مەملەكەت باسشىسى قاسىم-جومارت توقاەۆتىڭ حالىققا جولداعان ۇندەۋىندە ايتىلعان باستامالاردى تولىق قولدايمىن. الەمگە تارالعان جۇقپالى ىندەت حالقىمىزدىڭ ەڭسەسىن باسا المايدى.
ەلىمىزدە كارانتين رەجىمى ەرتە ەنگىزىلىپ, ساقتىق شارالارى ۋاقتىلى جاسالدى. دەسە دە قازىرگى ۋاقىتتا اۋرۋ جۇقتىرعان ادامداردىڭ سانى ارتىپ بارادى. ءبىز بىرلىكتە كۇش بىرىكتىرسەك عانا بۇل قيىندىقتان قۇتىلامىز. دەنساۋلىق ساقتاۋ مينيسترلىگى العاشقى كەزەڭنەن باستاپ حالىققا اقپارات بەرىپ وتىردى. كەتكەن كەمشىلىكتەردى ۋاقىت تارازىلايدى.
پرەزيدەنت: «دارىگەرلەرىمىز بۇقارالىق اقپارات قۇرالدارى ارقىلى ازاماتتارعا ناقتى, ءبىرىزدى مالىمەت بەرۋى كەرەك. دەرتتى ەمدەۋدىڭ نەشە ءتۇرلى جولدارىن كورسەتىپ, ادامداردىڭ دەنساۋلىعىنا قاۋىپ توندىرۋگە بولمايدى», دەدى. اتالعان باستامانى حالىق تولىق قولدايتىنىنا سەنەمىن. ويتكەنى ەم-دوم ءار ناۋقاستىڭ ىڭعايىنا بەيىمدەلىپ, مەديتسينالىق كورسەتكىشتەرىنە قاراي جاسالۋى كەرەك. بارلىق ادام بىردەي ەمەس, جەلىدە تاراپ كەتكەن ەمدەۋ شارالارى بىرەۋگە جاققانىمەن, ەندى بىرەۋگە قاۋىپ ءتوندىرۋى مۇمكىن. سالاداعى مامانداردىڭ كەڭەسىنە قۇلاق اسقان ءجون.
ودان بولەك, دارىگەر تاپشىلىعىن شەشۋ ءۇشىن ءبىلىم جۇيەسىنە دە وزگەرىس ەنگىزىلگەنى ءجون. جاس مامانداردى ىنتالاندىرىپ, تىڭ جوبالاردى جۇزەگە اسىرۋعا جول اشۋعا ءتيىسپىز. مەديتسينالىق كوللەدجدەر مەن جوعارى وقۋ ورىندارىندا مامان دايارلاۋدى ءجىتى باقىلاۋعا الىپ, ساپاسىن ارتتىرۋىمىز كەرەك. ءدارى تاپشىلىعى دا سالاعا رەفورما كەرەك ەكەنىن كورسەتتى. ءار وبلىس ورتالىعىنان ءدارى ءوندىرىسى ورىندارىنىڭ نەگىزى قالانۋى ءتيىس. شەتەلدەن ءدارى ساتىپ الۋدىڭ سوڭى تاپشىلىققا اكەلەتىنىن كوزىمىز كوردى. مەن ءۇشىن قازاقستان رەسپۋبليكاسىنىڭ ءار ازاماتىنىڭ ءومىرى قىمبات. ەندى وسى باعىتتا جۇيەلى قىزمەت اتقارىلسا دەگەن ءۇمىتىم بار. ەلىمىز امان, جۇرتىمىز تىنىش بولسىن!
قارجاۋباي سارتقوجا ۇلى,
«وتانداستار قورى» جانىنداعى قوعامدىق قابىلداۋ كوميسسياسىنىڭ مۇشەسى, جازۋشى, تۇركىتانۋشى