءۇشىن ۇلى مەرەيتوي. ءبىزدىڭ ورتالىق تا رۋحاني مادەني سىيلىقتار-ءان-ولەڭنەن شاشۋ شاشپاق", - دەيدى "ەلبرۋس" مادەني ورتالىعى" قوعامدىق بىرلەستىگىنىڭ جەتەكشىسى ماريا بايرامقۇلوۆا.
سونداي-اق, "التىن ساندىققا" قۇندى مالىمتتەر جيناۋ باستاماسىنا "نۇر-انا الەمى" قوعامدىق بىرلەستىگىنىڭ جانىنان قۇرىلعان "كەلىندەر كلۋبى" مەن "نۇر بولاشاق" توبىنىڭ مۇشەلەرى دە بىرلەسىپ, كومەكتەسىپ, قولداۋ كورسەتۋدە.
پاۆلودار وبلىسى