كاسىپكەرلەر كومەككە كەلدى

بيزنەس وكىلدەرى مەن كاسىپكەرلەر دە بۇل سىناقتى ەڭسەرۋگە ۇلەس قو­سۋدا. ماڭعىستاۋلىق كاسىپكەرلەر وب­لىستاعى دەنساۋلىق ساقتاۋ نىساندارىنا 45 وتتەگى كونتسەنتراتورىن سىيعا تارتتى. قۇرىلعىلار رەسەي̆ فەدەراتسياسىنان اكەلىنگەن. كەشە تاڭدا رەسەيدەن ماڭعىستاۋ وبلىسىنا تاعى 45 وتتەگى كونتسەنتراتى كەلدى. وبلىستىق قوعامدىق كوممۋنيكاتسيا ورتالىعىنىڭ اقپاراتىنا ساي, بۇل جولى قاجەت قۇرىلعىلاردى مارات ورمانوۆ پەن سەرگەي ۆوروجەيكين الدىرتقان. دەمەۋشىلىكپەن الىنعان اپپاراتتار دارىگەرلەرگە تابىستالىپ, ولاردىڭ 30-ى وبلىستىق اۋرۋحاناداعى پروۆيزورلىق ستاتسيونارعا, بەسەۋى جاڭا­وزەن قالاسىنا, قالعانى اۋدان­دارعا ۇلەستىرىلگەن.

بۇعان دەيىن دە ايماققا 54 وتتەگى كونتسەنتراتورىنىڭ اكەلىنگەنى حابارلانعان بولاتىن. ماڭعىستاۋلىق مەديتسينا قىزمەتكەرەرى وكپەلەرى قابىنعان ناۋقاستاردىڭ كوبىنە جاساندى تىنىس الۋ قۇرىلعىلارى قاجەت ەكەنىن, ناۋقاس سانى كوبەيگەن سايىن اتالعان وتتەگى كونتسەنتراتورىنا دەگەن سۇرانىس تا ارتىپ جاتقانىن ايتۋدا. شەتەلدەن الىنعان قىمبات قۇرىلعىلار وبلىستىق اۋرۋحانادا اشىلعان پروۆيزورلىق ورتالىققا جەتكىزىلگەن. بۇگىنگى تاڭدا قاجەتتىلىگى ارتىپ وتىرعان قۇرالداردىڭ وتىزىن «قاراجانباسمۇناي» اق ساتىپ الىپ بەرگەن. ودان بولەك  س.مۇساباەۆ, ا.جول­دىباەۆ, ب.وڭداسىنوۆ, ج.ادىل­بەكوۆ, ي.بيمىرزاەۆ, ن.كۇن­شىعاروۆ, س.مۇ­ڭال­باەۆ, ا.كەرەل­باەۆ سىندى كاسىپكەرلەر 20 داناسىن, Forte بانكىنىڭ ماڭعىستاۋ وبلىستىق بولىمشەسىنىڭ ديرەكتورى اببات ورىسباەۆ 4 داناسىن ساتىپ الۋعا دەمەۋشىلىك كورسەتكەن. 

ء«دال وسىنداي قيىن-قىستاۋ كە­زەڭدە بىرلەسىپ, سىناقتى جەڭۋگە جۇ­مىل­ماساق, كومەكتەسپەسەك, قاشان كو­مەكتەسەمىز دەپ ويلادىق. سوندىقتان ماسكەۋدەن كەلە جاتقان ۇشاقتى پايدالانىپ شامامىزعا قاراي وتتەگى كونتسەنتراتورىن الدىردىق. اپپاراتتى الۋدا ماسكەۋلىك ارىپتەستەرىمىز قول ۇشىن سوزدى. قاجەتتىلىك تۋىنداعانىن كورە تۇرا قالىس قالا المادىق. بۇل ءبىزدىڭ پارىزىمىز دەپ بىلەمىز», دەدى كاسىپكەر مارجان جاڭابەرگەن.

«وتتەگى كونتسەنتراتىنان باسقا وكپەنى جاساندى جەلدەتۋ اپپاراتى بار, بۇگىندە رەانيماتسيادا 50 ناۋقاس اتالعان اپپاراتتىڭ كومەگىمەن تىنىس الىپ جاتىر. ودان بولەك اۋرۋحانادا 6 ءبولىم بار. ءار بولىمدە 30-دان باستاپ 80 ناۋقاسقا دەيىن ەمدەلۋدە. ولاردىڭ ارقايسىسىنا وسىعان دەيىن كەلگەن اپپاراتتاردى ءبولىپ بەردىك. ناۋقاستاردىڭ بارلىعىنىڭ ەمى اتالعان اپپاراتتارعا تاۋەلدى ەمەس. وزدىگىنەن دەم الا الاتىن ازاماتتارعا اتالعان قۇرىلعىلاردىڭ قاجەتى جوق. ال قورقىنىش بيلەپ, دەم جەتپەي, تىنىس الۋى قيىنعا سوق­سا اپپاراتقا جالعايمىز. وتتەگى كونتسەنتراتتارىنىڭ كومەگى سول»,  دەيدى وبلىستىق اۋرۋحانا باسشىسىنىڭ ورىنباسارى ساعات امانقوسوۆ.

ايماقتاعى وبلىستىق كوپبەيىندى اۋرۋحانا سوڭعى ءبىر اپتادان بەرى تولىقتاي پروۆيزورلىق ستاتسيونار رەتىندە جۇمىس ىستەپ جاتىر. مۇندا 650 ورىن قاراستىرىلعان, قازىر 380 ناۋقاس ەم قابىلداۋدا.

ال ەل اعالارى الدىرعان قۇرىل­عىلاردى اۋرۋحانالارعا جەتكىزۋگە وڭىردەگى سپورتشىلار جاردەم بەرۋدە. ولار وتتەگى كونتسەنتراتتارىن ءتيىستى مەكەمەلەرگە اپارىپ, كەزەكشىلىكتەگى مەديتسينا قىزمەتكەرلەرىنە تۇسكى اس­تارىن جەتكىزۋدى قولعا العان. اقتاۋ قالا­لىق دەنە شىنىقتىرۋ, سپورت جانە تۋريزم ءبولىمىنىڭ باسشىسى بولات دوسوۆتىڭ ايتۋىنشا, جاستار بۇگىنگە دەيىن اۋرۋحانالارعا 140 وتتەگى كونتسەنتراتىن جەتكىزگەن. قاجەت جاعدايدا قۇرىل­عىلاردى وتتەگىمەن قايتا تولتىرۋ دا جاستاردىڭ مىندەتىندە. الداعى كەز­دە تاعى 70 باللون الىپ كەلۋ جوس­پار­دا بار.

تۇركىستان وبلىسى جەتىساي اۋدا­نى­نىڭ كاسىپكەرلەرى دە وڭىردەگى جا­عدايدى رەتتەۋگە اتسالىسىپ جاتىر. ولار اۋرۋ­­حانالارعا جاساندى تى­نىس الۋ اپپا­راتىن الىپ بەردى. مەتسەناتتار اسىق­اتا اۋرۋحاناسىنا 5 كيسلورودتىق كون­تسەنترات الىپ بەرگەن. سونىمەن قا­تار اۋدانداعى «ىسكەر انالار» قايىرىمدىلىق قورى اۋرۋحاناعا 40 ليترلىك وتتەگى باللونىن الۋعا قارجىلاي كومەك كورسەتتى. بۇعان دەيىن دە جەتىساي اۋداندىق ءماسليحاتىنىڭ دەپۋتاتى جۇماعالي تورەقۇل اۋداننىڭ ورتالىق اۋرۋحاناسىنا قۇنى 700 مىڭ تەڭگە بولاتىن جاساندى تىنىس الۋ اپپاراتىن سىيعا تارتقانى حابارلانعان ەدى.