بۇكىل الەمدى جايلاعان ىندەت حالقىمىزدىڭ باسىنا تۇسكەن ۇلكەن سىن بولدى. كارانتين كەزىندە ۇيدە وتىرعان, العى شەپتە كۇرەسىپ جۇرگەن باتىرلارىمىزبەن قالاۋىمىز ءبىر. «حالقىمىز امان بولسا ەكەن» دەگەن جالعىز تىلەك.
سانىمىز از قازاق ەلىنىڭ تاريحتا كورگەن, باسىنا تۇسكەن اۋىرتپالىعى از ەمەس. مىنا قيىندىقتان دا امان ءوتۋ – باستى ماقساتىمىز. حالىق پەن بيلىك اراسىنداعى بىرلىك جاراسىپ, ء«بىر جاعادان باس, ءبىر جەڭنەن قول شىعاراتىن» كەز بولىپ تۇر. قانشاما مىقتى, ءبىرتۋار ازاماتتار مەن باۋىرلارىمىزدان مەزگىلسىز ايىرىلىپ وتىرمىز. وسىنىڭ بارلىعى جۇرەككە قاياۋ تۇسىرەدى. جالپى, ءبىز قازا تاپقان جاننىڭ جاقىندارىنىڭ قاسىنان تابىلاتىن حالىقپىز عوي. وكىنىشكە قاراي, قازىر وسى مىندەتىمىزدى دە ورىنداي الماي وتىرمىز. اينالامىزدا جاقىن تۋىستاردان, دوس-جاراندارىمىزدان ايىرىلىپ وتىرعان جايىمىز بار. بيلىكتە, بيزنەستە جۇرگەن ازاماتتاردى بار كۇش-جىگەرىمىزدى بىرىكتىرىپ, حالىققا كومەكتەسۋگە شاقىرامىن. وسى قيىن كەزدە قول سوزباساق, وسى كەزدە ەلدىگىمىزدى كورسەتپەسەك, ءبىزدىڭ قۇنىمىز كوك تيىن بولماق.
بۇل ناۋبەت ءار قازاقتىڭ ەسىندە قالارى ءسوزسىز. ىندەتپەن كۇرەسكە بار كۇشىن ارناعان, ءتىپتى ءوز ءومىرىن بەرگەن اق حالاتتى ابزال جانداردىڭ ەرلىگى حالىق جۇرەگىندە ماڭگى ساقتالادى. وسى كەزدە ارسىز ىسكە بارعان الىپساتارلار مەن «جىعىلعانعا جۇدىرىق» بولىپ ۇرلىق-قارلىق جاساعاندار دا ءوز جازاسىن الارى ءسوزسىز. ەل پرەزيدەنتى قاسىم-جومارت توقاەۆ حالىققا جولداعان تەلەۆيزيالىق ۇندەۋىندە دە, ۇكىمەتتىڭ كەڭەيتىلگەن وتىرىسىندا دا وزەكتى ماسەلەگە قاتىستى ناقتى تاپسىرمالار بەرىپ, جاقىن ارادا شەشۋدى تاپسىردى. وسى ورايدا ەل باسقاراتىن ازاماتتىڭ جانىنان تابىلىپ, كومەگىمىزدى اياماۋىمىز كەرەك. ويتكەنى مەملەكەت باسشىسىنىڭ دا كوكسەگەنى – ەلدىڭ اماندىعى. سابىرلىق, سالماقتىلىق تانىتىپ, پاراساتتىلىقپەن قولداۋ ءبىلدىرۋىمىز كەرەك. ەلىمىز امان, جۇرتىمىز تىنىش بولسىن! جاقسى كۇندەردىڭ الدا ەكەنىنە سەنىمىم زور. باستىسى, ەڭسەمىزدى تۇسىرمەي, قولىمىزدان كەلگەن ىستەن ايانبايىق دەمەكپىن.
نۇرلان دۋلاتبەكوۆ,
پارلامەنت ءماجىلىسىنىڭ دەپۋتاتى