اسقار مامين لۋكاشەنكومەن كەزدەسۋ وتكىزدى

بەلارۋس رەسپۋبليكاسىنىڭ پرەزيدەنتى ا. لۋكاشەنكومەن كەزدەسۋ بارىسىندا ساۋدا-ەكونوميكالىق, يندۋستريالىق, اۋىل شارۋاشىلىعى, تسيفرلىق سالالارداعى, سونداي-اق ەۋرازيالىق ەكونوميكالىق وداق اياسىنداعى ەكى ەلدىڭ ىنتىماقتاستىعىنىڭ وزەكتى ماسەلەلەرى تالقىلاندى. 

ەۇاك وتىرىسىندا ءسوز سويلەگەن قازاقستان ۇكىمەتىنىڭ باسشىسى ءوزارا ءىس-قيمىلدىڭ پروبلەمالى ماسەلەلەرىن شەشۋ ءۇشىن ۋاقىتىلى ءارى ساپالى اقپارات الماسۋ ماقساتىندا ۆەتەرينارلىق,  سانيتارلىق, فيتوسانيتارلىق, كولىك جانە كەدەندىك باقىلاۋ سالالارىنداعى ۇلتتىق جۇيەلەردىڭ ينتەگراتسياسىن جەدەلدەتۋ قاجەتتىگىن اتاپ ءوتتى.

قازىرگى كەزگە دەيىن ەاەو ينتەگراتسيالانعان اقپاراتتىق جۇيەسىن دامىتۋ اياسىندا 88 ورتاق ءۇردىس ازىرلەندى, ونىڭ ىشىندە تەك 19 (21%) ىسكە قوسىلعان.  

ۇكىمەت باسشىسى ءوزارا جەتكىزۋلەردى ەاەو ءوندىرۋشى كاسىپورىندارىن وسىعان دەيىن ۇلتتىق رەجيمدى ۇسىنۋ تۋرالى كەلىسىمگە قول جەتكىزىلگەن مەملەكەتتىك ساتىپ الۋلارعا بارىنشا تولىق تارتۋ ەسەبىنەن ارتتىرۋ مۇمكىن بولاتىنىن اتاپ ايتتى.   

پرەمەر-مينيستر 2018 جىلى اقپان ايىندا ەۋرازيالىق ەكونوميكالىق كوميسسيا قۇرىلىمىندا قۇرىلعان «تسيفرلىق وفيس» جۇمىسىن كۇشەيتۋ قاجەتتىگىن اتاپ ءوتتى. 78 تسيفرلىق باستامادان تەك 14-ىنە (18%) قولداۋ بىلدىرىلگەن, 20-سى اياقتالۋ ۇستىندە (40-ى قابىلدانباعان, 4-ءۋى قاراستىرىلۋدا).

وتىرىسقا قاتىسۋشىلار ەاەو ىشكى نارىعىنىڭ جۇمىسى اياسىندا كەدەرگىلەردى جويۋ, ارنايى قورعانىش, دەمپينگكە قارسى جانە وتەمدىك شارالاردى قولدانۋ تەتىكتەرىن جەتىلدىرۋ, سايكەستەندىرۋ قۇرالدارى ارقىلى تاۋارلاردى تاڭبالاۋ جۇيەسىن ودان ءارى دامىتۋ, گاز, مۇناي جانە مۇناي ونىمدەرىنىڭ ورتاق نارىعىن قالىپتاستىرۋ, سونداي-اق باسقا دا ماسەلەلەر بويىنشا اتقارىلىپ جاتقان جۇمىس بارىسىن قاراستىردى. 

وتىرىس قورىتىندىسى بويىنشا «جەردى قاشىقتان زوندتاۋ ۇلتتىق دەرەكتەر  كوزىنىڭ نەگىزىندە عارىشتىق جانە گەواقپاراتتىق ونىمدەر مەن قىزمەتتەردى ءوندىرۋ جانە ۇسىنۋ بويىنشا ەۋرازيالىق ەكونوميكالىق وداققا مۇشە مەملەكەتتەردىڭ كىرىكتىرىلگەن جۇيەسى» مەملەكەتارالىق باعدارلاماسى قابىلداندى. باعدارلاما جەرسەرىكتەردىڭ قولدانىستاعى جانە پەرسپەكتيۆالى توپتامالارىنىڭ رەسۋرستارىن بىرىكتىرۋدى, ورتاشا جانە جوعارى شەشىمدى عارىش اپپاراتتارىنىڭ بازاسىندا جەردى قاشىقتان زوندتاۋ (جقز) بىرلەسكەن عارىش جۇيەسىنىڭ جانە عارىشتان ءتۇسىرۋدىڭ بىرىڭعاي دەرەكتەر بانكىن قۇرۋدى قاراستىرادى, ولاردى ازىرلەۋ جانە ءوندىرۋدى ەاەو ەلدەرىنىڭ كاسىپورىندارىنىڭ كووپەراتسياسى جۇزەگە اسىراتىن بولادى. 

ەۇاك ەاەو-عا مۇشە مەملەكەتتەردىڭ اۋماقتارىندا COVID-19 كوروناۆيرۋس ينفەكتسياسىنىڭ جانە باسقا دا ينفەكتسيالىق اۋرۋلاردىڭ تارالۋىنا جول بەرمەۋ بويىنشا تۇرعىنداردىڭ سانيتارلىق-ەپيدەميولوگيالىق ساۋلىعىن جانە دەنساۋلىعىن ساقتاۋ سالاسىنداعى ءىس-شارالاردىڭ كەشەندى جوسپارىن بەكىتىپ, ەاەو اگرويندۋسترياسىن دامىتۋ جانە يندۋستريالاندىرۋ كارتاسىن ازىرلەۋ تۋرالى وكىم جاساستى, سونداي-اق 2021 جىلدىڭ 1 ناۋرىزىنان باستاپ كەدەن وپەراتسيالارىن ەلەكتروندى تۇردە جاساعان جاعدايدا كولىك, كوممەرتسيالىق جانە باسقا دا قۇجاتتاردا كەدەن ورگاندارىنىڭ بەلگىلەرىن قويماۋ تۋرالى شەشىم قابىلدادى. 

قر پرەمەر-ءمينيسترى ا. مامين بەلارۋس پرەمەر-ءمينيسترى ر. گولوۆچەنكومەن, قىرعىزستان پرەمەر-ءمينيسترى ك. بورونوۆپەن, رەسەي ۇكىمەتىنىڭ توراعاسى م. ميشۋستينمەن جانە مولدوۆا پرەمەر-ءمينيسترى ي. كيكۋمەن ەكىجاقتى كەلىسسوز وتكىزدى.