استاناداعى №5 گيمنازيا مەكتەبىندە مەكتەپ ءبىتىرۋشى تۇلەكتەرگە ارنالعان سوڭعى قوڭىراۋ ءراسىمى ءوتتى. بۇل كەش – تەك مەكتەپپەن قوشتاسۋ عانا ەمەس, 11 جىل بويى جينالعان ەستەلىكتەر مەن ارمانداردىڭ, ءۇمىت پەن تولقىنىستىڭ توعىسقان ءساتى بولدى, دەپ حابارلايدى Egemen.kz.
سالتاناتتى كەش بارىسىندا ۇستازدار شاكىرتتەرىنە ارناپ ءان شىرقاپ, جۇرەكجاردى لەبىزدەرىن ءبىلدىردى. ال اتا-انالاردىڭ اق تىلەگى مەن ىستىق ىقىلاسى كوپشىلىكتى ەرەكشە اسەرگە بولەدى. بالا كۇننەن قولىنان جەتەكتەپ وسىرگەن پەرزەنتتەرىنىڭ ازامات بولىپ, ۇلكەن ومىرگە قادام باسۋى – ءار اتا-انا ءۇشىن تولقىنىسقا تولى ءسات ەكەنى انىق.
كەشتىڭ ەڭ اسەرلى بولىگىنىڭ ءبىرى – تۇلەكتەردىڭ ۆالس ءبيى بولدى. اسەم اۋەن ىرعاعىمەن بيلەگەن جاس تۇلەكتەر مەكتەپ قابىرعاسىنداعى سوڭعى كەشتەرىنىڭ ءبىرىن ەستەلىككە اينالدىردى. بۇل بي – بالالىقپەن قوشتاسىپ, بولاشاققا جاسالعان سەنىمدى قادام سەكىلدى اسەر قالدىردى.
سوڭعى قوڭىراۋ: ەلىمىزدە 215 مىڭنان استام تۇلەك مەكتەپپەن قوشتاستى
وقۋشىلارىنا جۇرەكجاردى تىلەگىن ارناعان 11-سىنىپ جەتەكشىسى بەكبولات زايكەن ۇلى تۇلەكتەرگە الداعى ۇبت-دا ساتتىلىك تىلەپ, ءومىر جولىندا اداسپاي, ءبىلىمدى دە تاربيەلى ازامات بولۋعا شاقىردى. ۇستاز ءوز سوزىندە ءار شاكىرتىنىڭ بولاشاعىنان ۇلكەن ءۇمىت كۇتەتىنىن ايتىپ, مەكتەپ قابىرعاسىنداعى ءار ءساتتىڭ قىمبات ەستەلىك بولىپ قالاتىنىن جەتكىزدى.
ءبىر ايدان سوڭ مەكتەپ ءبىتىرۋ كەشى وتەدى: قىمبات كەش − مارتەبە مە, ىسىراپ پا؟
بۇگىندە تۇلەكتەردىڭ ويىندا ءبىر عانا ماقسات – ۇلتتىق بىرىڭعاي تەستىلەۋدى ءساتتى تاپسىرىپ, ارمانداعان ماماندىق يەسى اتانۋ. ۇبت – تەك سىناق ەمەس, ۇلكەن ومىرگە اپارار باسپالداق. سوندىقتان بۇگىن وقۋشىلارمەن قاتار ۇستازدار مەن اتا-انالار دا ەرەكشە تولقىپ ءجۇر.
جانبوتا باحىتبەك,
ەۇۋ ستۋدەنتى