دارىگەرلەر اتىنان ريزاشىلىق بىلدىرەمىز

ولاردىڭ ەرلىكپەن پارا-پار ءىس-قيمىلدارى بارشا قا­زاقستاندىقتار مەن ناۋقاسقا شالدىققان ازاماتتاردىڭ شەك­سىز ريزاشىلىعى مەن العىس سە­زىمىن تۋعىزدى. ءتىپتى ەلىمىز ءۇشىن ۇلكەن سىن بولىپ وتىرعان وسىناۋ الماعايىپ كەزەڭدە كۇن سايىن ءوز باسىن قاۋىپ-قاتەرگە تىگىپ جۇرگەن دا­­رىگەرلەردىڭ ءىس-ارەكەتى جاۋ­مەن ارىستانشا ارپالىسقان كە­شەگى كۇننىڭ باتىرلارىن ەسكە تۇسىرەدى. ايتايىن دە­گەنىمىز, مەملەكەت باسشىسى قاسىم-جومارت توقاەۆتىڭ تا­­را­پىنان دارىگەرلەردىڭ جان­كەشتى ەڭبەكتەرى ءتيىستى دەڭ­گەيدە ەسكەرىلىپ, باعالانىپ كە­­­لە جاتقانى. بۇل وي-تۇ­جى­رى­­مىمىزعا پرەزيدەنتتىڭ پان­دەميامەن كۇرەستىڭ بەل ورتاسىندا جۇرگەندەردى ءوز جار­لىعىمەن ماراپاتتاپ, كو­تەرمەلەپ وتىرعانى اي­قىن ايعاق. ولاردىڭ اراسىن­دا مە­ديتسينالىق كلاستەر شەڭ­بە­رىندە ىندەتپەن كۇرەسىپ جۇر­گەن اقتوبەلىك دەنساۋلىق ساقتاۋ سالاسىنىڭ وكىلدەرى دە بار.

وسى ورايدا ءبىز اقتوبە اي­ماعىنان قازاقتىڭ تۇڭعىش دارىگەر قىزى اققاعاز دوسجا­نوۆا, وتاندىق مەديتسينانىڭ دامۋىنا سۇبەلى ۇلەس قوسقان يشان­باي قاراقۇلوۆ پەن جاق­سىلىق دوسقاليەۆ جانە قا­زاقستاننىڭ ەڭبەك ەرى سەرىك اقشولاقوۆ سىندى مەديتسيا مايتالماندارى شىققانىن لا­يىقتى ماقتانىش ەتە الامىز. اتالعان بەلگىلى تۇلعالاردىڭ قاتارىنا ىندەتپەن كۇرەس كەزىندە سوڭعى دەمى ۇزىلگەنشە ازا­ماتتىق ار-ۇجدانىمەن دارى­گەرلىك انتىنا كىر كەلتىرمەي كوروناۆيرۋسقا شالدىققان ادامدارعا اراشا ءتۇسۋ كەزىندە ءوزى دە وسى دەرتكە تاپ بولىپ, سونىڭ سالدارىنان دۇنيەدەن وتكەن اقتوبەلىك ارىپتەسىمىز, وسى ءوڭىردىڭ باس ينفەكتسيونيست دارىگەرى مارقۇم قاليحان قو­زىباعاروۆ تا قوسىلعانى كامىل.

ەلىمىزدەگى ىندەتپەن كۇرەس بارىسى ەل ءۇشىن تۋعان حالقى­مىزدىڭ تاعى ءبىر ادال ۇلىن انىقتاپ بەردى. ونىڭ مەملەكەت باسشىسى قاسىم-جومارت توقاەۆتىڭ جارلىعىمەن ەلى­مىزدىڭ ەڭ جوعارى مەملەكەتتىك ماراپاتى – قازاقستاننىڭ ەڭبەك ەرى اتاعىمەن ماراپات­تالۋى بارشا وتاندىق دارىگەر­لەردىڭ ەرەن ەڭبەگى ءۇشىن بەرىل­گەن بيىك باعا دەپ بىلەمىز. سول ءۇشىن ءبىز ەل پرەزيدەنتى قاسىم-جومارت توقاەۆقا بارشا اق­تو­بەلىك دەنساۋلىق ساقتاۋ سالاسى قىزمەتكەرلەرى اتىنان شەكسىز ريزاشىلىعىمىز بەن ال­عى­سىمىزدى بىلدىرگىمىز كەلەدى.

سونىمەن بىرگە ءبىز بۇگىندە ەلدىڭ وزگە وڭىرلەرىمەن سالىس­تىرمالى تۇردە العاندا اق­توبە وڭىرىندە ەپيدەميالىق احۋالدىڭ وڭ ۇدەرىسى مەن ديناميكاسى بايقالا باستاعانىن دا ايتا كەتكەندى ءجون كورەمىز. ويتكەنى سوڭعى اپتالاردا وڭىردە ناۋقاستاردىڭ سانى ءبىرشاما كەمىپ, دەرتتەن ساۋىعىپ شىق­قانداردىڭ قاتارى ءوسىپ كەلە­دى. ارينە, بۇل وڭ كورىنىس بو­ساڭسۋعا ەش نەگىز بولا المايدى. كەرىسىنشە, دەرتتى ەمدەۋ مەن ودان ساقتاندىرۋ شارالارى جۇيەلى تۇردە جالعاساتىن بو­لادى. قازىرگى كۇنى وبلىس اۋماعىندا بۇعان قاجەتتى بار­لىق العىشارتتار جاسالعان. مامان-كادرلار جەتكىلىكتى, قا­جەتتى مەديتسينالىق قۇرال-جاب­دىقتار مەن قوندىرعىلار ناۋقاستاردى قامتي الادى. اۋرۋ­حانالار مەن پروۆيزورلىق گوسپيتالداردا جانە ەمحانالار جانىنداعى ستاتسيونارلىق ورىنداردا جاڭا ناۋقاستاردى قابىلداۋعا مۇكىندىك بار. ءدارى-دارمەكپەن قامتۋ ىسىندە بۇعان دەيىن ءارتۇرلى ىستەر ورىن العانىمەن, كەيىنگى كەزدە وبلىس اكىمىنىڭ تاراپىنان جەدەل شارالار جۇزەگە اسىرىلعاننان سوڭ بۇل ماسەلە دە تولىقتاي شەشىمىن تاپتى دەي الامىز.

بەرەكە مەن بىرلىك بار جەردە الىنبايتىن اسۋ, بەرىل­مەيتىن قامال جوق. بۇل رەت­تە قازىرگى كەزدە وبلىس تۇر­عىندارى ءبىر-بى­رىنە جاناشىرلىقپەن قولداۋ كورسەتە بىلگەنى دە اتاپ ايتۋعا تۇرار­لىق. اق­توبە – ەلىمىزدىڭ ءىرى ونەر­كا­سىپ ورتالىقتارىنىڭ ءبىرى. مۇن­داعى ءىرى كاسىپورىن باس­شى­لارى مەن كاسىپكەرلەرى جا­نە مىڭداعان ەرىكتى ءبىر جاعادان باس, ءبىر جەڭنەن قول شىعارا وتىرىپ ىندەتتى اۋىزدىقتاۋعا ءبىر كىسىدەي جۇ­مىلىپ كەلەدى. ءبىز كوكەيدە جۇرگەن وي-پىكىر­لەرىمىزدى ەلى­مىزدىڭ باس باسىلىمىنا جول­داي وتىرىپ, بارشا ەل-جۇرتىمىز ءۇشىن اۋىر سىن بولىپ وتىرعان قاۋىپتى ىندەتتى جويىپ, ارتقا تاستاۋ ءۇشىن اۋىز­بىرشىلىك ۇلگىسىن كورسەتە بەرەيىك دەمەكپىز.

اقتوبە وبلىستىق دارىگەرلەر قاۋىمداستىعى اتىنان:

قايرات سابىر,

«سەنىم» دەنساۋلىق ساقتاۋ جۇيەسى جۇمىسكەرلەرىنىڭ سالالىق كاسىپوداعى» رقب اقتوبە وبلىستىق فيليالىنىڭ توراعاسى,

رومان راحيەۆ,

اقتوبە وبلىستىق دەنساۋلىق ساقتاۋ سالاسى قىزمەتكەرلەرى ارداگەرلەر كەڭەسىنىڭ توراعاسى,

روزا ىزتىلەۋوۆا,

اقتوبە وبلىستىق دارىگەرلەر مەن پروۆيزورلار قاۋىمداستىعى قوعامدىق بىرلەستىگىنىڭ پرەزيدەنتى

اقتوبە